Nona Vakaturi o Jisu—A Yaco Dina?

O HERODOTUS, e dua na daunitukutuku makawa ni Kirisi a bula ena 2,500 na yabaki sa oti, a talanoataki ira na kai Ijipita era bula ena nona gauna. A vola: “Ni oti na nodra kana magiti na vutuniyau, a kauta wavoki e dua na turaga e dua na yagonimate matakau e tu ena loma ni kisi, e boro qai ceuti me vaka sara ga na yagonimate dina, e rauta e dua na mita na kena balavu. A vakaraitaka vei ira kece na tu e kea qai kaya, ‘Ni gunu ni marau, baleta na gauna oni na mate kina oni na va sara ga qo.’”

E sega wale ga ni o ira na kai Ijipita e va qori na nodra rai me baleta na bula kei na mate. E takalevu tale ga nikua na ivosavosa “Kana, gunu qai marau.” Ke itinitini ni bula na mate, vakacava meda marautaka sara ga qo na bula? Na cava eda saga tiko kina meda caka vinaka? Koya gona, ke itinitini ni ka kece na mate, ena vinaka meda marautaka sara ga qo na bula. E tukuna tale ga qori na yapositolo o Paula. A vakamacalataka na nodra ivakarau ni rai o ira era sega ni vakabauta na veivakaturi, ena nona kaya: “Ke ra na sega ni vakaturi na mate, meda kana ga, da gunu, nida na mate nimataka.”—1 Korinica 15:32.

Ia a sega ni vakabauta o Paula nira na guilecavi vakadua na mate. A vakadeitaka ga nira rawa ni bula tale, ra qai nuitaka na bula tawamudu. Na ka e vakadeitaka qori o Paula e yavutaki ena dua na ka a yaco dina, e bibi tale ga vei keda—na nona vakaturia o Karisito Jisu. Qori na ituvaki duadua ga e vakaukauataka na nodra vakabauta na tisaipeli taumada.

Ia e yaga vakacava vei keda na nona vakaturi o Jisu? Eda kila vakacava ni a yaco dina? Meda dikeva mada se a vakamacalataka vakacava qori o Paula ena nona ivola vei ira na lotu vaKarisito mai Korinica.

CAVA ENA YACO KE SEGA NI VAKATURI O KARISITO?

Eso na lotu vaKarisito mai Korinica makawa era lomatarotarotaka na tikina qori, eso mada ga era sega ni vakabauta ni a yaco dina na veivakaturi. Ena imatai ni nona ivola vei ira na lotu vaKarisito e kea, a vola kina o Paula na ka ena yaco ke a sega ni yaco dina na veivakaturi. A vola: “Ke ra sega dina ni vakaturi na mate, kena ibalebale ni sega ni vakaturi na Karisito. Ia ke sega ni vakaturi na Karisito, e sa tawayaga na noda vunau, e sa tawayaga tale ga na noda vakabauta. Kena ikuri, . . . eda sa na wili tale ga meda ivakadinadina lasu ni Kalou, . . . e sa tawayaga na nomuni vakabauta; oni se okati tiko ga moni valavala ca. O ira tale ga na tisaipeli i Karisito era mate tu era sa na yali yani vakadua.”—1 Korinica 15:13-18.

“Sa qai rairai vei ira na limanadrau vakacaca na veitacini ena dua ga na gauna . . . Oti ya sa qai rairai vei Jemesa, tarava sara vei iratou kece na yapositolo. Kena iotioti, nona rairai tale ga vei au.”—1 Korinica 15:6-8

E matata sara tu ga na ka e tukuna o Paula ena itekitekivu ni nona ivola: Ke ra sega dina ni vakaturi na mate, ena sega tale ga ni vakaturi na Karisito. Na cava gona ena yaco ke sega ni vakaturi na Karisito? Ena tawayaga qai lasutaki na vunautaki ni itukutuku vinaka. Kuria qori, na nona vakaturi o Karisito e dua na ivakavuvuli bibi ni vakabauta vaKarisito, e sema tale tiko ga ina so na yavu ni ivakavuvuli vakaivolatabu me baleta na veiliutaki cecere ni Kalou, na yacana, nona Matanitu kei na noda vakabulai. Ke sega ni yaco dina na veivakaturi, ena tawayaga na nona vunau o Paula kei na so tale na yapositolo.

Ke sega tale ga ni vakaturi na Karisito, ena tawayaga na nodra vakabauta na lotu vaKarisito, sega na kena ivakadinadina qai yavutaki ena lasu. Kuria qori, ena sega wale ga ni lasu na itukutuku ni nona vakaturi o Jisu a vunautaka o Paula kei ira tale eso, ena lasu tale ga na ka eratou vunautaka me baleta na Kalou o Jiova, o koya a vakaturi Jisu. Ena sega tale ga ni dina na kena tukuni ni a mate na Karisito “ena vuku ni noda ivalavala ca”—ke sega ni vakabulai mai na mate na iVakabula, ena sega ni rawa ni vakabulai ira eso tale. (1 Korinica 15:3) Kena ibalebale ni o ira na lotu vaKarisito era mate, so vei ira ena vuku ni nodra vakabauta, era vakanuinui mate wale nira na vakaturi.

