E Veisautaka na Bula na iVolatabu

E BIUTA vakacava na gunu sivia e dua na marama mai na Yatu Filipaini qai vakavinakataka na nona bula vakavuvale? Na cava e biuta kina e dua na turaga mai Ositerelia na karate, me lai dua e dau vunautaka na itukutuku vinaka? Wilika mada na ka erau tukuna.

“E taura na gauna na veisau.”—CARMEN ALEGRE

SUCU: 1949

VANUA: YATU FILIPAINI

KA E KILAI KINA: DAUGUNU SIVIA

NOQU BULA E LIU: Au sucu e San Fernando, e dua na taoni ena yasana o Camarines Sur. Niu sa uabula, e levu ga na gauna au dau tiko e Antipolo, Rizal Province. Na taoni qo e toka ena yasayasa e levu kina na ulunivanua, vanua veico kei na veivunikau. A dua toka ga na taoni lailai ena imatai ni gauna au toki kina ekea. E dredre meu kunea e dua ni taubale tiko e tuba ena bogi. Ia na taoni qo e sa dua na siti levu nikua qai levu kina na tamata.

Sega ni dede noqu toki i Antipolo au sotava sara e dua na turaga o Benjamin, toso na gauna keirau sa vakawati sara. Au raica ni sega ni rawarawa na bula vakawati, e duidui sara mai na ka au namaka. Noqu saga meu walia noqu leqa, au tekivu gunu kina vakasivia. Sa sega ni vinaka na noqu itovo, qai laurai qori ena ka au dau cakava vei watiqu kei rau na luvequ. Au sega ni dau lewai au rawa se meu vosovoso ena gauna keitou dau veivosaki kina. Au sega ni dau dokai watiqu. Sa sega kina ni marautaki neitou bula vakavuvale.

VEISAUTAKI AU NA IVOLATABU: E dua na iVakadinadina i Jiova na dauvequ o Editha, e vakatututaka me keirau vulica vakaveiwatini na iVolatabu kei ira na iVakadinadina. Ni keirau vinakata me vinaka na neitou bula vakavuvale, keirau mani vakadonuya me keirau vuli.

E levu sara na ka dina keirau sa mai vulica ena iVolatabu. E tarai au sara ga na malanivosa e tiko ena Vakatakila 21:4. Me baleti ira na bula ena vuravura parataisi ena ruku ni veiliutaki ni Matanitu ni Kalou, e cavuti ena tikinivolatabu qori ni Kalou “ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi.” Au vinakata meu bula maliwai ira era na marautaka na veivakalougatataki ya.

E vinakati kina meu cakava eso na veisau lelevu ena noqu itovo kei na noqu ivalavala. E taura na gauna na veisau, ia au valuta rawa na noqu daugunu sivia. Au vulica meu veikauaitaki qai dau vosovoso niu veimaliwai kei ratou noqu lewenivuvale. Au vulica meu dokai watiqu qai tokoni koya tale ga ena nona liutaka na vuvale.

Ni keirau tekivu lako kei Benjamin ena nodra soqoni na iVakadinadina i Jiova, e uqeti keirau sara ga na ka keirau raica. E sega ni dua vei ira e dauveimauilavo, gunusivia se dauveivakaduiduitaki. Era dau veidokai qai veirokovi. Keirau vakadeitaka kina ni keirau sa kunea na lotu dina.—Joni 13:34, 35.

KENA YAGA: Sa vinaka sara na neitou bula vakavuvale. Keirau marautaka kei Benjamin na neirau bula vakawati, keirau marautaka tale ga ni keirau vakavulici ira eso tale ena iVolatabu. Rau sa tekivu vulica tale ga na iVolatabu o rau na luvei keirau tagane kei na dui watidrau. Keirau nuitaka ni keitou na qaravi Jiova vata ni toso na gauna. Qo e dua na ivakarau ni bula vinaka duadua.

‘Au na tabusoro.’—MICHAEL BLUNSDEN

SUCU: 1967

VANUA: OSITERELIA

KA E KILAI KINA: DAU KARATE

OQU BULA E LIU: Au susu e Albury, e dua na siti vutuniyau qai rairai totoka e New South Wales. Me vaka ga eso tale na siti, e dau caka tale ga kina na basulawa. Ia e kilai levu o Albury me vanua vinaka meda vakaitikotiko kina.

Au susugi vakavinaka. Dina ni rau veibiu na noqu itubutubu niu se qai yabaki vitu, ia erau raica me keitou qaravi vinaka na va na luvedrau. Au vuli vinaka baleta niu vuli ena koronivuli vinaka duadua ena yasayasa qori. E vinakata o tamaqu me dua na noqu bisinisi ni sa oti na noqu vuli. Ia au taleitaka vakalevu na qito, au kenadau sara ena vodo basikeli kei na karate. Au cakacaka sara ena vanua ni ripea motoka me levu kina na gauna au vakayagataka ena qito au taleitaka.

