Vukei Nomu Gonevuli me Dei ena Dina

1-2. (a) Na cava era lomalomarua kina eso na vuli iVolatabu mera dei ena dina? (b) Na cava eda na veivosakitaka ena ulutaga qo?

VAKACAVA o a lomalomarua mo iVakadinadina i Jiova ni o lomaleqataka eso na ka? De dua o rerevaki ira oni cakacaka vata, nomu itokani, se nodra tusaqati iko nomu lewenivuvale. Se o nanuma ni dredre mo muria na ivakatagedegede ni Kalou. Ke o sotava qori, o na kila vinaka sara ga na ka ena rairai vakadredretaka tiko nona toso nomu gonevuli me dei ena dina.

² E kila o Jisu ni rere va qori e rawa ni tarova na toso vakayalo. (Maciu 13:​20-22) Ia e vukei ira tiko ga na lomalomarua mera muri koya. E cakava qori ni vukei ira nona tisaipeli (1) mera kila na ka e vakadredretaka nodra toso, (2) mera saga mera lomani Jiova vakalevu, (3) mera veisautaka na ka era vakaliuca, kei na (4) na sala mera vosota kina na veitusaqati. Mera dei ena dina noda gonevuli, eda na muria vakacava na ka e tukuna o Jisu vei ira nona tisaipeli nida vakayagataka tiko na ivola Marau me Tawamudu!?

VUKEI NOMU GONEVULI ME KILA NA KA E VAKADREDRETAKA NONA TOSO

3. Na cava e vakadredretaka me tisaipeli i Jisu o Nikotimo?

³ O Nikotimo e dua na nodra turaga na Jiu. Ia e dua na ka e vakadredretaka tiko me dua kina na tisaipeli i Jisu. Ni oti ga e rauta ni ono na vula nona cakacaka vakaitalatala o Jisu, e vakadeitaka o Nikotimo ni talai koya mai na Kalou. (Joni 3:1, 2) Ia e lako vunivuni vei Jisu ni “rerevaki ira na Jiu.” (Joni 7:13; 12:42) De dua e leqataka ni na kau tani vua e levu na ka ke mani tisaipeli i Jisu.a

4. E vukei Nikotimo vakacava o Jisu me kila na ka e vinakata vua na Kalou?

⁴ E kila vinaka o Nikotimo na lawa, ia e vinakati me vukei me kila na ka e vinakata vua o Jiova. E vukei koya vakacava o Jisu? E solia o Jisu nona gauna vei Nikotimo, me rau veivosaki mada ga ena bogi. E tukuna vakamatata vua o Jisu na ka me cakava me nona tisaipeli: ya me veivutunitaka nona ivalavala ca, me papitaiso ena wai qai vakaraitaka nona vakabauta na Luve ni Kalou.—Joni 3:5, 14-21.

5. Eda na vukea vakacava noda gonevuli me kila na ka e vakadredretaka tiko nona toso?

⁵ Ke sa kila vinaka mada ga nomu gonevuli na iVolatabu, ena rairai vinakati me vukei me kila na ka e vakadredretaka nona toso, me vaka nona cakacaka saumi se nodra veitusaqati nona lewenivuvale. Mo solia gona nomu gauna vua. O rawa ni sureti koya mo drau mai gunuti vata se taubale vata. Ena gauna va qori, ena rawa ni talaucaka mai na leqa e sotava tiko. Mo uqeti koya me cakava na veiveisau baleta ni lomani Jiova, sega ni nona via vakamarautaki iko.

6. O na vukei gonevuli vakacava me yaloqaqa me dei ena dina? (1 Korinica 16:13)

⁶ Ni nuidei o gonevuli ni na vukei koya o Jiova me muria na ivakatagedegede ena iVolatabu, ena yaloqaqa me muria na ka e vulica. (Wilika 1 Korinica 16:13.) Nomu itavi ni veivakavulici e tautauvata ga kei ira na qasenivuli. Ni o vakasamataka lesu nomu gauna ni vuli, na qasenivuli vakacava o dau taleitaka? De dua o koya e vosovoso ni vukei iko ni o rawa ni nuitaki. O koya tale ga e dauveivakavulici vinaka ena iVolatabu, ena sega wale ga ni vakavulica na ka e vinakata o Jiova me cakava, ena vukei koya tale ga me kila ni rawa ni cakava na veiveisau ena veivuke i Jiova. O na cakava vakacava qori?

