Jiova E Dauvakarautaka na Veika Eda Gadreva Qai Dauveitaqomaki

1, 2. Na cava eso na ka e duidui kina na noda vuvale kei na sala eda mai kila kina na ka dina?

E TAUYAVUTAKA o Jiova na vuvale kece. (Efeso 3:​14, 15) Eda lewe ga ni dua na vuvale, ia e duidui na noda itovo kei na ituvaki eda sotava. De dua o tiko kei nomu itubutubu mai na gauna o sucu kina me yacova ni o sa uabula. Eso tale sa rairai takali na nodra itubutubu ena vuku ni tauvimate, vakacalaka, se so tale na leqa tubukoso. Ia eso tale era sega mada ga ni kila se o cei e nodra itubutubu.

² E duidui tale ga na sala era mai kila kina na ka dina o ira na lewe ni vuvale i Jiova. O rairai ‘susu ena dina’ me vaka era dau kaya eso, rau qai vakavulici iko nomu itubutubu ena ivakavuvuli vakalou. (Vkru. 6:​6, 7) Se o dua vei ira na udolu o mai kila na ka dina nira vunau vei iko eso tale na dauveiqaravi i Jiova.​—Roma 10:​13-15; 1 Tim. 2:​3, 4.

3. Na cava eso na ka eda tautauvata kina?

³ E duidui na noda isususu, ia e tiko na ka eda tautauvata kina. Eda vakila kece na revurevu ni nona talaidredre o Atama, sa sega kina nida uasivi, eda ivalavala ca da qai mate. (Roma 5:12) Ia nida dausokalou dina e se rawa nida vakatokai Jiova me ‘Tamada.’ Ni vakamacalataki ira na tamata digitaki ni Kalou, e kaya na Aisea 64:8: “Kemuni Jiova, ko ni sa tamai keimami.” Ni tekivuna tale ga nona masu o Jisu, e kaya: “Tamai keimami mai lomalagi, me dokai na yacamuni.”​—Maciu 6:9.

4, 5. Me rawa nida vakavinavinakataki Jiova vakalevu, na cava eda na dikeva tiko?

⁴ Na Tamada vakalomalagi e vakarautaka vei keda na veivuke kei na veitaqomaki nida masuta na yacana ena vakabauta. E vola na daunisame na ka e tukuna o Jiova: “Ni sa lomani au ko koya [dua na dausokalou dina], ka’u na vakabulai koya kina: Au na vakaceceretaki [taqomaki] koya sara ni sa kila na yacaqu.” (Same 91:14) Io, o Jiova e vakarautaka vakayalololoma na sala meda vakabulai kina mai vei ira noda meca, ena taqomaki keda tale ga meda kua ni vakawabokotaki.

⁵ Me rawa nida vakavinavinakataka vakalevu na Tamada vakalomalagi, meda dikeva mada e tolu na tikina bibi qo: (1) E Dauvakarautaka na Tamada na ka eda gadreva. (2) O Jiova e Dauveitaqomaki. (3) Na Kalou e noda iTokani voleka. Nida dikeva tiko na tolu na tikina qo, e vinaka meda vakasamataka noda veiwekani kei na Kalou da qai vulica na sala meda rokovi koya me vaka ni Tamada. Ena yaga tale ga meda vakasamataka lesu na veivakalougatataki e vakarautaka o Jiova vei ira era toro volekati koya.​—Jeme. 4:8.

E DAUVAKARAUTAKA NA KA EDA GADREVA O JIOVA

6. Na cava e dua na sala e vakaraitaka kina o Jiova ni vu mai vua na “iloloma vinaka kece”?

⁶ E vola na tisaipeli o Jemesa: “Na iloloma vinaka kece kei na isolisoli uasivi kece e vu mai cake, e solia mai na Tama ni rarama vakalomalagi.” (Jeme. 1:17) Na bula e iloloma talei i Jiova. (Same 36:9) Nida vakayagataka gona noda bula meda cakava kina na inaki ni Kalou, eda na vakalougatataki vakalevu ena gauna qo, eda na rawa tale ga ni nuitaka na bula tawamudu ena vuravura vou. (Vkai. 10:22; 2 Pita 3:13) Ia ena rawati vakacava qori me vaka ni tarai keda tu na revurevu ni talaidredre i Atama?

