“Dou Kerekere Tiko ga, ena Qai Soli Vei Kemudou”

“Turaga, vakavulici keitou mada me keitou kila na ivakarau ni masu.” (Luke 11:1) Qori na ka a kerei Jisu kina e dua vei ratou na nona tisaipeli. A qai sauma o Jisu ena rua na vosa vakatautauvata. Na vosa vakatautauvata qori ena vakavulici keda ena ivakarau ni masu e rogoca na Kalou. Ke o dau vakataroga tu se rogoca na Kalou na nomu masu, e vinaka mo dikeva na ka e tukuna o Jisu.​—Wilika Luke 11:​5-13.

Na imatai ni vosa vakatautauvata e baleti koya e masu. (Luke 11:​5-8) E talanoataki kina na nona gole e dua na vulagi vua na nona itokani ena lomalomanibogi qai sega ni dua na kakana me vakarautaki vua. E vinakata sara ga vakatotolo na itaukeinivale na kakana me vakacegui kina na nona vulagi. A qai gole vua e dua na nona itokani me lai kerea eso na madrai, dina ni sa bogilevu. A bese ni via duri na nona itokani ni ratou sa moce na nona vuvale. Ia a cikevi koya tiko ga, mani solia na nona itokani eso na kakana.a

Na cava eda vulica ena vosa vakatautauvata i Jisu me baleta na masu? E vakaraitaka vei keda o Jisu ni gadrevi meda sasaga tiko ga​—kerekere tiko ga, vaqaqara tiko ga, tukituki tiko ga. (Luke 11:​9, 10) Na cava na vuna? E tukuna tiko beka o Jisu ni Kalou e sega ni daurogo masu? Sega. E vakaibalebaletaka ga ni Kalou e sega ni vakataki koya na itokani a vakabesebese, ia e vinakata sara ga me sauma na nodra kerekere o ira era masuti koya ena vakabauta. Ena laurai na vakabauta qori ke da sasaga tiko ga. Na noda kerekere tiko ga, e vakaraitaka nida gadreva dina na ka eda kerea, eda vakabauta tale ga ni na solia na Kalou ke salavata kei na nona inaki.​—Marika 11:24; 1 Joni 5:14.

Na ikarua ni vosa vakatautauvata e baleti Jiova na ‘Daurogo masu.’ (Same 65:2) A taroga o Jisu: “O cei na tama e kere ika vua o luvena qai solia vua na gata me isosomi ni ika? Se kere yaloka, ena solia vua na batibasaga?” E macala ga ni na sega ni solia na tama dauloloma vei luvena na ka e rawa ni vakamavoataki koya. A qai vakamacalataka o Jisu na ibalebale ni vosa vakatautauvata qori: Ke sa rawa vei ira na tama ivalavala ca mera “solia na ka vinaka” vei ira na luvedra, “sa na qai wacava na Tamada vakalomalagi ni na solia na yalo tabu”​—na isolisoli vinaka duadua​—vei ira na luvena e vuravura era kerekere vua!b​—Luke 11:​11-13; Maciu 7:11.

Na cava eda vulica mai na vosa vakatautauvata qo me baleti Jiova na ‘Daurogo masu’? E tukuna tiko vei keda o Jisu meda raici Jiova me vaka e dua na Tama dauloloma e vinakata me solia vei ira na luvena na veika era gadreva. O ira gona na sokaloutaki Jiova era rawa ni talaucaka na lomadra vua, ena gauna cava ga era vinakata. Nodra kila ni o Jiova e vinakata me solia vei ira na veika vinaka, era na ciqoma kina na veika e vakarautaka, ke sega mada ga ni salavata kei na ka era namaka.c