Meda Maqosa Tiko ga ena Cakacaka Vakaitalatala—Tuberi Gonevuli me Dua Nona iTuvatuva Vinaka ni Vuli

Vuna e Bibi Kina: Me rawa ni matua vakayalo nomu vuli iVolatabu, ena vinakati me vakatawana na nona vakasama kei na lomana ena levu tale na ka, me kua ni vulica tiko ga na yavu ni vakavuvuli vakaivolatabu. (Iper. 5:12–6:1) Ia ena vinakati kina na sasaga. Na vuli e okati kina na nona sema na itukutuku vou kei na ka sa kila rawa tiko qai vakasamataka na kena ivakavuvuli yaga. (Vkai. 2:1-6) Nodra vulica na gonevuli mera vuli vakataki ira ena rawa kina nira sauma na taro vakaivolatabu nira vakayagataka na noda ivola vakaivolatabu. Nira gumatua mera muria na ka era vulica era na vorata kina na veivakatovolei era sotava.—Luke 6:47, 48.

Kena iWalewale:

Tukuna vua ni bibi me dau kerea na veivuke i Jiova ena masu ni bera ni vuli.—Joni 14:26; 1 Kor. 2:10.
Ni drau se qai tekivu vuli, uqeti koya me dau vakavakarau vinaka. Vakaraitaka vua na nomu ivola qai vakavulici koya me makataka na vosa se vakasama bibi.
Uqeti koya me vakamacala ena nona vosa. Me kua ni wilika tiko ga na isaunitaro ena ivola me vaka na veitarotarogi.
Uqeti nomu gonevuli me wilika na iVolatabu e veisiga. Vakaraitaka vua na ituvatuva ni wili iVolatabu ena jw.org, e vakabibitaki kina na sala yaga e rawa ni cakava kina qori. Ena vinakati na sasaga me vakamatauni koya me wilika e veisiga na iVolatabu, ia ena yaga vakalevu na sasaga qori.—Same 1:2, 3.
Vakaraitaka vei gonevuli na sala me raica kina na isaunitaro vakaivolatabu ni vakayagataka na Watchtower Library se LAIBRI ENA INTERNET. Vukei koya me kila na ivakaleka ni ivola eda dau vakayagataka ena soqoni.

Tovolea ena Vula Qo:

Ni oti e dua na wase se ulutaga lailai, kerei nomu gonevuli me vakamacalataka vakalekaleka na ka sa vulica. Ke sega nomu vuli iVolatabu, tovolea mo vakamacalataka vakalekaleka e dua na tikinivolatabu se parakaravu ena Vale ni Vakatawa me vakavinakataka nomu wiliwili.