7. E vakarautaka vakacava na Kalou na sala meda veiwekani voleka kina kei koya?

⁷ E levu tale na sala e dau vakaraitaka kina o Jiova ni o koya e Dauvakarautaka na ka eda gadreva. Kena ivakaraitaki, na nona loloma soliwale e vu ni noda vakabulai. Eda ivalavala ca kece ni a vakadewa qori o Atama. (Roma 3:23) Ia ena loloma wale ga i Jiova, e vakaliuliu me vakarautaka na sala meda veiwekani voleka kina kei koya. E vola na yapositolo o Joni: “E kilai na loloma ni Kalou ena ka e yacovi keda ni tala mai vuravura na Kalou na Luvena e duabau ga e vakatubura meda vakabulai kina ena vukuna. Na loloma qo e sega ni vakatau ena noda lomana na Kalou, o koya ga e lomani keda qai tala mai na Luvena me isoro, meda veiyaloni kina kei koya.”​—1 Joni 4:​9, 10.

8, 9. E vakaraitaka vakacava o Jiova vei Eparama kei Aisake ni Dauvakarautaka na veika era gadreva nona tamata? (Raica na imatai ni iyaloyalo.)

⁸ Ena ika19 ni senitiuri B.S.K., a vakayacori e dua na parofisai e laurai kina na yalololoma i Jiova me vakarautaka na bula tawamudu vei ira na talairawarawa. E vakamacalataka na Iperiu 11:​17-19: “Ena vakabauta i Eparama, a soli Aisake kina me vakacabora ni vakatovolei. Ia o koya a ciqoma ena marau na vosa ni yalayala a tu vakarau me cabora na luvena e duabau. Dina ni a tukuni vua: ‘O koya ena qai okati me “nomu kawa” ena basika mai vei Aisake.’ Ia e vakabauta o Eparama ni rawa vua na Kalou me vakaturi koya mai na mate; mai kea e soli tale vua na luvena, qo e vakatakarakarataka na ka me na yaco.” E tautauvata sara ga na ituvaki qo kei na ka e cakava o Jiova, ni solia na luvena duabau ena vukudra na kawatamata.​—Wilika Joni 3:16, 36.

⁹ Ena rairai marautaka mada ga o Aisake nona sa sega ni cabori me isoro! Macala ga ni na vakavinavinakataka sara ga na Kalou ena nona vakarautaka e dua na isoro me kena isosomi​—e dua na sipi tagane e tacori tu ena veikau lalai. (Vkte. 22:​10-13) Sa rauta me vakatokai na vanua ya me “Jiova jaire,” e kena ibalebale vakaIperiu “ena vakarautaka ko Jiova.”​—Vkte. 22:14.

NA NODA VEIVAKADUAVATATAKI

10, 11. O cei e liutaka tiko na “itavi ni veivakaduavatataki,” era cakava vakacava qori?

¹⁰ Nida vakasamataka vakatitobu na sala e dau vakarautaka kina na ka eda gadreva o Jiova, eda vakavinavinakataka kina na itavi bibi i Jisu Karisito, me vaka ga e cakava o Paula ena nona vola: “E va kina qo na neitou lewa, e mate e le dua ena vukuda kece; baleta nida mate kece; e mate ena vukuda kece mera kua kina ni bula ena vukudra ga o ira era bula tiko, mera bula ga ena vuku i koya e mate ena vukudra, qai vakaturi.”​—2 Kor. 5:14, 15.

¹¹ Nira lomana na Kalou na lotu vaKarisito taumada ra qai vakavinavinakataka vakalevu nodra rawa ni sokaloutaki koya, era ciqoma kina na “itavi ni veivakaduavatataki.” Ena nodra cakacaka vakavunau kei na nodra veivakatisaipelitaki, e rawa kina vei ira na yalomalumalumu mera vakaduavatataki kei na Kalou, mera nona itokani, me rawa tale ga nira okati mera luvena vakayalo na Kalou. Nikua, era vakayacora tale ga na lumuti i Jiova na cakacaka vata ga ya. Nira nona mata na Kalou kei Karisito, na ka era cakava e rawa kina vei ira na yalomalumalumu mera toro volekati Jiova ra qaravi koya tale ga.​—Wilika 2 Korinica 5:18-20; Joni 6:44; Caka. 13:48.

12, 13. Eda na vakaraitaka vakacava noda vakavinavinakataka na isolisoli kece i Jiova?

