Toro Voleka Vua na Kalou
“Ka’u na Sega ni Guilecavi Iko”
E KAUAITAKI ira dina na nona tamata o Jiova? Ke dina qori, e vakacava sara mada na levu ni nona kauaitaki ira? Eda rawa ni kila na isau ni taro qori ena ka sara ga e tukuna na Kalou. E vakamatatataka ena iVolatabu na nona rai me baleti keda. Meda raica mada na ka e tukuni ena Aisea 49:15.
Me vakaraitaka na levu ni nona kauaitaki ira na nona tamata, e gusui Jiova o Aisea ni vakayagataka na kena ivakaraitaki totoka duadua eda rawa ni vakasamataka. E tekivu ena taro vakavure vakasama qo: “E dua li na yalewa me na guilecava na luvena sa sucu, me kua ni lomana na luve ni ketena?” Nida wilika ga na taro qori, sa rawa nida kila na kena isau. Ena sega ni rawa ni guilecava na luvena e dua na tina. Ni vakararavi vua o gone ena siga kei na bogi qai vakaraitaka vei tina ni vinakata e dua na ka. Ia eso tale na ka e okati ena taro i Jiova.
Na cava e mea kina na luvena o tina qai cakava na ka kece e vinakata? Me vakadula beka ga na luvena? Sega. E kena ivakarau ga me lomana o tina “na luve ni ketena.” Na vosa vakaIperiu e vakadewataki me “lomana” e tukuni tale ga me “yalololoma.” (Lako Yani 33:19; Aisea 54:10) Na vosa vakaIperiu qori e rawa ni okati kina na kena vakaraitaki na yalololoma vei ira era gadreva na veivuke se o ira era vakaloloma. Na nona lomani luvena o tina e ivau kaukaua duadua eda bau kila.
Ka ni rarawa ni so na tina era sega ni lomani luvedra nira via sucu. E kaya o Jiova: ‘Era na rawa ni guilecava na tina.’ E levu na tagane kei na yalewa nikua ‘era sega ni yalodina, qai yali na nodra veilomani vakaveiwekani.’ (2 Timoci 3:1-5) Eda rogoca ena so na gauna nira dau vakawalena, vakalolomataka se biuta na luvedra se qai sucu na tina. E vakamacalataka e dua na ivoladusidusi ni iVolatabu me baleta na Aisea 49:15: “Era ivalavala ca na tina, so na gauna e vakaseva na nodra loloma na gagadre ca. Na loloma uasivi duadua mada ga ni tamata e rawa ni seva.”
“Ia” e vakadeitaka vei keda o Jiova: “Koi au ka’u na sega ni guilecavi iko.” Sa qai matata qo na vuna e cavuta kina o Jiova na taro ena Aisea 49:15. E vakamacalataka tiko e keri o Jiova ni nona yalololoma e uasivia na nona yalololoma e dua na tina ivalavala ca. Era rawa ni sega ni vakaraitaka na yalololoma vei luvedra se qai sucu na tina ivalavala ca, ia o Jiova ena yalololoma tiko ga vei ira na nona tamata era gadreva na veivuke. Sa rauta me vakamacalataka na ivoladusidusi e tukuni mai cake me baleta na Aisea 49:15: “Qo na ivakaraitaki uasivi duadua ni loloma i Jiova ena Veiyalayalati Makawa.”
Na noda kila “na loloma levu ni noda Kalou” e veivakacegui dina. (Luke 1:78) O na via vulica na sala mo toro voleka kina vei Jiova? E yalataka na Kalou dauloloma qori vei ira na nona tamata: “Au na sega sara ni biuti iko se vakanadakui iko.”—Iperiu 13:5.
Wili iVolatabu e Vakatututaki ena Feperueri: