O sa Curu ina iVakavakacegu ni Kalou?

“E bula na vosa ni Kalou qai kaukaua.”—IPER. 4:12.

1. Eda na curu vakacava nikua ina ivakavakacegu ni Kalou, na cava ena via dredre kina qori?

EDA vulica ena ulutaga sa oti ni na rawa meda curuma na ivakavakacegu ni Kalou ke da talairawarawa da qai tokona na nona inaki. De dua ena via dredre toka oya. Me kena ivakaraitaki, ena gauna eda vulica kina ni sega ni taleitaka o Jiova na ka eda dau taleitaka, na imatai ni ka eda na rairai cakava oya meda saqata. Qori e vakaraitaka ni dodonu meda vakavinakataka na noda ‘tu vakarau meda talairawarawa.’ (Jeme. 3:17) Eda na veivosakitaka ena ulutaga qo eso na ituvaki ena rawa ni vakatovolei kina na noda talairawarawa ena inaki ni Kalou mai vu ni lomada.

2, 3. Na sasaga cava meda cakava tiko ga me rawa nida talei tiko ga ena mata i Jiova?

² E dau vakacava na nomu ciqoma na ivakasala mai na iVolatabu? E tukuna na iVolatabu ni nona inaki sara ga na Kalou me kumuni ira na ka “domoni e na veimatanitu kecega.” (Akeai 2:7) Macala ga nida cakava tu e levu na ka ca ena imatai ni gauna eda vulica kina na iVolatabu. Ia na noda lomana na Kalou kei na Luvena e uqeti keda meda cakava eso na veiveisau e gadrevi ena noda ivakarau ni rai kei na noda ivalavala, meda vakamarautaki Jiova kina vakalevu. Ena noda gumatua ena masu, salavata kei na sasaga sa qai rawa meda papitaiso.—Wilika Kolosa 1:9, 10.

³ Eda se ivalavala ca tiko ga dina nida sa papitaiso, oya na vuna eda na sasaga tiko ga kina meda cakava na ka e donu. Ia ena vakalougatataka na noda sasaga o Jiova ke da sega ni soro da qai vakadeitaka meda talei cake tiko ga e matana.

Gauna e Gadrevi Kina na iVakasala

4. Na cava e tolu na sala e rawa nida ciqoma kina na ivakasala vakaivolatabu?

⁴ E bibi meda kila na noda malumalumu ni bera nida via walia. E rawa nida kila qo nida rogoca e dua na ivunau ena Kingdom Hall se dua na ulutaga vakavure vakasama ena noda mekesini. Ena so na gauna ni oti mada ga noda rogoca na ivunau kei na noda wilika na mekesini, eda rawa ni lecava ni gadrevi meda veisau. E rawa gona ni vakayagataka o Jiova e dua na tacida me vakasalataki keda vakayalololoma ena noda malumalumu.—Wilika Kalatia 6:1.

5. Tukuna eso na ka eda na rairai cakava nida vakasalataki, vakamacalataka na vuna e bibi kina vei ira na ivakatawa lotu vaKarisito mera gumatua tiko ga ni vukei keda.

⁵ Ni vakasalataki keda e dua e sega ni uasivi, ena dredre meda ciqoma ke tau mada ga vakayalololoma na ka e tukuna. Ia e vakaraitaka na Kalatia 6:1 ni o Jiova e vakaroti ira na rawata na ivakatagedegede vakayalo mera “saga” mera veivakadodonutaki “ena yalomalua.” Ke da rogoca na nodra ivakasala, eda na qai talei ga vakalevu ena mata i Jiova. E macala ga ni gauna eda masu kina, eda dau tukuna sara ga vakadodonu nida sega ni uasivi. Ia na gauna e tukuna kina e dua nida cala, eda dau saga meda vakamacalataka na vuna eda cakava kina oya se da tukuna ni sega ni ca sara na ka eda cakava. De dua eda na taroga na nona inaki se cata na ivakarau ni nona veivakasalataki. (2 Tui 5:11) Ena rawa tale ga nida cudru ke da vakasalataki ena ka sara ga eda sega ni via rogoca—na ka beka e cakava e dua na noda lewenivuvale, noda isulusulu kei na sasauni, noda savasava vakayago, se ka ni veivakamarautaki eda taleitaka, ia e cata o Jiova. Eda na rairai kurabui kina, ena rarawa tale ga o koya e vakasalataki keda. Ia ni sa malumu na noda cudru, eda dau liaca ni veiganiti ga na ivakasala oya.