¹² O ira na lotu vaKarisito e nodra inuinui na bula e vuravura era tokoni ira na lumuti ena vunautaki ni Matanitu ni Kalou, era cakava qori nira vakavinavinakataki Jiova ni Dauvakarautaka na veika era gadreva. Se mani cava na noda inuinui, eda vakayagataka ena cakacaka qo e dua na isolisoli talei e vakarautaka na Kalou, na iVolatabu. (2 Tim. 3:16, 17) Nida vakayagataka vakamaqosa na Vosa uqeti ni Kalou ena noda cakacaka vakaitalatala, eda sa vukei ira sara tiko ga na so tale mera rawata na bula tawamudu. E tiko e dua tale na isolisoli e vakarautaka o Jiova me vukei keda ena cakacaka qori​—nona yalo tabu. (Saka. 4:6; Luke 11:13) E laurai ena itabataba kece ni Yearbook of Jehovah’s Witnesses na veika vakasakiti sa rawati ena noda cakacaka. E ka dokai dina meda bau vakaitavi ena cakacaka e vakalagilagi kina na Tamada e Dauvakarautaka na ka eda gadreva!

¹³ Nida vakasamataka na ka kece e vakarautaka na Kalou, e vinaka meda dui tarogi keda: ‘Au solia tiko noqu vinaka kece ena cakacaka vakaitalatala meu vakaraitaka kina noqu vakavinavinakataka na isolisoli kece ni Kalou? Na cava meu cakava me vinaka cake kina noqu vunautaka na itukutuku vinaka, me laulau tale ga?’ Eda vakaraitaka na noda vakavinavinakataka na isolisoli kece i Jiova nida vakaliuca ena noda bula na Matanitu ni Kalou. Ke da cakava qori, ena vakarautaka o Jiova na ka eda gadreva. (Maciu 6:​25-33) Ni lomani keda na Kalou, eda na via solia noda vinaka kece meda talairawarawa vua da qai vakamarautaki koya.​—Vkai. 27:11.

14. E vakaraitaka vakacava o Jiova ni dau vakabulai ira nona tamata?

¹⁴ E lagata na daunisame: “Ia koi au ka’u sa dravudravua ka luveniyali: Ia ka sa nanumi au tiko na Turaga: Koi kemuni na noqui vukevuke kei na noqui vakabula.” (Same 40:17) Sa vakavuqa na nona dau vakabulai ira vakailawalawa na nona tamata o Jiova, vakabibi ena gauna era vakacacani kina se nira vakasasataki vakavica vei ira na meca. Eda vakavinavinakataka dina nona dauveivuke o Jiova ena gauna va qori kei na nona dau vakarautaka e levu na isolisoli vakayalo!

O JIOVA E DAUVEITAQOMAKI

15. Vakamacalataka na sala ena taqomaki luvena kina e dua na tama dauloloma.

¹⁵ Na tama dauloloma ena vakarautaka na veika eratou vinakata na luvena, ena taqomaki ratou tale ga. Ena saga me taqomaki ratou na luvena ke basika na leqa. E vakasamataka lesu e dua na tacida e dua na ituvaki a yaco ni se gone. Ni lesu mai ena cakacaka vakavunau kei tamana, rau donumaka sara e dua na uciwai lailai. Dua na ka na kui ni uciwai qori ni a tau vakalevu na uca ena mataka ya. Ena rawa ga ni takosovi ke rau ladeva na vatu lelevu me rau yaco i tai. E takoso i liu o gone, e mani sisi ena dela ni vatu qai lutu i wai. E vakarua nona dromu. Ia e kalougata o gone ni qumia totolo o tamana na tabana qai dreti koya ni bera ni luvu! E vaka tale ga ya na Tamada vakalomalagi ni vakabulai keda mai na kui kaukaua ni vuravura ca qo kei na kena iliuliu o Setani. O Jiova na itataqomaki vinaka duadua eda rawa ni nuitaka.​—Maciu 6:13; 1 Joni 5:19.

16, 17. E veivuke qai taqomaki ira vakacava na Isireli o Jiova nira valuti na Amalekaiti?

¹⁶ A vakaraitaka o Jiova nona veitaqomaki vakayalololoma ena 1513 B.S.K. ni vakabulai ira oti na Isireli mai Ijipita qai taqomaki ira vakacakamana nira takosova na Wasa Damudamu. Nira taubale tiko ena vanualiwa mera gole ina Ulunivanua o Saineai, era yaco sara yani e Rifitimi.

¹⁷ Nida vakasamataka na parofisai ena Vakatekivu 3:​15, a rairai vinakata o Setani me ravuti ira na Isireli ni rawarawa sara ga mera vakaleqai. E vakayacora qori ena nona vakayagataki ira na meca ni Kalou, na Amalekaiti. (Tiko 24:20) Raica mada na ka e cakava o Jiova ni vakayagataki ratou e va na tamata yalodina, o Josua, Mosese, Eroni kei Uri. Ni valuti ira na Amalekaiti o Josua, eratou duri tu ena dua na ulunivanua voleka o Mosese, Eroni kei Uri. Era qaqa na Isireli ke laveta tiko o Mosese na ligana. Ni oca, erau na tabea na ligana o Eroni kei Uri. Koya gona, ena veivuke kei na veitaqomaki ga i Jiova a rawa kina vei ‘Josua me vakadrukai Amaleki kei ira na nona tamata.’ (Lako 17:​8-13) A mani tara o Mosese e dua na icabocabonisoro ena vanua ya qai vakayacana me “Jiova-nisai,” e kena ibalebale vakaIperiu ‘O Jiova na Noqu [Duru ni] Kuila.’​—Wilika Lako Yani 17:​14, 15.

