E Dua e Kauaitaki Keda Dina?

O bau vakila ena dua na gauna ni o sega ni cakava rawa e dua na ka ena leqa o sotava, se o nanuma ni o cola duadua voli ga nomu leqa qai sega ni dua e kila? Ke dua mada ga e kila, o rairai nanuma ni sega ni kauaitaki iko dina.

NI YACO na leqa, na noda bula e vaka ga na draki ca ena sega ni oti. De dua eda nanuma sara ena so na gauna ni sa rui dredre qai mosimosi na ka eda sotava, sa sega nida vosota rawa. E yaco vakalevu qori ke a caka vei keda e dua na ka vakadomobula, se da lomabibi, tauvimate bibi, se yaco eso na vakacalaka e malumu kina na yagoda kei na noda vakasama. Nida rairai sega ni kila na ka meda cakava qai nanuma nida tawayaga, eda veinanuyaka kina ena kune e vei na vakacegu. Vakacava e tiko beka e dua e kauaitaki keda dina?

E Kauai “na Kalou ni Veivakacegui Kecega”

Na iVolatabu e tukuna ni Kalou e “Tama ni loloma, kei na Kalou ni veivakacegui kecega.” (2 Korinica 1:3) E kila o Jiova nida vinakata meda vakacegui. Na vosa “veivakacegui” e drau vakacaca na kena cavuti ena iVolatabu, e duidui tale ga na sala e vakayagataki kina. Kena ibalebale, ni kila na Kalou na ka e dau yaco ena noda bula, e vinakata tale ga me vakacegui keda. Qori e vakadeitaka vei keda ni o Jiova e raica, e kila na noda leqa, e kauaitaki keda tale ga, veitalia ke ra rairai sega ni kauai eso tale.

E vakadinadinataki ena iVolatabu ni kauaitaki keda yadua o Jiova. E tukuni kina, “Sa tiko ga na mata i Jiova e na veiyasana kecega, ka sa vakaraici ira tiko na ca kei ira na vinaka.” (Vosa Vakaibalebale 15:3) Na Jope 34:21 tale ga e tukuna: “Sa rai tiko na matana ki nai valavala ni tamata, Ka sa raica kecega na nonai lakolako.” O Jiova e raica na veika vinaka se veika ca eda cakava​—ena cakava gona na ka e kila ni ganita na keda ituvaki. Qori e vakadinadinataki ena ka e tukuna vei Esa na Tui Juta o Anani na daurairai se parofita: “Sa veiraiyaki na mata i Jiova e vuravura taucoko, me totaki ira vakaidina sa dodonu na lomadra vua.”​—2 Veigauna 16:7, 9.

E dua tale na vuna e vakaraici keda tiko kina o Jiova. E tukuna o Jisu: “E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu sa talai au mai.” (Joni 6:44) Na levu ni nona kauai o Jiova e laurai ena nona dikeva na lomana e dua, me raica ke via kilai koya dina, e tu vakarau tale ga me dusimaki koya. Kena ivakaraitaki, a lai sele i valenibula e dua na marama ena Dominican Republic e tauvi kenisa. Mani kerea na Kalou me vukei koya me kunea na lotu dina. E kauta sara yani vua o watina na ivola Na Cava e Loma ni Kalou vei Keda?a a solia vua e dua na iVakadinadina i Jiova a sikovi koya yani e vale. Ni wilika oti na ivola o yalewa, e kila ni sa sauma na Kalou na nona masu. E vulica sara na iVolatabu, se bera mada ga ni vula ono na nona vuli, sa yalataka vua na Kalou na nona bula, papitaiso sara.

E veiuqeti na ka era vola na daunisame ni Iperiu me vakataki Tui Tevita, me baleta na nona kauaitaki ira vakayalololoma na nona tamata o Jiova. Eda wilika ena Same 56:8 na nona masuti Jiova o Tui Tevita: “Mo ni vakataloca na wai ni mataqu ki na nomuni tavaya: sa sega beka ni volai oti e na nomuni vola?” Na ivakatautauvata qori e vakaraitaka ni vakadeitaka o Tevita ni kila o Jiova na nona rarawa, na mosi e vakila, kei na luluvu ni lomana. Io, na Dauveibuli e taqomaki ira era saga mera cakava na lomana, ‘o ira e dodonu na lomadra vua.’

Na veikauaitaki vakayalololoma ni Kalou e vakavotui tale ga ena same kilai levu, na Same 23. Ena kena itekivu, e tukuni kina ni Kalou e vaka na ivakatawa dauloloma: “A noqui vakatawa ko Jiova; ena sega na ka me yali vei au.” Na ivakatawa ni sipi ena Tokalau e Loma e kauaitaki ira yadua nona sipi, e kila mada ga na yacadra kece. E kacivi ira yadua e veisiga, e dau yagoi ira, ke raica ni dua e mavoa, e dau lumuta ena waiwai na mavoa se kena iboro me mavo totolo kina. Ke tauvimate, ena rairai vinakati vua na ivakatawa me vakasaurarataka na sipi me gunuva na wainimate, qai vakaduria tu ga, me kua ni davo de mate. Qori e vakatayaloyalotaka vinaka na veikauaitaki vakayalololoma i Jiova vei ira na kere veivuke vua.

Masu kei na Veivakaturi —iVakadinadina ni Veikauaitaki ni Kalou

E sega ni inaki ni same totoka era volai ena iVolatabu meda wilika ga da marautaka. Ia e ivakaraitaki ni nodra talaucaka na lomadra vei Jiova na nona tamata yalodina e liu, nira kerea na nona veivuke se vakavinavinakataka na nona veidusimaki kei na nona veivakalougatataki. E laurai tale ga kina nira vakabauta dei ni kauaitaki ira na Kalou. Na ka era vola e vu dina mai lomadra, nida wilika da qai vakananuma, ena tautauvata na noda rai me baleta na Kalou. Na masu e ivakadinadina vinaka ni nona kauaitaki keda na Kalou.