6. E rawa vakacava ni vakavotuya “na nanuma kei na inaki ni lomada” na vosa ni Kalou?

⁶ E vakabibitaki ena tikinivolatabu e usutu tiko ni ulutaga qo ni vosa ni Kalou e “kaukaua.” Io e kaukaua na vosa ni Kalou me veisautaka na nodra bula eso. E vukei keda meda cakava na veiveisau e gadrevi ni bera nida papitaiso, e vukei keda tale ga ni oti na noda papitaiso. Ena nona ivola vei ira na lotu vaKarisito Iperiu, a vola tale ga o Paula ni vosa ni Kalou e “suaka me wasea na yagoda kei na lomada, na noda isema kei na uro e loma ni suida, me vakavotuya na nanuma kei na inaki ni lomada.” (Iper. 4:12) Kena ibalebale nida kila vinaka na inaki ni Kalou me baleti keda, na noda muria se sega e vakaraitaka na ka dina e tu e lomada. Vakacava, e dau duidui ena so na gauna na itovo eda dau vakaraitaka kei na ivakarau dina ni lomada? (Wilika Maciu 23:27, 28.) Vakasamataka mada na ka o na cakava ena so na ituvaki eda na veivosakitaka qo.

Toso Vata Tiko ga kei na iSoqosoqo i Jiova

7, 8. (a) Na cava era via muria tiko ga kina eso na Jiu lotu vaKarisito na Lawa a soli vei Mosese? (b) Na cava eda tukuna kina ni ka era cakava qori era sa saqata tiko kina na inaki i Jiova?

⁷ E levu vei keda eda rawa ni cavuqaqataka na ka e tukuni ena Vosa Vakaibalebale 4:18: “Na nodra sala na yalododonu sa vaka na rarama sa cila tu, sa levu cake tiko na kena rarama ka yacova na siga levu.” Kena ibalebale ni toso na gauna, sa na qai vinaka tiko ga na noda itovo kei na noda kila na inaki ni Kalou.

⁸ Me vaka eda vulica ena ulutaga sa oti, ni mate oti o Jisu, e levu na Jiu lotu vaKarisito era se via muria ga na Lawa a soli vei Mosese. (Caka. 21:20) A tukuna vakamatata o Paula ni sa sega tale ni gadrevi mera muria na lotu vaKarisito na Lawa qori, ia eso era sega ga ni ciqoma na ivakasala uqeti vakalou qori. (Kolo. 2:13-15) De dua era nanuma ke ra muria tiko ga eso na Lawa, era na galala mai na veivakacacani. Ia e matata sara tu ga na ka e tukuna o Paula vei ira na Iperiu lotu vaKarisito, ke ra saqata tiko ga na inaki ni Kalou, era na sega ni curu ina ivakavakacegu ni Kalou.a (Iper. 4:1, 2, 6; wilika Iperiu 4:11.) Me vakadonui ira na Kalou, ena vinakati mera ciqoma ni sa dua tale na ivakarau ni sokalou e vinakata vei ira o Jiova.

9. Me vakacava na noda rai ena gauna e vakamatatataki kina eso na ivakavuvuli vakaivolatabu?

⁹ Nikua, e sa veisau na noda kila eso na ivakavuvuli vakaivolatabu. Qo e sega ni dodonu meda lomaleqa kina, e dodonu ga me uqeti keda meda nuitaka na dauveiqaravi yalodina e vuku. Na gauna era kila kina o ira na matataki koya na “dauveiqaravi” ni vinakati me vakamatatataki se vakadodonutaki na noda rai ena so na tikina me baleta na ka dina, era sega ni tu suka mera cakava qori. Era sega ni kauaitaka na nodra vakalewai ena vuku ni veiveisau qori, era kauaitaka ga vakalevu na kena tokoni na inaki ni Kalou. O dau raica vakacava na kena vakamatatataki eso na ivakavuvuli vakaivolatabu eda kila tu?—Wilika Luke 5:39.

10, 11. Na cava eda vulica ena ka era cakava eso ni tukuni mera vakayagataka eso na iwalewale vou ni vunau?

¹⁰ Meda dikeva mada e dua tale na ivakaraitaki. Ena icavacava ni ika19 kei na itekitekivu ni ika20 ni senitiuri, era nanuma eso na Gonevuli ni iVolatabu era kenadau ena vosa e matanalevu, ni sala vinaka duadua mera muria kina na ivakaro me baleta na cakacaka vakavunau, oya mera vakarautaka vinaka na nodra itavi nira soli vunau e matanalevu. Era taleitaka mera vunau va qo, so tale era taleitaka na nodra dau vakacaucautaki. Ia e qai kilai e muri ni o Jiova e vinakati ira na nona tamata mera vunau nira vakayagataka eso tale na kena iwalewale, wili kina na vunau e veivale. Eso vei ira na kenadau ena vunau e matanalevu era sega ni via muria na veisau qori. Ni rogoci na ka era vunautaka e matanalevu, e nanumi ga nira dau yalodina vua na Turaga. Ia ni vakamatatataki vei ira na inaki ni Kalou me baleta na cakacaka vakavunau, e sa qai laurai dina kina na nodra rai, kei na inaki ni lomadra. E raici ira vakacava o Jiova? E sega ni vakalougatataki ira. Era biuta na nona isoqosoqo.—Maciu 10:1-6; Caka. 5:42; 20:20.