TAQOMAKI MAI NA LIGA I SETANI

18, 19. Na veitaqomaki cava e vakarautaka na Kalou vei ira nona dauveiqaravi nikua?

¹⁸ O Jiova e taqomaki ira era lomani koya kei ira na talairawarawa vua. Me vakataki ira na Isireli mai Rifitimi, eda nuitaka na veitaqomaki ni Kalou nira ravuti keda na meca. E vuqa na gauna e dau maroroi keda vakailawalawa o Jiova qai taqomaki keda mai na liga i Setani. Vakasamataka na levu ni gauna e dau taqomaki ira na nona tamata na Kalou ena nodra dei mera kua ni veitovaki. Kena ivakaraitaki, a yaco qori ena nodra gauna na Nazi e Jamani kei na so tale na vanua ena veiyabaki ni 1930 kei na itekitekivu ni veiyabaki ni 1940. Nida wilika da qai vakasamataka na italanoa kei na ivolatukutuku ena Yearbook me baleta nona dau veitaqomaki na Kalou, ena dei kina na noda nuitaki Jiova na noda idrodro.​—Same 91:2.

¹⁹ E vakarautaka o Jiova na ivakasala vakayalololoma ena nona isoqosoqo kei na ivola tabaki meda taqomaki kina. Raica mada na yaga ni ivakasala qori nikua. Sa qai lomoci tiko ga o vuravura ena ivakarau ni bula torosobu kei na iyaloyalo vakasisila, e vakarautaka gona o Jiova na ivakasala bibi kei na ivukevuke yaga me taqomaki keda mai na ivalavala e veivakaleqai. Kena ivakaraitaki, e vakarautaka na Tamada vakalomalagi na ivakasala me baleta na noda qaqarauni ena vakailala ca ni vakayagataki vakatawadodonu na site ni veikilai ena Internet.a​—1 Kor. 15:33.

20. Na veitaqomaki kei na veidusimaki cava e vakarautaki ena ivavakoso vaKarisito?

²⁰ Eda na vakaraitaka vakacava ni ‘vakavulici keda dina tiko o Jiova’? Ena noda talairawarawa sara ga ena nona ivakaro. (Aisea 54:13) E ivakavakacegu na ivavakoso, e vakarautaki kina na veidusimaki kei na veitaqomaki, nira veiqaravi kina na tagane yalodina era qase ni ivavakoso mera vakarautaka na veivuke kei na ivakasala vakaivolatabu. (Kala. 6:1) E vakayagataki ira na “isolisoli tamata” qo o Jiova me karoni keda kina vakayalololoma. (Efeso 4:​7, 8) Na cava e dodonu meda cakava? Meda yalorawarawa ni vakamalumalumu da qai talairawarawa, ni na vakalougatataki keda na Kalou.​—Iper. 13:17.

21. (a) Na cava meda vakadeitaka meda cakava? (b) Na cava ena veivosakitaki ena ulutaga e tarava?

²¹ Meda vakadeitaka mada ga me dusimaki keda tiko ga na yalo tabu, meda muria tale ga na nona ivakaro na Tamada vakalomalagi. E vinakati tale ga meda vakananuma vakatitobu na ivakarau ni bula i Jisu Karisito da qai saga meda muria na nona ivakaraitaki uasivi. E vakalougatataki vakalevu o Jisu ni a yalodina voli me yacova nona mate. (Fpai. 2:​5-11) Eda na vakalougatataki tale ga ke da vakararavi vei Jiova mai vu ni lomada. (Vkai. 3:​5, 6) Meda nuitaki Jiova mada ga o koya e Dauvakarautaka na ka eda gadreva, qai Dauveitaqomaki uasivi duadua. E ka marautaki qai itavi dokai dina meda sokaloutaki koya! Ena tubu tiko ga na noda lomani koya nida vakananuma na ikatolu ni sala e dau karoni keda kina na Tamada​—nona veitokani. Eda na veivosakitaka ena ulutaga tarava na sala e noda itokani voleka kina o Jiova.