TORO VOLEKA VUA NA KALOU
E Kauaitaki Iko Dina o Jiova?
“E dredre dina meu valuta na noqu dau raici au niu tawayaga.” Qori a tukuna e dua na marama ni nanuma ni sega ni kauaitaki koya o Jiova. E dau va tale ga qori nomu rai? Ke vakakina, o na rairai taroga: ‘E kauaitaki ira yadua nona dauveiqaravi o Jiova?’ Io! Eda na vakadinadinataka qori ena ka a tukuna o Jisu.—Wilika Joni 6:44.
Me vaka ni o Jisu duadua ga e kila vinaka na itovo kei na inaki i Jiova, na cava e tukuna o koya me baleta na tikina qori? (Luke 10:22) E vakamacalataka o Jisu: “Ena sega ni lako mai vei au e dua ke sega ni vagolei koya mai o Tamaqu e talai au mai.” Koya gona, eda na sega ni rawa ni imuri i Jisu—da qai qarava na Tamada vakalomalagi—ke sega ni digitaki keda o Jiova. (2 Cesalonaika 2:13) Ke da kila vinaka na ibalebale ni vosa i Jisu, eda na vakadinadinataka ni dau kauaitaki keda na Kalou.
Na cava na ibalebale ni nona vagolei se digitaki keda o Jiova? E sega ni kena ibalebale ni vakasaurarataka na lomada meda qaravi koya, e solia ga vei keda o Jiova na galala ni vakatulewa. (Vakarua 30:19, 20) O Jiova e dikeva na lomadra e vica vata na bilioni na tamata ena vuravura qo, e qarai ira tiko na via toro voleka vua. (1 Veigauna 28:9) Ni sa kunea e dua, ena vakaraitaka ni kauaitaki koya. Ena sala cava?
O Jiova e vukei ira tiko vakamalua na “yalomalumalumu” mera toro yani vua. (Cakacaka 13:48) E cakava qori ena rua na sala—na itukutuku vinaka ena iVolatabu eda rogoca kei na yalona tabu. Ni raica o Jiova ni dua e taleitaka na ka dina ena iVolatabu, ena vakayagataka na yalona tabu me vukei koya me kila vinaka qai bulataka na ka dina qori. (1 Korinica 2:11, 12) Ke sega gona na veivuke ni Kalou, ena sega ni rawa nida imuri dina i Jisu, se meda qaravi Jiova ena yalodina.
‘E sega ni vakasaurarataka na lomada o Jiova meda qaravi koya, e solia ga vei keda na galala ni vakatulewa’
Na cava gona eda vulica ena ka e tukuna o Jisu ena Joni 6:44 me baleta na Kalou o Jiova? E digitaki ira na tamata o Jiova ni raica e dua na ka vinaka e lomadra qai kauaitaki ira yadua sara ga. Na ka dina qori e vakacegui koya sara ga na marama a cavuti ena itekitekivu ni ulutaga qo. E tukuna: “E ka dokai duadua na noda qaravi Jiova. Ke digitaki au o Jiova meu nona tamata, qori e vakaraitaka ni kauaitaki au dina.” Vakacava e uqeti iko tale ga qori mo toro voleka vei Jiova ni o kila ni dau kauaitaki ira yadua nona dauveiqaravi?