¹¹ A sega ni rawarawa vei ira na yalodina tiko ga ena isoqosoqo mera vunau. E levu era raica ni dredre qori ni se qai tekivu, ia era talairawarawa tiko ga. Toso na gauna, sa qai matau vei ira na vunau e veivale, qai vakalougatataki ira kina vakalevu o Jiova. Na cava o na cakava ke tukuni mo tovolea eso na iwalewale ni vunau o sega ni dau cakava tu? O na yalorawarawa mo tovolea e dua na kena iwalewale vou?

Ni Biuti Jiova e Dua na Wekada

12, 13. (a) Na cava e vinakata kina o Jiova mera vakasivoi o ira na sega ni veivutunitaka na nodra cala? (b) Na cava era vakatovolei kina eso na itubutubu lotu vaKarisito, na cava e rui dredre kina qori?

¹² Me rawa nida vakamarautaka na Kalou, e macala ga nida duavata ena ivakaro ni dodonu meda savasava vakayago, vakayalo, me vinaka tale ga na noda itovo. (Wilika Taito 2:14.) Ia e tiko eso na ituvaki ena vakadredretaka meda talairawarawa ena ivakaro qo. Kaya mada e dua na veiwatini lotu vaKarisito ivakaraitaki vinaka e dua ga na luvedrau tagane, e biuta na dina. E vinakata ga me “marautaka na ivalavala ca e lekaleka wale na kena kamica” mai na nona veiwekani kei Jiova kei rau na nona itubutubu, mani vakasivoi kina.—Iper. 11:25.

¹³ Erau rarawa sara ga na nona itubutubu! Erau kila na ka e tukuna na iVolatabu me baleta na veivakasivoi, oya ‘me kua na veitokani kei na dua e vakatokai me tacida e dau veidauci, se dau kocokoco, se dau qaravi matakau, se dau veivakasewasewani, se dau mateni, se dau kovea na ka, me kua mada ga na kana vata kei koya.’ (1 Kor. 5:11, 13) Erau kila tale ga ni matavosa “kei na dua” era wili tiko kina na lewenivuvale era sega ni tiko vata ga ena dua na vale. Ia erau lomani luvedrau vakalevu! Na nodrau rarawa erau na rairai nanuma kina qo: ‘Ke sa tagutuvi sara ga nodatou veimaliwai, daru na qai vukei koya vakacava me lesu vei Jiova? E yaga sara me tou veivosaki vakalevu.’b

14, 15. Na cava mera vakatulewataka sara ga na itubutubu e vakasivoi na luvedra?

¹⁴ Eda lomani rau dina na itubutubu qori. E vakatulewa o luvedrau tagane, a digia me cakava na ka e sega ni vaKarisito, a sega ni vinakata me marautaka na nona veimaliwai voleka kei na nona itubutubu kei ira na tacina vakayalo. Erau sega ni cakava rawa kina e dua na ka na nona itubutubu. Sa rauta me rau rarawa!

¹⁵ Na cava erau na cakava? Erau na muria na ivakaro matata i Jiova? Se rau na soli ulubale ni rawa ni rau veimaliwai vakalevu kei luvedrau ni veivosakitaki tiko na “ka e vauca na vuvale”? Ni rau vakatulewa, me rau nanuma tiko na rai i Jiova me baleta na ka erau sa cakava tiko. E nona inaki o Jiova me savasava tiko ga na nona isoqosoqo, ke rawa, me liaci koya tale ga o koya e caka cala. E rawa vakacava nira tokona na inaki oya na itubutubu lotu vaKarisito?

16, 17. Na cava eda vulica nida vakananuma vakatitobu na ivakaraitaki i Eroni?

