Me Vakainaki na Bula—Vuli Vei Jisu

EDA sa dikeva ena ulutaga sa oti ni a vakainaki na bula i Jisu. Ke da vinakata tale ga me vakainaki na noda bula, meda vakatotomuria na nona ivakaraitaki da qai muria na nona ivakasala.

E uqeti keda mada ga o Jiova meda cakava qori, me vaka e tukuni ena tikinivolatabu e cake. Na noda bula me vaka na ivakarau ni bula i Jisu, e kena ibalebale qori me laurai sara ga ena noda bula nida muria na nona ivakaraitaki kei na nona ivakavuvuli. Nida cakava qori ena vakadonui keda na Kalou, ena vakainaki tale ga na noda bula.

Eso na ka e vakavuvulitaka o Jisu ena vukei keda meda vakatotomuria na nona ivakarau ni bula. Eda na raica e vica na ivakavuvuli qori ena nona iVunau rogo ena Ulunivanua. Meda dikeva mada e vica da qai raica na sala meda bulataka kina.

IVAKAVUVULI: “Era marau o ira na kila nira gadreva na Kalou.”​—Maciu 5:3.

YAGA NI IVAKAVUVULI QORI ME VAKAINAKI KINA NA BULA:

E tukuna o Jisu nida buli meda gadreva na Kalou. Qo eso na taro eda vinakata tu meda kila na kena isau: Na cava eda bula kina i vuravura? Na cava eda sotava kina e levu na ka rarawa? E kauaitaki keda na Kalou? Eda bula tale tiko nida mate? E bibi meda kila na isaunitaro qori me rawa ni vakainaki na noda bula. E kila o Jisu ni Vosa ni Kalou duadua ga ena vakarautaka vei keda na isaunitaro dodonu. Ni masu gona vei Tamana, e kaya o Jisu: “E dina na nomuni vosa.” (Joni 17:17) Vakacava e rawa ni dusimaki keda na iVolatabu meda kila na Kalou da qai marau?

IVAKARAITAKI DINA:

E lagalaga tiko ena dua na matasere kilai levu o Esa, e vinakata tale ga me rogo ena buturara ni ivakatagi. Ia a sega ni marau. E kaya: “Au taleitaka na noqu lewena na matasere, ia e sega ni vakainaki na noqu bula.” Toso na gauna, a qai sotava e dua na iVakadinadina i Jiova. E kaya o Esa: “Au tarogi koya ena levu na taro. Au kurabuitaka sara ga ni sauma kece noqu taro ena iVolatabu, au mani kerei koya me vakavulici au ena iVolatabu.” E tarai Esa sara ga na ka e vulica, qai uqeti koya me yalataka na nona bula vei Jiova. E kaya: “Ena veigauna sa oti e veilecayaki tu na noqu bula, au sotava kina e levu na leqa. Ia qo sa qai vakainaki na noqu bula.”a

IVAKAVUVULI: “Era marau na dau loloma.” ​—Maciu 5:7.

YAGA NI IVAKAVUVULI QORI ME VAKAINAKI KINA NA BULA:

Nida dauloloma eda na veikauaitaki, yalovinaka, eda na veinanumi tale ga. A lomani ira na vakaloloma o Jisu. Na nona lomani ira tale ga era rarawa tu, e uqeti koya me vakacegui ira. (Maciu 14:14; 20:​30-34) Nida vakatotomuria na nona dauloloma o Jisu ena vakainaki kina na noda bula. O ira tale ga na dauloloma era na marau. (Cakacaka 20:35) Eda na vakaraitaka nida dauloloma nida vosa vakayalovinaka, caka vinaka, da qai vakacegui ira era gadreva na veivuke. Vakacava ena vakainaki na noda bula ke da dauloloma?

