O BAU KILA?
Na cava e dau musu kina na yavadra na daubasulawa nira vakamatei?
E tukuni ena Kosipeli me baleta na nona vakamatei o Jisu kei rau na daubasulawa ena kaunirarawa: “Era kerei Pailato na Jiu me musu na yavadratou me rawa ni lai maroroi na yagodratou.”—Joni 19:31.
Ena nodra lawa na Jiu, me kua ni ‘biu tu ena kau ena bogi taucoko’ na yagona na daubasulawa e vakamatei ni vakaliligi ena kau. (Vakarua 21:22, 23) Era muria tale ga na lawa qori na Jiu nira veivakaliligi ena kau na kai Roma. E musu gona na yavadrau na daubasulawa erau vakaliligi kei Jisu, me rau mate totolo kina rau qai bulu ni bera ni tekivu na Siga ni Vakacecegu ni sa dromu na siga.
Ena levu na gauna, o koya e vakamatei e dau vako na ligana kei na yavana ina kau. Ni vakaduri na kau, dua na ka na mosi ena vakila ni sa sega ni taura rawa na bi ni yagona na ivako. Ena vinakati me toso cake me cegu tiko kina, ia ena ka ni sasaga qori ena vuku ni ivako e toka e yavana. Ia ke musu na yavana, ena mate totolo ni sa sega ni cegu rawa.
E dau vakayagataki vakacava na irabo ena ivalu ena gauna makawa?
A vakayagataka o Tevita na irabo me vakamatea kina na tuwawa o Koliaci. A rairai vulica na kena ivakavakayagataki ena gauna a vakatawa sipi voli kina ni se cauravou.—1 Samuela 17:40-50.
iVakatakarakara ni nodra irabo na kai Asiria nira kaba nodra siti vakabai na Jiu
E laurai na irabo ena nodra droini na kai Ijipita kei na kai Asiria ena gauna vakaivolatabu. Na iyaragi qo e rua na kena wa qai semai rau e dua na taga leca se isulu. Ena biuta ena taga qori na daurabo e dua na vatu mokimokiti se yagoyago vinaka, e lima ina vitu na sedimita na kena raba qai rauta ni 250 na karamu na kena bi. Ni wiricaka vakaukaua na irabo qai sorova e dua na wa, ena cawi na vatu me lauta na takete.
E kune ena vakekeli ena Tokalau e Loma, e levu na vatu ni irabo e dau vakayagataki ena ivalu ena gauna makawa. Na totolo ni cawi ni vatu e rabotaka e dua na kenadau e rawa ni yacova na 160 ina 240 na kilomita ena dua na aua. Era kaya eso na vuku ni sega ni yacova na vatu ni irabo na yawa ni vanua e yacova na dakaititi, ia e vakadinadinataki ni rawa ni veivakamatei tale ga na irabo me vaka na dakaititi.—Dauveilewai 20:16.