SAUMI NA TARO VAKAIVOLATABU

O rawa ni kila vinaka na iVolatabu?

Na iVolatabu e Vosa ni Kalou. E vaka ga na nona ivola e dua na tama dauloloma. (2 Timoci 3:16) E vakamacalataka na Kalou ena iVolatabu na sala eda rawa ni vakamarautaki koya kina, vuna e vakalaiva kina na ca, kei na ka ena cakava vei keda na kawatamata ena gauna se bera mai. Ia o ira na iliuliu ni lotu era vakatanitaka na ivakavuvuli vakaivolatabu; qori na vuna era nanuma kina e levu nira na sega tu ga ni kila vinaka na iVolatabu.​—Cakacaka 20:​29, 30.

E vinakata na Kalou o Jiova meda kila na ka dina me baleti koya. Oya na vuna e vakarautaka kina vei keda e dua na ivola e rawarawa na kena kilai.​—Wilika 1 Timoci 2:​3, 4.

O na kila vinaka vakacava na iVolatabu?

E sega ni solia wale ga vei keda o Jiova na iVolatabu, e vakarautaka tale ga na ivukevuke meda rawa ni kila vinaka kina. A talai Jisu mai me vakavulici keda. (Luke 4:​16-21) A vukei ira na vakarorogo o Jisu mera kila vinaka na iVolatabu, ena nona vakamacalataka sara ga na veitikina yadua.​—Wilika Luke 24:​27, 32, 45.

A tauyavutaka o Jisu na ivavakoso vaKarisito me tomana na cakacaka a tekivutaka. (Maciu 28:​19, 20) O ira na imuri dina i Jisu ena gauna qo era vukei ira na tamata mera kila vinaka na ka e tukuna na iVolatabu me baleti koya na Kalou. Ke o via kila vinaka na iVolatabu, era na marau na iVakadinadina i Jiova mera vukei iko.​—Wilika Cakacaka 8:​30, 31.