E Tarai Keda Vakacava na Roka?
Erau cakacaka vata na matamu kei na nomu vakasama mo kila kina na ka e tu wavoliti iko. Kena ivakaraitaki, ni o raica e dua na vuata o na vakasamataka mo kania se sega. Ni o dagava na lomalagi o na vakasamataka se na vakacava na draki. Ni o raica na vosa o wilika ena ulutaga qo, o sa na rawa ni vakasamataka na kena ibalebale. Na roka e vukei iko mo cakava na ka kece qori. Ena sala cava?
Na roka ni vuata o na rawa ni vakalewa kina se sa dreu se veiganiti me laukana. O na kila na draki ena roka ni lomalagi. Ni o wilika na ulutaga qo, ena dreta na matamu na veiraurau ni roka ni matanivola kei na kena iyaloyalo. Io, na roka e vukei keda vakalevu meda kila na ka e tu wavoliti keda, e veisautaka tale ga na ivakarau ni yaloda.
VEISAUTAKA NA IVAKARAU NI YALODA
Nida curu ena dua na sitoa ena dreta na matada na veimataqali iyaya era tuvani tu kina. De dua o sega ni kila nira digia vinaka na dauveivoli na roka me ganita na ka eda dui vinakata, noda yabaki ni bula, tagane se yalewa. O ira na dau ukutaki vale, dauculaisulu, kei ira na daudroini era kila tale ga na roka ena dreta na matadra na volivoli.
E duidui tale ga na ibalebale ni roka ena dui vanua, e vakatau qori ena nodra ivakarau vakavanua. Kena ivakaraitaki, ena so na vanua mai Esia na roka damudamu e vakaibalebaletaka na rawaka kei na soqo ni marau, ia ena so na vanua mai Aferika e vakaibalebaletaka na lolosi. Ena duidui beka na noda isususu, ia e tautauvata na ivakarau ni noda rai ena so na roka. Meda raica mada qo e tolu na roka.
DAMUDAMU: E kata na roka qo, qai dau vakaibalebaletaka na kaukaua, ivalu, kei na veika rerevaki. E rawa ni vakatotolotaka na cakacaka ni kakana e yagoda, e rawa tale ga ni vakavuna na ceguoca kei na tubu ni dra.
Na vosa vakaIperiu ena iVolatabu ni “damudamu” e vu mai na dua na vosa e kena ibalebale “dra.” E volai ena iVolatabu na roka damu malumu se kulakula me vakatayaloyalotaka na saqamua dauveivakamatei. E dara tiko na isulu lokaloka qai kulakula ni vodoka ‘na manumanu kila kulakula e robota tu na yagona na yaca e vosavakacacataki kina na Kalou.’—Vakatakila 17:1-6.
DROKADROKA: E duidui sara na ivakarau ni yalo e vakavotuya na roka qo ni vakatauvatani kei na roka damudamu. Na roka drokadroka e rawa ni vakaberaberataka na cakacaka ni kakana e yagoda, e veivakacegui tale ga. E roka malumu qai dau vakaibalebaletaka na vakacegu. Nida raica na drokadroka ni kau kei na ulunivanua e vakacegu noda vakasama. E vakamacalataki ena Vakatekivu na nona bulibuli na Kalou qai tukuna ni vakarautaka na co drokadroka kei na draunikau vei keda na kawatamata.—Vakatekivu 1:11, 12, 30.
VULAVULA: Na roka qo e vakaibalebaletaka na rarama, veitaqomaki, kei na savasava. E tiko tale ga kina na vakasama ni vinaka kei na sega ni cala. E cavuti vakalevu ena iVolatabu na vulavula. E laurai ena raivotu nira vakaisulu vulavula tu na tamata kei na agilosi, qori e vakaibalebaletaka nira yalododonu ra qai savasava vakayalo. (Joni 20:12; Vakatakila 3:4; 7:9, 13, 14) E vakatayaloyalotaka na ivalu ni yalododonu ni Kalou na ose vulavula kei ira era vodoka era dara tiko na lineni vulavula savasava. (Vakatakila 19:14) E vakayagataka tale ga na roka vulavula na Kalou me vakaraitaka ni tu vakarau me veivosoti: “Ke sa vaka na ka kulakula na nomudoui valavala ca, sa na vulavula me vaka na uca-vulavula.”—Aisea 1:18.
KASA ENA NODA VAKASAMA
Na kena vakayagataki ena iVolatabu na roka e dusia ni kila vinaka na Kalou na ivakarau ni yalo e dau vakavotuya vei keda na tamata. Kena ivakaraitaki, e parofisaitaki ena Vakatakila na ka e yaco tu ena noda gauna, wili kina na ivalu, lauqa, kei na matedole e vu mai na leqa ni kakana kei na mateca. Me rawa ni kasa ena noda vakasama qori, e volai ena Vakatakila e dua na raivotu vakasakiti me baleta e va na ose e duidui na kedratou roka.
Na kena imatai na ose vula, e vakatayaloyalotaka na nona vala ena yalododonu o Jisu Karisito. Tarava na ose damu, e vakatayaloyalotaka na veivaluvaluti ni matanitu. Oti sa qai votu mai na ose loa, e vakatayaloyalotaka na lauqa. Kena iotioti na “ose vulaci; o koya e vodo tiko kina e yacana o Mate.” (Vakatakila 6:1-8) Eda sa rawa ni kila tale ga mai na dui roka ni ose qori na cava eratou dui vakaibalebaletaka. Qori e rawarawa kina nida kila se cava e vakaibalebaletaka me baleta na noda gauna.
E levu na gauna e dau cavuta na roka na iVolatabu me vakatayaloyalotaka eso na ka. Io, o koya e bulia na rarama, roka, kei na matada e vakayagataka na roka me kasa kina ena noda vakasama e dua na ivakavuvuli, qai rawarawa meda nanuma. Na roka e vukei keda meda kila vinaka na ka e tu wavoliti keda, e veisautaka na ivakarau ni yaloda, eda vakasamataka tale ga kina na ivakavuvuli bibi. Koya gona na roka e nona iloloma na Dauveibuli meda marautaka kina na bula.
[iYaloyalo ena tabana e 14]
[iYaloyalo ena tabana e 14]
[iYaloyalo ena tabana e 15]
[Kato ena tabana e 15]
Ni ratou sobu mai na waqa na vuvale i Noa, a vakaraitaka vei ratou na Kalou e dua na drodrolagi me ivakatakilakila ni na sega tale ni luvuca na vuravura me vakawabokotaki kina na kawatamata. Qori e dua dina na ivakatakilakila totoka eratou na guiguilecava dredre. —Vakatakila 9:12-17.
[iYaloyalo]
[Kato ena tabana e 15]
Era kaya na vakabauta na bula vakaidewadewa ni sega ni bibi ena noda bula na roka, era veinanuyaka se cava na vuna eda taleitaka kina. Ia ke da vakabauta ni buli keda na Dauveibuli meda taleitaka na veimataqali roka, eda na raica na isolisoli qori me nona iloloma meda marautaka kina na bula.