Au sakitaka na kaukaua e tu vei au. Au nanuma kina ena so na gauna ni sega ni dua na ka e rawa ni vakamalumalumutaki au. E rawarawa niu vakayagataka noqu kaukaua meu lewai ira kina eso tale. Ia e kila o noqu qasenivuli ni karate niu rawa ni vakayagataka vakatani noqu kaukaua, qori na vuna e dau vakavulici au kina meu lewai au vinaka, me vinaka tale ga na noqu ivalavala. E vakabibitaka vakalevu meu dau talairawarawa qai yalodina ena lawa kei na ivakavuvuli ni karate.

VEISAUTAKI AU NA IVOLATABU: Niu sa tekivu vulica na iVolatabu, au vulica ni cata o Jiova na ivalavala kaukaua. (Same 11:5) Au vakaiulubaletaka ena imatai ni gauna ni sega ni qito rerevaki na karate, e sega ni veivakamavoataki. Au nanuma ni vakavulici kina na itovo vinaka kei na ivakatagedegede savasava e salavata kei na ka e vakavuvulitaka na iVolatabu. Dua na ka nodrau vosovoso na veiwatini iVakadinadina rau vakavulici au tiko. Erau sega ni tukuna meu biuta na karate, ia erau vakavulici au tiko ga ena ka dina mai na iVolatabu.

Sa qai veisau noqu rai ni sa levu na ka au vulica ena iVolatabu, ni sa vinaka tale ga na noqu veiwekani kei Jiova. E tarai au sara ga na noqu vulica na ivakaraitaki e laiva o Jisu na Luve i Jiova. E tu vei Jisu na kaukaua, ia e sega ni vakayagataka me vakayacora kina na ivalavala kaukaua. E lauti au sara ga na ka e tukuni ena Maciu 26:52: “Nira na mate ena iseleiwau o ira era vakayagataka na iseleiwau.”

Na levu ga ni noqu vulica na ka me baleti Jiova, na levu tale ga ni noqu lomani koya, au dokai koya tale ga. E uqeti au dina niu vakasamataka nona rawa ni taqomaki au na Dauveibuli e vuku qai kaukaua. E uqeti au tale ga niu vulica ni na sega vakadua ni biuti au o Jiova keu sasaga tiko ga ena gauna au vakararawataki koya kina se au nanuma niu sa sega ni rawata. E vakacegui au na nona yalayala: “Ni sai au ko Jiova na nomu Kalou, ka’u na taura na ligamu i matau, ka kaya vei iko, Mo kakua ni rere; ka’u na vukei iko.” (Aisea 41:13) Niu kila ni lomani au va qori na Kalou, au sega sara ga ni via vakanadakui koya.

Au kila ni na sega ni rawarawa meu biuta na karate. Au kila tale ga ni na vakamarautaki Jiova keu cakava qori, au vakadeitaka kina ni yaga vakalevu na qaravi koya mai na noqu vakaliuca e dua tale na ka. Sa qai vakadeitaki au niu wilika na ka e tukuna o Jisu ena Maciu 6:24: “E sega ni dua e rawa ni qarava e rua na turaga.” Au liaca niu na sega ni qaravi Jiova sara vakavinaka keu tomana tiko ga na vuli karate, baleta niu na rawa ni lai vakaliuca na karate ni toso na gauna. Qo na gauna meu sa vakatulewataka kina se turaga cava au na qarava, o Jiova se karate.

E ka ni sasaga dina meu biuta na karate. Au saga meu lewai au vinaka. Au marau niu kila niu vakamarautaki Jiova. Ia au nanuma niu sa liumuritaki koya tiko na noqu qasenivuli ni karate. Ke dua e vuli karate tiko qai liumuritaka e dua tale, era okata qori me valavala ca e sega ni vosoti rawa. Eso era bolea mera vakamatei ira ga, mera kua ga ni vakamadualaki.

Au madua ni lai tukuna vei noqu qasenivuli na vuna au sa na biuta kina na karate. Ia au sega ni lai raici koya, keirau sega tale ni qai veitaratara, sa sega tale ga niu veitaratara kei ira keimami vuli karate vata. Au kila ni donu noqu vakatulewa meu biuta na karate. Ia e ca na lomaqu niu sega ni vakamacalataka vei ira na noqu vakabauta vou, baleta qori e gauna vinaka meu wasea kina noqu vakabauta vei ira eso tale. E vaka ga niu vakararawataki Jiova niu se bera mada ga ni qaravi koya. Na ka kece qori e vakararawataki au sara ga. E levu na gauna niu dau saga meu masu vei Jiova e dau tini ga ena tagi ni vusolo na lomaqu.

E rairai raica vei au Jiova e dua na ka vinaka, e vagolei ira na taciqu vakayalo ena ivavakoso mera mai vakayaloqaqataki au. E vakasakiti dina nodra loloma, veivakacegui kei na nodra veitokani. E vakacegui au tale ga na italanoa i Tevita kei Pacisepa ena iVolatabu. E vica na cala bibi a cakava o Tevita, ia a vosoti koya o Jiova ni veivutuni dina. Niu vakasamataka na italanoa ya, e vukei au me donu tiko ga noqu rai me baleta na noqu malumalumu.

