Saumi na Taro Vakaivolatabu
Qo ga na inaki ni bula?
Vakacava o nanuma ni dau lekaleka ena so na gauna na bula?
O dau vakasamataka tu se sa inaki ga ni noda bula meda marau, cakacaka, vakawati, vakavuvale, da qai qase yani? (Jope 14:1, 2) E volai ena iVolatabu ni so na tamata vuku era vaqaqa tale tu ga na taro qori.—Wilika Dauvunau 2:11.
E vakainaki na noda bula? E vinaka meda taroga mada, Eda vu mai vei? Ni vakasamataki na kena buli vakamatau na noda mona kei na yagoda, era tukuna kina e levu ni tiko e dua na Dauveibuli. (Wilika Same 139:14.) Ena tiko gona na vuna e buli keda kina! Ena vakainaki sara vakalevu noda bula ke da kila na vuna.
Cava eda buli kina?
E vakalougatataki rau na imatai ni veiwatini na Kalou, e solia tale ga vei rau na ilesilesi dokai. Nona inaki me rau vakatawai vuravura, rau vakatetea me parataisi rau qai bula tawamudu.—Wilika Vakatekivu 1:28, 31.
A sega ni vakavotukana na inaki qori ni Kalou nida talaidredre vua. Ia e sega ni cati keda, se veisautaka nona inaki me baleta na vuravura. E veivakadeitaki na iVolatabu ni sa cakacaka tiko na Kalou meda vakabulai, me vakayacori tale ga na nona inaki me baleta na vuravura! E vinakata gona mo vakila na bula me salavata kei na veika a nakita taumada! (Wilika Same 37:29.) O na vulica ena iVolatabu na yaga ni inaki ni Kalou vei iko.