VUKEI NOMU GONEVULI ME LOMANI JIOVA VAKALEVU

7. E vukei ira vakacava na vakarogoci koya o Jisu mera lomani Jiova vakalevu?

⁷ E kila o Jisu nira na muria nona tisaipeli na ka era vulica ke ra lomani Jiova. Na ka e dau vakavulica e uqeti ira nona tisaipeli mera lomana vakalevu na Tamadra vakalomalagi. Kena ivakaraitaki, e vakatauvatani Jiova kei na dua na tama e solia na ka vinaka vei ira na luvena. (Maciu 7:9-11) De dua eso era vakarogoci Jisu tiko era sega ni vakila na loloma vakatama. Vakasamataka na levu ni nodra marau nira rogoca na ivakatautauvata i Jisu me baleta e dua na tama dauloloma e marautaka nona lesu yani o luvena a yali dede tu. Era kila sara ga kina ni lomani ira vakalevu o Jiova.—Luke 15:20-24.

8. O na vukea vakacava nomu gonevuli me lomani Jiova vakalevu?

⁸ O na vukei nomu gonevuli me lomani Jiova vakalevu ni o vakabibitaka nona itovo ena nomu veivakavulici. Ena gauna kece ni vuli, vukei koya me sema na ka e vulica tiko kei na loloma i Jiova. Ni drau veivosakitaka na ivoli, vakabibitaka na sala e yaga kina vua. (Roma 5:8; 1 Joni 4:10) Ni vakasamataka o gonevuli na levu ni nona lomani koya o Jiova, ena rawa ni uqeti koya me lomani Jiova vakalevu.—Kala. 2:20.

9. Na cava e uqeti Michael me veisautaka nona bula?

⁹ Dikeva mada na ivakaraitaki nei Michael, mai Idonisia. E susu ena dina ia e sega ga ni papitaiso. Ni sa yabaki 18, e lai cakacaka i vanuatani me draiva ni lori lelevu. Toso na gauna e vakawati, e lesu tale i vanuatani me lai cakacaka, ratou tiko ga mai nona vuvale. Ena gauna qori e tekivu vulica na iVolatabu o watina kei luvena yalewa, rau toso sara. Ni sa mate o tinai Michael, e lesu tale i Idonisia me lai qaravi tamana, e vakadonuya tale ga me vulica na iVolatabu. Ni vulica na iwasewase “Vakekeli” ni lesoni 27 ena ivola Marau me Tawamudu!, e tarai koya sara ga. Ni vakasamataka na kena mositi Jiova nona raica ni vakararawataki o Luvena, e luluvu vakalevu. E vakavinavinakataka vakalevu na ivoli, e uqeti koya sara ga me veisautaka nona ivakarau ni bula qai papitaiso.

VUKEI NOMU GONEVULI ME VAKALIUCI JIOVA

10. E vukei ratou vakacava nona tisaipeli o Jisu me ratou veisautaka na ka ratou vakaliuca? (Luke 5:5-11) (Raica tale ga na iyaloyalo.)

¹⁰ E totolo ga nodratou kila na tisaipeli ni Mesaia yalataki o Jisu. Ia e vinakati me ratou vukei me ratou vakaliuca na cakacaka vakaitalatala. Na gauna e sureti rau kina o Pita kei Adriu o Jisu me rau muri koya vakatabakidua, rau sa nona tisaipeli rawa tiko. (Maciu 4:18, 19) E dua tiko nodrau bisinisi ni qoli, e toso vinaka tiko, kena irairai ni rau dau qoli vata kei Jemesa kei Joni. (Mari. 1:16-20) Ni tukuni ni rau “biuta na nodrau lawa” o Pita kei Adriu, de dua rau sa tuvanaka oti tu na ka me bula kina nodrau vuvale ni rau sa lai muri Jisu. Na cava e uqeti rau me rau veisautaka na ka rau vakaliuca? E tukuni ena ivola i Luke ni cakava o Jisu e dua na cakamana, e vaqaqacotaka sara ga nodrau vakabauta ni na vakarautaka o Jiova na ka me ratou bula kina.—Wilika Luke 5:5-11.

11. Na cava o rawa ni talanoataka vei nomu gonevuli me vaqaqacotaka nona vakabauta?

¹¹ Eda sega ni cakamana me vakataki Jisu, ia eda rawa ni talanoataka na sala e tokoni ira kina na vakaliuci koya o Jiova. Kena ivakaraitaki, o se nanuma tiko na sala e vukei iko kina o Jiova ni o tekivu lako ena soqoni? De dua o lai raici nomu boso mo vakamacalataka na vuna o na sega ni ovataimi kina ni o na calata na soqoni. Ni o talanoataka tiko na ka o sotava vei nomu gonevuli, vakamacalataka vua na sala e vaqaqacotaka kina nomu vakabauta nomu raica ni tokona o Jiova nomu vakatulewa mo vakaliuca nona sokalou.

