E Rawa ni Vakainaki na Bula?

E DINA sara ga qori! E lomoci tu o vuravura ena levu na “leqa kei na rarawa.” De dua o na lomatarotarotaka, ‘E rawa beka ni vakainaki na bula ena gauna qo?’

Dikeva mada na ivakaraitaki i Maria. E marama daucakacaka, ia qo sa yabaki 84, sa tu ga vakadua i vale. Se vinaka tu na nona vakasama, ia sa malumalumu ga na yagona. Vakacava e nanuma o koya ni vakainaki na nona bula?

Vakacava o iko? De dua o lomatarotarotaka tale ga ke vakainaki na nomu bula. E rairai dua tu ga na ivakarau ni nomu cakacaka, e veivakaocai, qai vakavucesa. Era na rairai sega ni kauaitaka e levu na nomu sasaga se na nomu cakacaka. Ke vinaka mada ga na nomu bula ena gauna qo, o na rairai leqataka ga na nomu bula ena veigauna se bera mai. Ena so na gauna o na galili se lomabibi. De dua e yaco vakalevu i vale na veiba kei na veivala, se takali e dua na wekamu voleka. Kena ivakaraitaki, e dua na turaga o André a tauvimate vakasauri o tamana mani mate sara. Ni rau dauveivolekati, dua na ka na nona rarawa o André, a nanuma tale ga ni na sega ni marau tale.

Se mani vakacava na leqa eda sotava, e bibi meda kila na isaunitaro qo: E rawa beka ni vakainaki na bula? Eda na kila na kena isau nida vulica na ivakarau ni nona bula e dua na turaga a bula ena rauta na 2,000 na yabaki sa oti​—o Jisu Karisito. E vakainaki na nona bula dina ga ni sotava na veika dredre. Ena vakainaki tale ga na noda bula, ke da muria na nona ivakaraitaki.