Eda dau sega ni kila ena so na gauna meda masulaka vakacava noda nida sa rui nuiqawaqawataka vakalevu. Kena ibalebale qori ni sega ni kila o Jiova na noda rarawa? E tukuna na Roma 8:​26: “Na Yalo Tabu talega sa vukea na noda malumalumu: ni da sa sega ni kila na ka e kilikili kei keda me da kerea: a sa masulaki keda na Yalo Tabu e na vutugu e sega ni cavuti rawa.” Qori e vakaraitaka ni ka era masuta na tamata yalodina e liu e rairai tautauvata kei na ka eda vakila tiko. O Jiova e “daurogoca na masu,” ena raica me vaka ga eda cavuta tiko na nodra masu na tamata yalodina ena iVolatabu.​—Same 65:2.

Na inuinui ni veivakaturi e ivakadinadina vinaka tale ga ni kauaitaki keda yadua na Kalou. E tukuna o Jisu Karisito: “Ni sa lako mai na gauna era na rogoca kina na domona [Jisu] ko ira kecega e nai bulubulu, a ra na lako maikina.” (Joni 5:28, 29) Na vosa vaKirisi e vakadewataki me “ibulubulu” e tauri mai na vosa vaKirisi e kena ibalebale me “nanumi.” E tiko kina na vakasama ni se nanuma tiko na Kalou na veika e cakava e dua ena gauna se bula tu kina.

Vakasamataka mada na kena vinakati me kila na Kalou na ka kece me baleta e dua, me rawa ni qai vakaturi. Qori e okati kina na kena irairai, na itovo e sucukaya mai kei na kena e qai laurai vua ni toso na gauna, vaka kina na ka kece e dau vakasamataka! (Marika 10:27) Ke mani duanaudolu mada ga na yabaki na nona mate e dua, e se nanumi koya tiko ga na Kalou. (Jope 14:13-15; Luke 20:38) Na nona nanuma o Jiova na kedra itukutuku kece na bilioni vakacaca era sa mate, e ivakadinadina vinaka ni kauaitaki keda!

Dau Veivakalougatataki o Jiova

Na cava meda cakava me kauaitaki keda qai nanumi keda na Kalou? Kena imatai, meda nuitaki koya, meda talairawarawa vua, qai vakabauti koya. E vakamacalataka na yapositolo o Paula se rau salavata vakacava na vakabauta kei na veikauaitaki ni Kalou, e vola: “Kevaka sa sega na vakabauta, sa dredre sara me da vinakati: o koya sa torova na Kalou e dodonu me vakabauta ni sa bula ko koya, ni sa saumi ira talega era sa dauvakasaqarai koya.”​—Iperiu 11:6.

E rua na ka me nanumi me baleta na vakabauta e vakamarautaka na Kalou. Kena imatai, meda ‘vakabauta ni bula o koya,’ qori noda vakabauta ni bula tiko na Kalou, e noda iLiuliu Cecere, e dodonu tale ga meda talairawarawa qai sokalou vua. Kena ikarua, meda vakabauta ni ‘saumi ira era dau vakasaqarai koya.’ Ke vu mai lomada noda vakabauta, eda na vakadeitaka ni Kalou e kauaitaki ira era saga vagumatua mera cakava na lomana, e saumi ira tale ga. Ena noda vulica na Vosa ni Kalou kei na noda veimaliwai kei ira era talairawarawa vua, eda na bucina na vakabauta ena kauaitaki keda kina na Kalou qai vakalougatataki keda.

E levu nikua era sega ni vakabauta ni kauaitaki keda na Kalou. Ia e tukuna vakamatata na iVolatabu, ni Kalou e kauaitaki ira dina na vakabauti koya mai vu ni lomadra. Meda kua ni yalolailai ena levu ni leqa, na veika mosimosi, na veika rarawa, se nuiqawaqawa e yaco tu nikua. O Jiova e kauaitaki keda, e sureti keda sara ga meda nuitaki koya. E tukuna na daunisame, “Mo biuta vei Jiova na nomui colacola bibi, ena tokoni iko ko koya: ena sega ni laivi ira na yalododonu me ra vakayavalataki e na dua na gauna.”​—Same 55:22.

[iVakamacala e ra]

[Kato/​iYaloyalo ena tabana e 30]

Tikinivolatabu Meda Vakabauta Dei Kina ni Kauaitaki Keda Vakayalololoma na Kalou

“Ni sa veiraiyaki na mata i Jiova e vuravura taucoko, me totaki ira vakaidina sa dodonu na lomadra vua.”​—2 VEIGAUNA 16:9

“Mo ni vakataloca na wai ni mataqu ki na nomuni tavaya: sa sega beka ni volai oti e na nomuni vola?”​—SAME 56:8

“A noqui vakatawa ko Jiova; ena sega na ka me yali vei au.”​—SAME 23:1

“Oi kemuni sa daurogoca na masu, ena toro mai vei kemuni na tamata kecega.”​—SAME 65:2

“Ko ni na kaci mai, ka’u na rogo yani vei kemuni: ko ni na vinakata na cakacaka ni ligamuni.”​—JOPE 14:15

“O koya sa torova na Kalou e dodonu me vakabauta ni sa bula ko koya, ni sa saumi ira talega era sa dauvakasaqarai koya.”​—IPERIU 11:6

“Mo biuta vei Jiova na nomui colacola bibi, ena tokoni iko ko koya: ena sega ni laivi ira na yalododonu me ra vakayavalataki e na dua na gauna.”​—SAME 55:22