12. (a) Na cava me duidui kina na tacida eda sureta ena vuli iVolatabu? (b) O na vakayagataka vakacava na vidio ni o veivakavulici? Tukuna na kena ivakaraitaki.

¹² Ena yaga tale ga vei nomu gonevuli ni rogoca na veiveisau era cakava eso tale na tacida mera vakaliuci Jiova. Sureti ira gona na mataveitacini e duidui nodra isususu mera tomani iko ena caka vuli. Mo kerei ira mera talanoataka na sala era mai kila kina na dina, kei na ka era cakava mera vakaliuca nodra qaravi Jiova. Kena ikuri, drau sarava vata na vidio ena iwasewase na “Vakekeli” se na “iKuri” ena ivola Marau me Tawamudu! Kena ivakaraitaki, ni drau vulica tiko na lesoni 37, o rawa ni vakamacalataka eso na ivakavuvuli ena vidio Ena Vakarautaka o Jiova na ka Eda Gadreva.

VUKEI NOMU GONEVULI ME VOSOTA NA VEITUSAQATI

13. E vakarautaki ratou vakacava nona tisaipeli o Jisu ena veitusaqati?

¹³ E tukuna vakavica o Jisu vei ira nona imuri nira na vakacacani se tusaqati, vei ira mada ga na wekadra. (Maciu 5:11; 10:22, 36) Ni sa voleka ni cava nona cakacaka vakaitalatala, e vakasalataki ratou nona tisaipeli ni rawa ni ratou vakamatei. (Maciu 24:9; Joni 15:20; 16:2) E tukuna me ratou qaqarauni ena cakacaka vakaitalatala. E vakasalataki ratou me ratou kua ni veiba kei ira na dauveitusaqati, ia me ratou yalomatua me rawa ni ratou vunau tiko ga.

14. Eda na vukea vakacava e dua noda gonevuli ena veitusaqati? (2 Timoci 3:12)

¹⁴ Eda na vukei noda gonevuli ena veitusaqati nida vakamacalataka na ka me namaka nira na tukuna o ira era cakacaka vata, nodra itokani, kei na wekadra. (Wilika 2 Timoci 3:12.) E rawa nira vakalialiai koya o ira era cakacaka vata ni sa veisautaka nona ivakarau ni bula. O ira mada ga na wekana voleka e rawa nira vakalewa na ka e sa mai vulica ena iVolatabu. Na totolo ga ni noda vakarautaki ira noda gonevuli mera namaka na veitusaqati, era na kila na ka mera cakava ena gauna qori.

15. Na cava e rawa ni cakava o gonevuli ni tusaqati vei ratou e vale?

¹⁵ Ke ra tusaqati nomu gonevuli o ira na lewe ni nona vuvale, uqeti koya me vakasamataka se cava e vakavuna nodra cudru. De dua era nanuma ni sa vakacalai tiko, se ra dau raicalataki keda tu ga na iVakadinadina i Jiova. O Jisu mada ga a raicalataki vei ratou na wekana voleka. (Mari. 3:21; Joni 7:5) Mo vakavulici nomu gonevuli me vosovoso tiko ga qai vosa vakayalovinaka ena gauna kece, wili kina vei ratou nona lewenivuvale.

16. Eda na vukea vakacava noda gonevuli me vakamacalataka nona vakabauta?

¹⁶ Ke ra tataleitaki mada ga na wekai gonevuli, e ka vakayalomatua me kua ni vakamacalataka na ka kece ena dua ga na gauna. Ke cakava qori, e rawa nira curuoso, era na sega tale ni via veivosaki ena dua tale na gauna. Vakayaloqaqataki koya gona me vakamacalataka vakalalai na ka e vakabauta me rawa ni tomani tale na veivosaki. (Kolo. 4:6) De dua ena rawa ni tukuna vei ira na wekana mera rai ena jw.org. Nira cakava qori, ena qai vakatau vei ira na gauna era na rai kina, me rawa nira kilai keda vinaka na iVakadinadina i Jiova.