KENA YAGA: Ni bera niu vulica na iVolatabu, au dau kauaitaki au ga, sega ni dua tale. Ia ena veivuke i Jiova kei na watiqu totoka e sa vitu qo na yabaki na neirau vakawati, au sa dau veikauaitaki vakalevu. Keirau vakalougatataki ni keirau vakavulica e levu ena iVolatabu, wili kina o ira era sotava tu na ituvaki vakaloloma. Niu raica na kena tara na lomadra eso tale na loloma i Jiova e vakamarautaki au vakalevu mai na noqu rawa ni dua na jabeni ni karate.

[Tikina bibi ena tabana e 14]

“E uqeti au dina niu vakasamataka nona rawa ni taqomaki au na Dauveibuli e vuku qai kaukaua”

[Kato/iYaloyalo ena tabana 15]

“Vinaka Vakalevu na Ulutaga Totoka Qo!”

Vakacava o marautaka nomu wilika e rua na irogo sa cavuti oti? Qo e 2 ga mai na sivia e 31 na irogo e tabaki ena Vale ni Vakatawa tekivu ena Okosita 2010. E levu na dauwiliwili era taleitaka vakalevu na ulutaga “E Veisautaka na Bula na iVolatabu.” Na cava era taleitaka kina e levu na ulutaga qori?

O ira na cavuti ena ulutaga qo e duidui na vanua era cavutu mai kina. Ni bera nira mai vulica na ka e baleti Jiova na Kalou, eso era marautaka tu na levu ni ka era rawata, ia era lecava tu na inaki dina ni bula. Eso tale era saga mera valuta na ka era bobula tu kina e veisiga, me vaka na yalototolo, vakayagataki vakasivia ni alakaolo kei na wainimategaga. E vica era vakavulici ena ka e baleti Jiova nira se gone, ia era qai vakanadakuya ena dua na gauna. Na irogo kece qori e vakaraitaka nida rawa ni veisau meda vakamarautaka na Kalou. Ke da cakava qori eda na vakila na kena yaga. Na cava era tukuna na dauwiliwili me baleta e vica na irogo qori?

Eso na irogo e tabaki ena mekesini qo e tara sara ga na lomadra eso na dauwiliwili. Kena ivakaraitaki, e vakamacalataki ena ilavelave ni 1 Epereli, 2011 na irogo i Guadalupe Villarreal me baleta nona biuta na ivukivuki vakayalewa me rawa ni qaravi Jiova. E levu na ivola era vola mai na dauwiliwili me baleta na irogo qori, raica mada qo e rua.

◼ “Na irogo me baleti Guadalupe e tarai au sara ga. E ka marautaki dina nida raica na sala e veisau kina e dua baleta ni lomani Jiova kei na nona Vosa!”—L. F.

◼ “Ena veigauna sa oti, au dau saga meu wasea noqu vakabauta vei ira tale eso, okati kina o ira na veimoceri vakamataqali vata. Ia wale ga qo, au raica niu sega ni dau kauaitaki ira seu sega sara ga ni via vosa vei ira era cakava tu na itovo qori. Au taleitaka na ulutaga qo ni vukei au meu raici ira qori ena ivakarau ni rai i Jiova—ni rawa nira qaravi koya.”—M. K.

Era taleitaka tale ga na dauwiliwili na irogo me baleti Victoria Tong, a tabaki ena ilavelave ni 1 Okosita, 2011, e vakamacalataka kina nona dau vakalolomataki ni se gone. E qaravi Jiova voli mai ena dua na gauna balavu o Victoria, ia e tukuna ni dredre me vakabauta ni lomani koya o Jiova. Sa qai vakamacalataka na cava e qai vukei koya me ciqoma ni lomani koya o Jiova. Dikeva na ka era tukuna eso era wilika na nona italanoa.

◼ “E tarai au sara ga na ka e sotava o Victoria. E levu na ka rarawa au sotava. Au dau saga e veigauna meu valuta na rai cala—dina ni sa vica vata na yabaki noqu dua na iVakadinadina. Na irogo i Victoria e uqeti au meu cakacaka sara vakaukaua meu kila kina na ka e raica vei au o Jiova.”—M. M.

◼ “Niu se gone, au dau saga meu valuta na sara iyaloyalo ca niu bobula tu kina. Ia wale ga qo au se baci rawai tale. Au qara nodratou veivuke na qase ni ivavakoso lotu vaKarisito, e vukei au sara qori meu valuta na noqu malumalumu. Eratou vakadeitaka vei au na qase ni ivavakoso ni lomani au na Kalou qai dau veivosoti. Ia eso na gauna au dau beci au, e vaka me sa na sega tu ga ni lomani au o Jiova. Noqu wilika na ka e sotava o Victoria e vukei au sara ga. Au sa qai kila qo ni gauna au nanuma kina ni na sega ni vosoti au rawa na Kalou, e vaka sara ga au tukuna tiko ni sega ni veirauti na isoro i Luvena me bokoca na noqu valavala ca. Au sa kotiva na ulutaga qo meu rawa ni wilika qai vakananuma vakatitobu ena gauna au dau yalolailai kina. Vinaka vakalevu na ulutaga totoka qo!”—L. K.