Taro na Dauwiliwili

Ke rau tiko taurua ga ena bogi taucoko e dua na tagane kei na dua na yalewa erau sega ni vakawati ena ituvaki e sega ni dodonu, vakacava sa na duri e dua na komiti ni veilewai?

Io, ke sega ni dua na vuna vinaka e caka kina qori qai tiko na ivakadinadina ni rau veiyacovi tawadodonu, sa na duri e dua na komiti ni veilewai.—1 Kor. 6:18.

Me vakasamataka vinaka na ilawalawa qase na ituvaki yadua ni bera ni vakatulewataki me duri na komiti ni veilewai. Kena ivakaraitaki: Erau sa veitaleitaki tiko mai? Rau sa vakasalataki oti ena nodrau dau veimaliwai? Na cava e vakavuna nodrau lai tiko taurua ena bogi taucoko? Rau sa lokuca oti tu? Vakacava e dua na vuna vinaka erau tiko taurua kina, e yaco e dua na ituvaki tawanamaki e vakavuna me rau tiko taurua ena bogi taucoko? (Dauv. 9:11) Rau moce e vei? Ni duidui na ituvaki, ena rairai tiko tale eso na ka mera vakasamataka vinaka na qase.

Ni sa matata ina ilawalawa qase na itukutuku kece, ena qai vakatulewataka ke veiganiti me dua na komiti ni veilewai.