IVAKARAITAKI DINA:

Erau ivakaraitaki vinaka dina o Maria kei na watina o Carlos ena nodrau dauloloma. Sa vica na yabaki nona dawai voli o tamai Maria, qai davo tu ga e vale ni dau tautauvimate. Erau kauti koya o Maria kei Carlos ena nodrau vale, me rau lai qaravi koya kina. Levu na gauna erau sega ni moce vinaka, rau dau cicivaki koya tale ga e valenibula ni bibi na nona mate ni suka. Erau kaya ni rau dau wawale sara ga ena so na gauna. Ia me vaka ga e tukuna o Jisu erau marau ni rau sa qarava tiko na veika e gadreva o tamai Maria.

IVAKAVUVULI: “Era marau o ira era guta na bula veiyaloni.”​—Maciu 5:9.

YAGA NI IVAKAVUVULI QORI ME VAKAINAKI KINA NA BULA:

E rawa vakacava ni vakainaki na noda bula ke da dau veiyaloni? Eda na veimaliwai vinaka kina kei ira eso tale. E bibi meda vakasamataka na ivakavuvuli ena iVolatabu: “Saga moni veiyaloni kei ira na tamata kece.” (Roma 12:18) “Na tamata kece” e vakaibalebaletaki ira na noda lewenivuvale kei na so tale eda sega ni vakabauta vata. Vakacava ena rawa ni vakainaki na noda bula ke da saga tiko ga meda veiyaloni kei ira na “tamata kece”?

IVAKARAITAKI DINA:

Meda raica mada na nona ivakaraitaki e dua na marama o Nair. E levu na ituvaki a sotava ena vica na yabaki sa oti e vakadredretaka sara ga nona dau saga me veiyaloni, vakabibi ena loma sara ga ni nona vuvale. Sa rauta e 15 na yabaki na nodrau veibiu kei watina, mani susugi ratou duadua na luvena. Ia e dau vakayagataka na wainimategaga e dua na luvena tagane, qai dau vakarerei rau na veitinani. E tukuna o Nair ni uqeti koya na ka e vulica mai na iVolatabu me saga tiko ga na veiyaloni, ena gauna dredre mada ga va qori. E saga me kua ni dau veiba se veivala, ia me yalovinaka, yalololoma, qai veikauaitaki. (Efeso 4:​31, 32) Na nona dau saga gona me veiyaloni, e veimaliwai vinaka kina kei na nona vuvale kei ira tale eso.

VAKASAMATAKA NA KA ENA VAKARAU YACO

Nida muria na ivakasala vuku i Jisu, eda na marau, eda na lomavakacegu tale ga. Ia me vakainaki dina na noda bula, e bibi meda kila tale ga na veika sa na vakarau yaco. E rawa vakacava ni vakainaki na bula nida kila nida na qase, tauvimate da qai mate? Qori na ka eda sotava tiko ena vuravura qo.

Ia rogoca mada qo e dua na itukutuku vinaka! O Jiova ena vakalougatataki ira vakalevu era saga mera “bula me vaka na ivakarau ni bula i Jisu.” E yalataka o Jiova ni na vakarau kauta mai e dua na vuravura vou ni yalododonu, mera bula kina na kawatamata yalododonu me vaka na nona inaki taumada​—oya mera bula uasivi qai tawamudu. E tukuna na nona Vosa: “Raica! E sa tiko vei ira na tamata na vale ni Kalou, ena tiko vata kei ira o koya, era na nona tamata. Na Kalou sara ga ena tiko vata kei ira. Ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.”​—Vakatakila 21:​3, 4.

E rai vakanamata o Maria, na marama e yabaki 84 e cavuti ena imatai ni ulutaga, ena kena vakayacori na vosa ni yalayala qori. Vakacava o iko? O via kila e levu tale na ka me baleta “na bula dina” ena vakilai ni sa veiliutaki na Matanitu ni Kalou? (1 Timoci 6:19) Ke vaka kina, o rawa ni taroga e dua na iVakadinadina i Jiova se volavola vei ira na vakarautaka na mekesini qo.b