Tagane Vakawati​—Vakamarautaki Watimu

ME VAKAMARAUTAKI watina vakacava e dua na tagane? Levu era nanuma ni nona itavi bibi e dua na tagane vakawati me vakailavotaka nona vuvale. Ia eso na yalewa vakawati era sa vutuniyau tu era se sega ga ni marau, so era rere mada ga. E kaya e dua na yalewa ni Sipeni o Rosa baleti watina, “Dau vinaka nona itovo ni tiko kei ira eso, ia e kaukaua nona ivakarau i vale.” E kaya o Joy mai Nigeria, “Niu sega ni duavata kei watiqu, e dau kaya, ‘O na cakava na ka kece au vinakata ni o watiqu.’”

Rawa ni vakayacora vakacava e dua na tagane vakawati na nona itavi ena yalololoma? Ena vakamarautaki watina vakacava me vakila na “vakacegu?”—Ruci 1:9.

RAI NI IVOLATABU BALETA NA LEWA I TAGANE

Erau tautauvata na tagane kei na yalewa vakawati ena mata ni Kalou, ia e kaya na iVolatabu ni tiko na dui itavi erau lesi kina ena vuvale. E kaya na Roma 7:2 ni na tiko ga o yalewa ena “lawa i watina.” Me vaka ga nona lesi e dua ena isoqosoqo me liutaka na ka e caka, e lesia tale ga na Kalou na tagane me ulu i watina se liutaki koya. (1 Korinica 11:3) Ena liutaka gona o tagane na veika e yaco ena nona vuvale.

Ke o tagane vakawati, o na vakayagataka vakacava na nomu lewa e soli vakalou? “Ni lomani ira tiko ga na watimuni,” e kaya na iVolatabu, “me vaka ga nona lomana na ivavakoso na Karisito.” (Efeso 5:25) A sega ni vakawati o Jisu, ia na nona ivakaraitaki e rawa ni vukei iko mo dua na tagane vakawati vinaka. Meda raica mada qo.

IVAKARAITAKI UASIVI O JISU VEI IRA

Dau veivukei o Jisu, e veivakacegui tale ga. E yalataka o Jisu vei ira na vakalolomataki tu kei ira na lomabibitaka tu nodra leqa: “Lako mai vei au, . . . au na vakacegui kemuni.” (Maciu 11:28, 29) E dau vukei ira ena nodra leqa vakayago, dau vakacegui ira tale ga vakayalo. Sa rauta mera torovi Jisu e levu nira vakadeitaka ni rawa ni vakamamadataka nodra icolacola!

Sala moni vakatotomuri Jisu kina na tagane vakawati. Qara na sala mo vakamamadataka kina na icolacola i watimu. So era vakataki Rosa ena nona kaya: “Au vaka tu ga e dua na dauveiqaravi i watiqu.” Ia e kaya e dua na turaga o Kweku, e marautaka nona bula vakawati: “Au dau tarogi watiqu seu rawa ni vukei koya vakacava ena nona icolacola. Niu lomani koya, au dau vakaliuliu ena cakacaka ni vale.”

Dau veinanumi qai yalololoma o Jisu. Tauvimate bibi tu e dua na marama dravudravua me 12 na yabaki. Ni rogoca nona veivakabulai vakacakamana o Jisu, “e kaya tiko ga: ‘Keu tara wale ga na nona isulu e sau, au na bula.’” Donu vinaka nona nanuma. E torovi Jisu, tara nona bele ni sulu qai vakabulai vakasauri. Era nanuma eso na vakararai tu ni tawaveidokai, ia e kila o Jisu ni vaqara bula dina tiko.a E tukuna vakayalololoma vua: “Luvequ, . . . mo bula mai na kemu mate ca.” E sega ni vakamadualaki koya se cudruvi koya, e kila vinaka ga na kena ituvaki. E vakaraitaka ni turaga dau yalololoma.—Marika 5:25-34.

Sala moni vakatotomuri Jisu kina na tagane vakawati. Ni sega ni bula vinaka o watimu, dau kauaitaki koya vakalevu, vosota tale ga na kena ituvaki. Saga mo kila na kena ituvaki kei na ivakarau ni lomana. Kaya o Ricardo, “Niu raica ni dau cudrucudru o watiqu, au qarauna sara meu kua ni tukuna na ka ena vakacudrui koya vakalevu.”

Dau veivosaki o Jisu kei ratou nona tisaipeli. Dau veivosaki vakalevu o Jisu kei ratou nona itokani. E kaya, “Na ka kece au rogoca vei Tamaqu au vakatakila vei kemudou.” (Joni 15:15) So na gauna e dau via tu taudua ga o Jisu me vakasama qai masu. Ia e dau talaucaka na lomana vei ratou na nona tisaipeli. Ena bogi ni se bera ni vakamatei ena nona beitaki ni daubasulawa, e kaya vakadodonu vei ratou na ‘rarawa ni lomana.’ (Maciu 26:38) Ni ratou sega ni muria na ka e kaya, e vosa tiko ga vei ratou.—Maciu 26:40, 41.

Sala moni vakatotomuri Jisu kina na tagane vakawati. Dau tukuna nomu nanuma kei na lomamu vei watimu. Rawa ni kudruvaka e dua na yalewa ni makutu na vosa o tagane e matanalevu, ia e galu voli ga ni tiko e vale. Dikeva mada na ka e kaya o Ana baleti watina ni talaucaka vua na lomana: “Au kila ni lomani au dina, au volekati koya tale ga.”

Kua ni galu tiko mo totogitaki watimu kina. E kaya e dua na yalewa, “Ni cudruvi au o watiqu ena galu tu me vica na siga. E vakavuna meu beitaki au, qai nanuma niu sega ni taleitaki.” Saga o Edwin me vakatotomuri Jisu. “Niu cudru, au sega ni vosa ena gauna ga ya, au dau qara na gauna veiganiti me keirau veivosaki kina.”

O Joy, a tukuni taumada, e raica sara ga na veisau i watina ena gauna e tekivu vuli iVolatabu kina kei ira na iVakadinadina i Jiova. E kaya, “E sa veisau, e saga tiko me dauloloma me vakataki Jisu.” Vica vata na veiwatini sa yaga vei ira na veivakavulici vakaivolatabu qori. O via vuli tale ga? O rawa ni kerea e dua na iVakadinadina i Jiova me vakavulici iko ena iVolatabu, e sega ni saumi.