iVola Mai Ghana

Na Siga e Luva Kina na Beleti Loaloa

AU SEGA ni vakabauta ni o koya. E dara tu e dua na kote vulavula vavaku, qai vesu toka e tolona e dua na beleti loaloa e lima na sedimita na kena raba. Sa tu vakarau me vala, e laurai qori ena wakakau ni ligana kei na nona iduriduri. E rerevaki na matana; e sega ni kauaitaka tale e dua na ka. E vakasigogo mata, sega ni bau laurai vua na malumalumu.

E vakasauri ga nona kaila lako vata nona toso kei na cawi ni ligana e macawa. E qera i ra na kauvaro e karatetaka. Ni cowiri tale, e vukatubu i macawa, na ivukivuki ni ligana kei na yavana e vakaraitaka ni vakarau karatetaka e dua na meca. Qo beka na turaga e taleitaka me vuli iVolatabu?

Au toso yani i liu meu lululu vua. “Kemuni beka o Kojo, oni vinakata moni vulica na iVolatabu?” E qumia na ligaqu ena matadredredre, e laurai vua na loloma kei na veikauaitaki. Sa sega ni rerevaki na matana, sa laurai ga nona via kilaka. “Io, au taleitaka sara ga vakalevu,” e kaya. “Daru tekivu ena siga cava?”

Keirau dabe ena dua na varada lailai e sema ina nona vale, tauri sara mai neirau iVolatabu kei na ivola ni vuli. E batabata vinaka, vagagalu, qai keitou le tolu ga: o Kojo, yau, kei na nona maqe lailai. Na maqe lailai qo e 35 ga na sedimita na kena balavu, e damu na vuti ni uluna, vula toka vakalailai na kumina, e rairai lasa qai dau vakaivukivuki. E dau qito, lako ena vanua ga e vinakata, butuka neirau ivola, taura neirau peni, tatara ena neirau taga ni sote me qara e dua na ka me kania. Me vakataki ira ga na itubutubu sa ra matau ni rogoca na kosakosa ni gone, e sega ni kauai tale ga kina o Kojo, e kauaitaka ga nona vuli. Mai na levu ni ka e taroga au kila ni vakasamataka tiko na ka e vulica. De dua e vulica mai na karate me dau qaqarauni, ena sega ni vakabauta e dua na ka vakavo ke vakadinadinataki vua ena iVolatabu.

E toso vinaka neirau vuli, gauna vata qori au raica ni rui vakasama sara vakabibi ena ka me cakava. E tukuna vei au, “ena vuravura qo au taleitaka duadua ga na karate.” Au raica ni vinakata sara ga me biuta na ka e kenadau kina. Ni yabaki 26, e sega wale ga ni taleitaka na karate, e kenadau kina ni sa lai yacova sara na ivakatagedegede ni beleti loaloa, na kena era yacova se rawata ga e vica.

Au sega ni kila ena biuta o Kojo na karate se sega. E kila ni nodra vakamavoataki na so ena karate e sega ni salavata kei na yalololoma, yalomalumalumu, kei na loloma e kilai kina na lotu vaKarisito dina. Ia au kila ni o ira sara mada ga e kaukaua na lomadra, e veisautaka nodra rai na ka dina ena iVolatabu. Ke donu tiko na inaki ni lomana, ena veivuke ni Kalou ena rawa tale ga ni veisau o Kojo me yalololoma qai yalovinaka. Sa dodonu ga meu vosota.

Ni vakarau oti neirau vuli ena dua na yakavi tunumaka, keirau wilika sara e dua na tikinivolatabu e tarai Kojo vakalevu. E wilika: “Sa vakatovolea [dikeva] na tamata yalododonu ko Jiova: ia na tamata lomaca kei koya sa vinakata nai valavala kaukauwa, sa cati koya na yalona.” (Same 11:5) E tukuna tale vakamalua “[o] koya sa vinakata nai valavala kaukauwa.” E laurai e matana na yalodei kei na tabusoro. “Qo na ka au sa vakatulewataka,” e raici au qai dredre.

Keirau sa cakava tiko kei Kojo na cakacaka keirau taleitaka vakalevu—na nodra vakavulici wale ena iVolatabu na tataleitaki. Ena mataka nikua sa loku tu me keirau lai sikova na cauravou o Luke.

Me keirau yaco i nona vale, keirau muria e dua na sala osooso, qiqo ena makete. E vica vata na drau na makete lalai kei ira na dauvolivolitaki era tu ena tutunisala: ibinibini rokete drokadroka kei na kena damudamu, na basikete tomata dreu, ibinibini okra, vaka kina na retio, iviu, sovu, ulucavu, iyaya ni vakasaqa, ibinibini isulu makawa kei na ivava. Era kauta wavoki na beseni kakana e uludra na goneyalewa. Na suvu maleka kei na sitiu ika vesa, qari kei na sici ni vanua. Era cici wavoki tale ga na koli, me, kei na toa. E kuria na kosakosa ni makete na rogolevu ni retio, tagi ni sici ni motoka kei na kaila ni tamata.

Keirau muria e dua na gaunisala kuvu ena taudaku ni tauni, keirau yaco sara ina dua na vale makawa. E duri tu e katuba o Luke na cauravou yabaki 20 vakacaca qai kacivi keirau i loma ni rui katakata na siga. E oso na nona vale ena taga kei na kateni draunikau kei na wakanikau mamaca, era vesu vata ena wa na draunikau, kei na kulinikau. E kilai na nodratou yatukawa na nana levu nei Luke ena soli wai e yaga ina mataqali mate cava ga. Sa namaki keirau tiko mai o Luke. E kumuna ena dua na yasana na iyaya a kabuwacara tu qai tuvana e tolu na idabedabe kau. Keitou dabe veivolekati, tekivu sara na vuli.

O Kojo na qasenivuli nei Luke. Au vakarogoca toka nodrau veivosakitaka na isaunitaro vakaivolatabu me baleta na vuna e levu kina na rarawa e vuravura. Au raica na liga wakakau ya ni cega vakamalua na iVolatabu vei Luke. Au vakasamataka sara ni dua na gauna a vakayagataki tu na liga ya ena vala. Na kaukaua ni Vosa ni Kalou e cavuraka na ivalavala veicalati sa vakawakana tu, qai uqeta na itovo vinaka me vaka na yalololoma kei na loloma. Qo na veisau levu duadua me rawati.

Ni keirau sa lesu tiko i vale keirau vosa sara vua e dua na turaga e dabe toka ena ruku ni vuni maqo. E vakarorogo ni wilika vua o Kojo e dua na tikinivolatabu. Ia e tucake vakasauri ni kila ni keirau iVakadinadina i Jiova. E kailavaka “Au sega ni taleitaki kemuni!” E wabibiri vakasauri na yagoi Kojo, ia au raica ni tauri koya tale, a tatau vinaka, keirau gole sara yani.

Ni keirau lako tiko e vakasolokakanataka vei au o Kojo: “Sa dua na ka na tavatukituki ni utoqu. O kila na cava au rawa ni cakava vua na turaga ya?” “Io, au kila,” au tukuna ena matadredredre. E dredre lesu mai, keirau tomana sara neirau ilakolako.