Sa rauta me tukuna o Paula: “Ke da vakanuinui tiko vei Karisito ena bula ga qo, eda sa qai tamata vakaloloma dina.” (1 Korinica 15:19) A rarawa tale ga o Paula me vakataki ira eso na lotu vaKarisito ena gauna a mate kina e dua na wekana, a vakacacani, vosota na veika dredre, voleka ni vakamatei baleta ni vakabauta na veivakaturi kei na sala ena vakayacori kina. Ena tawayaga kece qori ke sega ni dina na veivakaturi!

VUNA MO VAKABAUTA KINA

E sega ni vakabauta o Paula ni lasutaki na ka era vakabauta na lotu vaKarisito. E kila o koya ni a vakaturi dina o Jisu, qai vakadinadinataka qori vei ira na lotu vaKarisito mai Korinica, ena nona kaya, “ni mate na Karisito ena vuku ni noda ivalavala ca me vaka e kaya na iVolatabu; e bulu qai vakaturi ena ikatolu ni siga me vaka e kaya na iVolatabu; e rairai vei Kifa qai tarava vei iratou na le tinikarua.”b E tomana: “Oti ya sa qai rairai vei ira na limanadrau vakacaca na veitacini ena dua ga na gauna, e levu vei ira ya era se bula tiko qo, ia eso era sa mate. Oti ya sa qai rairai vei Jemesa, tarava sara vei iratou kece na yapositolo. Kena iotioti, nona rairai tale ga vei au.”—1 Korinica 15:3-8.

A tekivuna o Paula na nona ivola ena nona cavuta ena nuidei ni mai mate na Karisito ena vuku ni noda ivalavala ca, mani bulu, qai vakaturi. A vakadeitaka vakacava o Paula ni dina qori? A vakadeitaka mai na ka era tukuna e levu na ivakadinadina. Ni sa vakaturi o Jisu, eso era vakadinadinataka sara ga qori (okati kina o Paula), a rairai tale ga ina dua na ilawalawa lailai, vei ira mada ga na le 500. E levu vei ira qori era vakatitiqataka ena imatai ni gauna na itukutuku ni nona vakaturi o Jisu! (Luke 24:1-11) E levu vei ira era vakadinadinataka na ka a yaco era se bula tiko ena gauna i Paula, era rawa ni vakamacalataka na ka era raica. (1 Korinica 15:6) E rawa ni vakacalai e dua se rua na ivakadinadina, ia e sega ni rawa ni vakacalai e le 500 se sivia.

Dikeva tale ga ni a cavuta vakarua o Paula “me vaka e kaya na iVolatabu” ena gauna e vakamacalataka kina na nona mate, bulu, kei na nona vakaturi o Jisu. Na ituvaki qori e vakadeitaka ni yaco dina na parofisai e volai ena iVolatabu vakaIperiu me baleta na Mesaia, e vakadinadinataka ni o Jisu ga na Mesaia yalataki.

Ia eso era se vakatitiqataka tiko ga na nona vakaturi o Jisu, dina ga ni levu era vakadinadinataka, qai volai tu ena iVolatabu. So era kaya ni ratou butakoca na yagoi Jisu na nona tisaipeli, ratou qai kaya ni ratou a vakadinadinataka na nona vakaturi. Ia e sega vei ratou na tisaipeli na kaukaua meratou cemuri ratou na sotia ni Roma eratou yadrava tiko na ibulubulu. So tale era tukuna ni tatadra wale ga nona rairai o Jisu vei ira na tamata. Ia e lasu qori, baleta ni duidui na gauna a rairai kina o Jisu vei ira na tamata.

Ia eso era se kaya ga nira lawakitaka na tisaipeli na veivakaturi. Ia na cava na kena na yaga ke ra lawaki? Nira vunautaka na tisaipeli na nona vakaturi o Jisu era vakalialiai, era vakacacani, ra qai vakamatei. Na cava mera bolemate kina ke ra kila ni lasu na veivakaturi? Kena ikuri, era vunautaka sara ga e liu vei ira na dauveitusaqati e Jerusalemi, ni o ira qori era vinakata tu mera vakacalai na tisaipeli, me rawa nira bala kina i valeniveivesu.

Nira vakabauta na tisaipeli na veivakaturi, e uqeti ira mera doudou ni vunautaka na veika me baleta na Turaga, dina nira vakacacani vakaukaua. E yavu tale ga ni nodra vakabauta na lotu vaKarisito na veivakaturi. Era sega ni bolemate na lotu vaKarisito taumada mera vunautaka wale ga na kena itukutuku e dua na qasenivuli vuku a labati. Ia era bolemate ni vunautaka na nona vakaturi o Jisu baleta qori e vakadinadinataka ni o koya na Karisito, e Luve ni Kalou, e dua na ka bula kaukaua e tokoni ira tiko qai dusimaki ira. Nona vakaturi o Karisito era vakabauta kina nira na vakaturi tale ga. Koya gona, ke sega ni vakaturi o Jisu, ena sega ni tauyavu na lotu Vakarisito, eda na rairai sega tale ga ni kilai Jisu.

E yaga vakacava vei keda ena gauna qo na nona vakaturi o Karisito?