17. O na vukei nomu gonevuli vakacava me sauma na ka e dau tarogi me baleti keda? (Raica tale ga na iyaloyalo.)

¹⁷ O rawa ni vakayagataka na iwasewase “Taro e Tarogi Wasoma” ena jw.org, mo vukei nomu gonevuli me vakarautaka na ivakamacala rawarawa nira tarogi koya na wekana kei ira era cakacaka vata. (2 Tim. 2:24, 25) Ni cava na lesoni kece ena ivola Marau me Tawamudu!, drau lesuva na iwasewase “Ka Era Kaya Eso.” Uqeti nomu gonevuli me vakatovotovotaka na ka me tukuna ena nona vosa ga. Kua ni tu suka mo vakatututaka vua na sala me vakavinakataka kina nona ivakamacala. Na ka drau cakava qori ena rawa ni vakamacalataka kina nona vakabauta ena yaloqaqa.

18. O na vukei nomu gonevuli vakacava me wasea nona vakabauta ena cakacaka vakaitalatala? (Maciu 10:27)

¹⁸ E uqeti ira nona tisaipeli o Jisu mera vunautaka na itukutuku vinaka. (Wilika Maciu 10:27.) Na totolo ga ni nona wasea o gonevuli na ka e vakabauta, ena totolo tale ga ni vulica me nuitaki Jiova. O na vukei nomu gonevuli vakacava me nona isausau qori? Ni kacivaki ena ivavakoso na vunau lavotaki, vukei koya ena ka me cakava me rawa kina ni dua na dautukutuku. Vakamacalataka na vuna era raica kina e levu ni rawarawa mera tekivu vunau ena gauna qori. Ena rawa ni vulica tale ga me vosa e matanalevu ni vakaitavi ena koronivuli ena lomanimacawa. Ni cakava qori, ena vulica me vakamacalataka vinaka nona vakabauta.

VAKARAITAKA NI O NUITAKI NOMU GONEVULI

19. E vakaraitaka vakacava o Jisu ni nuitaki ratou nona tisaipeli? Eda na vakatotomuri koya vakacava?

¹⁹ Ni bera ni lesu i lomalagi o Jisu, e tukuna vei ratou nona tisaipeli ni ratou na sota tale. E sega ni matata vei ratou ni tukuna tiko o Jisu ni ratou na lako i lomalagi. Ia e kauaitaka tiko ga o Jisu nodratou yalodina, sega ni kauaitaka nodratou vakatitiqa. (Joni 14:1-5, 8) E kila ni na taura na gauna me qai matata vei ratou eso na ka, me vaka na inuinui ni bula i lomalagi. (Joni 16:12) Meda nuitaki ira tale ga noda gonevuli nira saga tiko mera vakamarautaki Jiova.

20. E vakaraitaka vakacava e dua na tacida mai Malawi ni nuitaki nona gonevuli?

²⁰ Meda vakanuinui tiko nira via cakava na gonevuli na ka dodonu. Kena ivakaraitaki o Chifundo, e dua na tacida yalewa mai Malawi. E vuli iVolatabu tiko kei na dua na goneyalewa lotu Katolika o Alinafe ena ivola Marau me Tawamudu! Ni rau vulica oti na lesoni 14, e tarogi koya se cava nona rai ni vakayagataka tiko na ivakatakarakara ena sokalou. E cudru sara ga o Alinafe qai kaya, “Ae qori e noqu vakatulewa!” Nanuma sara ga o Chifundo ni sa na sega tale ni via vuli o Alinafe. Ia e yalovosovoso me vakavulici koya tiko ga, e nuitaka tu ni dua na gauna sa na qai matata vua na ka e vulica. Oti e vica na vula, e tarogi Alinafe sara o Chifundo ena taro ena lesoni 34: “Sa yaga tiko vakacava nomu vulica na iVolatabu kei na Kalou dina o Jiova?” E tukuna o Chifundo me baleti Alinafe: “E vakamacalataka e levu na ka vinaka, dua qori noda sega ni vakaitavi na iVakadinadina i Jiova ena ivalavala e cata na iVolatabu.” Oti qori, sa tinia o Alinafe nona vakayagataka na ivakatakarakara, e vakadonui tale ga me papitaiso.

21. Eda na vukei gonevuli vakacava me dei ena dina?

²¹ Eda kila ni o Jiova ga ena “vakatubura,” ia e noda itavi ga meda vukei gonevuli me toso. (1 Kor. 3:7) Eda sega ni vakavulici koya wale ga me kila na ka e vinakata na Kalou me cakava. Eda vukei koya tale ga me bucina me lomani Jiova vakalevu. Kena ikuri, eda na uqeti koya me vakaraitaka na loloma qori ni cakava na veiveisau me vakaliuci Jiova. Eda na vakavulici koya tale ga me nuitaki Jiova ni dredre na ituvaki. Nida vakaraitaka noda nuitaki koya, eda na vaqaqacotaka nona vakabauta ni rawa ni muria na ivakatagedegede i Jiova qai dei ena dina.