Ena Rawa Beka ni Kilai na iVolatabu?

“Keitou dau wili iVolatabu vakavuvale ena Sigatabu. Au sega soti sara ni taleitaka. Au kila ni Vosa ni Kalou, ia e levu na ka au wilika au sega ni kila na kedra ibalebale.”​—Steven, mai Peritania.

“Au a tovolea meu wilika na iVolatabu niu se qai yabaki 17. E dredre meu kila, au mani muduka na noqu wiliwili.”​—Valvanera, mai Sipeni.

“Au wilika ga vakadua na iVolatabu niu nanuma ni dodonu meu wilika niu lotu Katolika. E rauta ni tolu na yabaki me qai oti noqu wiliwili! Ia au sega ni kila na ka au wilika.”​—Jo-Anne, mai Ositerelia.

E SE ivola kilai levu tiko ga na iVolatabu. E volitaki vakalevu duadua, levu era taukena, levu na vosa e vakadewataki kina, sega ni tabaki wale ga e katoni tale ga ena kaseti, CD kei na DVD. Ia e levu era vakaivolatabu e se dredre ga mera kila. E va tale ga oya o iko?

E Vinakata Beka na Kalou Meda Kila na Nona Vosa?

Na iVolatabu e kaya, “Sai koya na Kalou sa vakavuna nai Vola Tabu kecega.” (2 Timoci 3:16) Io, na Kalou o Jiova e vakavuna na volai ni iVolatabu. E vinakata beka meda kila na nona Vosa? Se nakita me dredre nida kila, mera kila ga o ira na iliuliu ni lotu kei ira na vuku ni iVolatabu?

Vakasamataka mada qo eso na tikina e tiko sara ga ena iVolatabu:

“Sa sega ni vuni vei kemuni nai vakaro oqo ka’u sa vakarota vei kemuni edaidai, ka sa sega talega ni yawa.”​—Vakarua 30:11.

“Ni sa vakamacalataki na nomuni vosa sa qai rarama mai; sa vakavukui kina ko ira era sega ni vuku.”​—Same 119:130.

“E na gauna vata ga ko ya, sa vakasinaiti koya [Jisu] e na reki na Yalo Tabu ka sa kaya, ‘Au sa vakavinavinaka vei kemuni Tamaqu, na Turaga ni lomalagi kei vuravura, ni ko ni sa vunia na veika oqo vei ira na vuku kei ira na kilaka, ka vakatakila ga vei ira na gone lalai.’”​—Luke 10:21, VV.

E vinakata o koya e vakavuna na iVolatabu mo kila na nona Vosa! Ia e levu na yalomalumalumu e se dredre tiko ga mera kila na iVolatabu. Na ivukevuke cava e tiko? Ena vakamacalataki ena ulutaga tarava e tolu na vakatutu mo kila kina na iVolatabu.