“Voravora na Noqu iTovo”

NOQU BULA E LIU:

Au susu ena dua na yasayasa e sega ni vakatorocaketaki, volekata na vanua e dau kele kina na waqa ena siti o Turku. A jabeni tu ni veivacu o Tamaqu, keirau muria tale ga kei taciqu na we ni yavana. Au dau veivacu nira bolei au na gone e koronivuli. Niu sa itabagone au lewena e dua na ilawalawa e kilai levu ena vakacaca, au mani vakayacora e levu na ivalavala kaukaua. Au dau taleitaka na ivakatagi karakaravisa, au vinakata tale ga meu rogo ena buturara ni ivakatagi.

Au volia eso na dramu ni qiriqiri, tauyavutaka e dua na matasere, au lagalaga tale ga kina. Au dausolivukivuki ni keitou veivakamarautaki tiko ena buturara. E levu era taleitaka na neitou matasere ni karakaravisa na kena ivakatagi qai duatani na keitou irairai. Levu tale ga era dau mai rogoca neitou lagasere, caka sara kina e vica na neitou katokatoni, qai levu era taleitaka na kena iotioti. Ena icavacava ni veiyabaki ni 1980, a dua na neitou koniseti e Merika. Keitou lagasere vakavica e Niu Yoka kei Los Angeles, keitou veikilai kina kei na so na kenadau ena buturara ni ivakatagi ni bera ni keitou lesu i Finiladi.

Au taleitaka na noqu lewena na matasere, ia e sega ni vakainaki na noqu bula. Au sega ni marautaka na veidabui e caka tu ena bisinisi ni ivakatagi. Au sega tale ga ni taleitaka na ivakarau ni noqu bula niu dau vaqitoqito tu ga. Au nanuma niu na lai kama i eli baleta niu tamata ca. Au mani qara ivakasala ena levu na ivola ni lotu. Au kila niu na sega ni vakamarautaka rawa na Kalou, ia au dau masuta vagumatua na nona veivuke.

VEISAUTAKI AU NA IVOLATABU:

Au cakacaka ena positovesi ena noqu yasayasa meu qaravi au kina. Dua na siga au sotava e dua na iVakadinadina i Jiova keirau cakacaka vata. Au tarogi koya ena levu na taro. Au kurabuitaka sara ga ni sauma kece noqu taro ena iVolatabu, au mani kerei koya me vakavulici au ena iVolatabu. Ni oti ga e dua na macawa na noqu vuli iVolatabu tiko, a soli ena neitou matasere e dua na konitaraki ni katokatoni saulevu, me qai sevutaki i Merika. Au nanuma ni sa neitou madigi sara ga qori.

Au tukuna vua na iVakadinadina e vakavulici au ena iVolatabu ni iotioti ga ni noqu katokatoni ya, oti au na qai raica vakabibi na ka au vulica tiko. A sega ni saqata na ka au tukuna vua, ia a kerea ga meu wilika na vosa i Jisu ena Maciu 6:24. E kaya: “E sega ni dua e rawa ni qarava e rua na turaga.” Au kurabui sara ga ena gauna au kila kina na ibalebale ni vosa qori. Oti ga e vica na siga, a kidacala tale noqu qasenivuli niu tukuna vua niu sa biuta na neitou matasere niu via muri Jisu.

Au raica ni iVolatabu e vaka na iloilo e vakavotuya na noqu malumalumu. (Jemesa 1:​22-25) E voravora na noqu itovo, au dokadoka, au sega tale ga ni lomavakacegu. Au dau vosavosa ca, veivacu, vakatavako, qai dau gunu ni vaqara mateni. Au rarawataka tale ga niu kila ni veisaqasaqa na noqu ivakarau ni bula kei na ivakavuvuli vakaivolatabu. Ia au saga ga meu veisau, dina ni sega ni rawarawa.​—Efeso 4:​22-24.

Au dau rarawataka na cala au cakava ena veigauna sa oti. Ia a vukei au vakalevu na iVakadinadina e vakavulici au ena iVolatabu. E vakaraitaka vei au na Aisea 1:18: “Ke sa vaka na ka kulakula na nomudoui valavala ca, sa na vulavula me vaka na uca-vulavula.” Na noqu wilika na tikinivolatabu qori kei na so tale, au raica kina ni dauloloma na Tamada vakalomalagi, e vinakata me vakacegui ira era veivutunitaka na nodra cala.

Na noqu veivolekati kei Jiova e uqeti au meu yalataka na noqu bula vua. (Same 40:8) Au mani papitaiso ena 1992 ena nodra soqo cokovata ni veimatanitu na iVakadinadina i Jiova a vakayacori mai St. Petersburg, e Rusia.

KENA YAGA:

Sa levu na noqu itokani vinaka era qaravi Jiova. Keimami dau soqovata ena so na gauna me keimami marautaka eso na ivakatagi rakorako, ni qori e isolisoli ni Kalou. (Jemesa 1:17) Dua na veivakalougatataki levu au sotava oya niu vakamautaki Kristina na noqu daulomani. E levu na ka keirau marautaka vata, keirau sotava vata e levu na veika dredre. Au dau wasea tale ga vua na veika au dau leqataka.

Keu sega ni dua na iVakadinadina i Jiova, au sa rairai mate ena gauna qo. Ena veigauna sa oti e veilecayaki tu na noqu bula, au sotava kina e levu na leqa. Ia qo sa qai vinaka na noqu bula.