Yalayala ena Yaco Dina
Me vaka ga e parofisaitaka o Jisu, sa vunautaki tiko na itukutuku vinaka ni Matanitu ni Kalou e veiyasa i vuravura. (Maciu 24:14) E kaya na ivola i Taniela ni Matanitu qori e nona na Kalou. E vakamacalataka na wase 2 na parofisai me baleta na veitaravi ni matanitu vakatamata e veiliutaki me tekivu mai Papiloni makawa me yacova mai na gauna qo. Na tikina e 44 e parofisaitaka na ka ena yaco:
“Ena vakarautaka na Kalou ni lomalagi e dua na matanitu ena sega sara ni vakarusai. Ena sega ni soli na matanitu qo vua e dua tale na tamata. Ena vurumemeataka, ena vakawabokotaki ira na veimatanitu kece qori, ena tu ga me tawamudu.”
Na parofisai qori kei na so tale e vakaraitaka ni Matanitu ni Kalou ena sosomitaka na veiliutaki kece vakatamata. Ena dei na kena veiliutaki qai kauta mai na veivakalougatataki e vuravura. Ena vakacava na bula ni sa veiliutaki na Matanitu ni Kalou? Raica mada e vica na yalayala totoka ena yaco dina.
SEGA TALE NA IVALU
Same 46:9: “[Na Kalou] ena mai vakaotia . . . na ivalu e vuravura taucoko. E musuka o koya na dakaititi qai vorolaka na moto, e vakama na qiqinivalu ena bukawaqa.”
Raitayaloyalotaka mada ni sa na sega ni vakayagataki na kila kei na ilavo ena iyaragi vakaniukilia e veivakamatei tiko ena levu na vanua nikua. Sa na vakayagataki na kila kei na ilavo qori ena veivuke eda vinakata dina tu na lewenivanua! Qori na ka ena vakayacora na Matanitu ni Kalou.
SEGA NA TAUVIMATE
Aisea 33:24: “Ena sega ni kaya e dua na lewenivanua: ‘Au tauvimate.’”
Vakasamataka mada na vuravura sa na sega kina na mateniuto, kenisa, malaria, kei na so tale na mate. Ena sega na valenibula kei na wainimate. Era na marautaka kece na lewe i vuravura na bula uasivi.
SEGA NI LEQA NA KAKANA
Same 72:16: “Ena levu na covuata e vuravura, ena vuabale ena dela ni veiulunivanua.”
Ena sautu o vuravura ena kakana, ena rauti keda kece qai tu vakarawarawa. Sa na sega na waloloi kei na kana vakaca.
SEGA NA MOSI, RARAWA, MATE
Vakatakila 21:4: “[Na Kalou] ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.”
Ena marautaki tawamudu na bula uasivi ena vuravura parataisi! Qori na ka e yalataka na Dauveibuli dauloloma, na Kalou o Jiova.
“ENA YACO DINA”
Vakacava ena yaco dina na yalayala sa cavuti oti mai? E levu era kaya ni totoka na bula e yalataki tu ena iVolatabu, ia e dredre mera vakabauta na vakasama ni bula tawamudu. E sega ni kurabuitaki qori ni se sega ni dua vei keda e bula tawamudu.
Eda bobula tu na kawatamata ina ivalavala ca kei na mate. Dua na gauna balavu noda vakila toka mai na mosi, rarawa, kei na leqa. E levu gona sa matau vei ira na ivakarau ni bula ya. Ia qori e sega ni nona inaki me baleti keda na Dauveibuli na Kalou o Jiova.
Meda vakadeitaka ni na yaco dina na nona yalayala kece, e kaya na Kalou: “Ena sega ni lesu wale vei au, ia ena vakayacora na ka ga au vinakata, ena yaco dina na ka au tala kina.”—Aisea 55:11.
E vakamacalataka na iVolatabu ni Kalou o Jiova e “sega ni lasu rawa.” (Taito 1:2) E levu na ka totoka e yalataka tu me baleta na veigauna se bera mai. E vinaka gona meda veivosakitaka na rua na taro qo: E rawa nida bula tawamudu ena vuravura Parataisi me vaka e yalataki? Na cava meda cakava meda marautaka kina na yalayala ni Kalou? E veivakacegui na isau ni rua na taro qori ena vica na ulutaga e tarava.