Na Cava O Vulica Vei Jisu

Ena Sala Meda Marau Kina

Ena rawati vakacava na marau?

▪ A tekivuna o Jisu na nona ivunau rogo ena vosa marau. E kaya: “Era marau o ira na kila nira gadreva na Kalou.” (Maciu 5:3) Na cava na ibalebale ni vosa i Jisu? Na cava eda gadreva kina na Kalou?

Ena gadrevi meda cegu, meda gunu, meda kana tale ga me rawa nida bula me vakataki ira ga na manumanu. Ia e dua na ka eda duidui kina vei ira na manumanu, eda gadreva na Kalou. Ni Dauveibuli, o koya ga ena vukei keda meda kila na inaki ni bula me rawa kina nida marau. A tukuna o Jisu: “E sega ni bula na tamata ena madrai wale ga, e bula ga ena vosa kece e lako mai na gusu i Jiova.” (Maciu 4:4) O ira gona era kila nira gadreva na Kalou era na marau, ni na vakavolekati ira vei Jiova na “Kalou mamarau,” qai yalataka tu e dua na ka mera marau kina​—oya na inuinui.​—1 Timoci 1:11.

Rawa vakacava ena vuku i Jisu na inuinui?

▪ “Era marau na yalomalua, nira na taukena na vuravura,” e tukuna o Jisu. (Maciu 5:5) Ni bula voli e vuravura o Jisu, na nona vakabulai ira na tauvimate kei na nona vakaturi ira na mate e dua na yavu ni nodra inuinui na lewenivanua. A tukuna tale ga e dua na ka meda vakanuinui kina. E vakamacalataka: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.” (Joni 3:16) O ira na talairawarawa vua na Kalou era na bula tawamudu e vuravura. Vakasamataka mada nida sa na bula veimaliwai kei ira na yalomalua da qai sega tale ni qase. Sa rauta me tukuna na Vosa ni Kalou: “Ni marau ena vuku ni nomuni inuinui.” (Roma 12:12) A tukuna tale ga o Jisu na sala meda marau kina ena gauna qo.

Na ivakarau ni bula marau cava a vakavulica o Jisu?

▪ A cavuta o Jisu na ivakasala yaga me baleta na veimaliwai, na vakawati, yalomalumalumu kei na rai dodonu me baleta na veika vakayago. (Maciu 5:​21-32; 6:​1-5, 19-34) O na marau ke o muria na ivakasala i Jisu.

E vakavu marau na soli ka. (Cakacaka 20:35) Me kena ivakaraitaki, a kaya o Jisu: “Ni o vakarautaka na magiti, sureti ira na dravudravua, na lokiloki, na gera, kei na mataboko. O na marau baleta ni sega vei ira na ka mera sauma vei iko.” (Luke 14:​13, 14) Era na marau o ira era veivuke ena nodra marau tale eso, era sega ni nanumi ira ga.

Na cava na ivurevure levu duadua ni marau?

▪ Eda na marau nida cakava na ka vei ira tale eso, ia eda na marau vakalevu ke da cakava na ka e vinakata na Kalou. E sega ni uasivia na marau qo, na nodrau marau na itubutubu erau lomana na luvedrau. E vakavotui vinaka qo ena dua na ka a yaco ni veivakavulici voli e matanalevu o Jisu. “E kacivaka mai e dua na yalewa ena kedra maliwa na ilala levu: ‘E kalougata na katonigone a kunekunetaki kemuni kei na sucu oni sucuma!’ Ia a kaya o Jisu: ‘Sega, era kalougata ga o ira era rogoca na vosa ni Kalou ra qai muria!’”​—Luke 11:​27, 28.

E vakila na vakacegu kei na marau o Jisu ni cakava na lomai Tamana vakalomalagi. Na inaki ni Kalou mera rogoca na inuinui ni bula tawamudu na tamata kece. A tukuna o Jisu vua e dua na tataleitaki ni vakamacalataka oti na inuinui ni bula tawamudu: “Na qau kakana meu cakava na loma i koya e talai au mai.” (Joni 4:​13, 14, 34) O na marau tale ga ke o vakamarautaki Jiova ni o tukuna na ka dina ena iVolatabu.

Me ikuri ni ivakamacala, raica na wase 1 ni ivola qo, Na Cava Sara Mada e Kaya na iVolatabu?, e tabaka na iVakadinadina i Jiova.

[iYaloyalo ena tabana e 16]

Eda na marau dina nida kila na inaki ni bula