¹⁶ A dua na ituvaki dredre a tu kina o Eroni ena vuku ni ka erau cakava na luvena tagane. Vakasamataka mada na ka ena vakila ena nodrau vakacabora na luvena, o Netapi kei Epaiu na isoro a sega ni vakadonuya o Jiova, qai vakamatei rau kina. E macala ga ni rau sa na sega ni veimaliwai tale kei na nodrau itubutubu. Ia e sega ni o koya ga qori, o Jiova a vakaroti Eroni kei ratou na luvena yalodina: “Dou kakua ni luvata nai sala mai na ulumudou, kakua talega ni dresulaka na nomudoui sulu; de dou mate, de yaco talega na cudru vei ira kecega na tamata.” (Vunau 10:1-6) E matata na ivakaro qori, ni dodonu meda lomani Jiova vakalevu mai na noda lomani ira na noda lewenivuvale era sega ni yalodina vua.

¹⁷ Nikua, o Jiova e sega ni vakamatei ira na caka ca ena gauna ga era cakava kina. E lomani ira o Jiova qai solia na gauna mera veisautaka nodra ivalavala. Ia ena vakacava na rai i Jiova ke ra beca na nona ivakaro na itubutubu ena nodra veimaliwai tiko vakaveitalia kei na luvedra e sivo?

18, 19. Ke ra muria tiko ga na lewenivuvale na ivakaro i Jiova me baleti ira na sivo, na cava e rawa nira vakalougatataki kina?

¹⁸ Era tukuna e levu era sivo ena dua na gauna, ni nodra yalodina na nodra itokani kei na wekadra e vukei ira mera lesu ina ivavakoso. Ena nodra vakatututaka na qase me vakalesui mai e dua na goneyalewa, era vola kina ni dua tale ga na vuna sa veisautaka kina nona bula “baleta ni a muria o ganena na ituvatuva e baleti ira na sivo.” A tukuna ni “nona yalodina o ganena me muria na idusidusi vakaivolatabu a uqeti koya me lesu tale ina ivavakoso.”

¹⁹ Na cava eda vulica kina? Bibi meda valuta na kena dau malele na lomada e veivakaisini me beca na ivakasala vakaivolatabu. E dodonu meda vakabauta dei ni dau vinaka tu ga na ivakasala i Jiova me wali kina na noda leqa.

“E Bula na Vosa ni Kalou”

20. Na cava e rua na ka e rawa ni vakaibalebaletaki ena Iperiu 4:12? (Raica na ivakamacala e ra.)

²⁰ Ena gauna a vola kina o Paula ni “bula na vosa ni Kalou,” e sega ni vakaibalebaletaka wale ga na iVolatabu.c Ena tikina wavolita ni wase oya e tukuni kina na ka e yalataka na Kalou. E vakabibitaka tiko eke o Paula ni dau dina na Kalou ena nona yalayala. E vakadeitaka qo o Jiova ena ka e qai tukuna na parofita o Aisea: “Na noqu vosa . . . ena sega ni lesu tale wale vei au, ena vakayacora . . . na ka ka’u a tala kina.” (Aisea 55:11) Koya gona, e vinaka meda dau vosovoso ke sega ni yaco totolo na ka eda vinakata. E “cakacaka tiko ga” o Jiova me vakacavara vinaka na nona inaki.—Joni 5:17.

21. E veivakayaloqaqataki vakacava na Iperiu 4:12 vei ira na itabaqase yalodina era lewe ni “isoqosoqo levu”?

²¹ E levu vei ira na itabaqase yalodina era lewe ni “isoqosoqo levu,” era sa qaravi Jiova tu mai me vicasagavulu na yabaki. (Vkta. 7:9) Era sega ni namaka e levu mera na bula vaqase ena ituvaki qo, ia era sega ni yalolailai kina. (Same 92:14) Era kila ni sega ni ka wale na ka e yalataka tu na vosa ni Kalou, ena yaco dina, qai cakacaka tiko ga o Jiova ena kena vakayacori. E raica vakabibi o Jiova na vakayacori ni nona inaki, e vakamarautaki koya nida vakasamataka dei qori. E se vakacegu tiko ga o Jiova ena loma ni ikavitu ni siga qo, e vakadeitaka ni na vakayacori na nona inaki, era na tokona tale ga vakailawalawa na nona tamata. Vakacava o iko? O sa curu ina ivakavakacegu ni Kalou?

[iVakamacala e ra]

O se Nanuma Tiko?

• Na cava e vinakati meda curu kina ena ivakavakacegu ni Kalou nikua?

• E rau veisemati vakacava na inaki ni Kalou kei na noda yalorawarawa ni ciqoma na ivakasala vakaivolatabu?

• Na ituvaki cava soti ena via dredre kina meda talairawarawa ina ivakasala vakaivolatabu, ia na cava e bibi kina meda dau talairawarawa?

• Na cava e rua na ka e rawa ni vakaibalebaletaki ena Iperiu 4:12?

[iYaloyalo ena tabana e 31]

Erau rarawa vakalevu na itubutubu!