Keirau Vuli Tiko ga Vua na Dauniveivakavulici Levu

NODRAU IVAKARAITAKI NOQU ITUBUTUBU

Ena icavacava ni 1950, rau biuti Itali na noqu itubutubu me rau toki i Kindersley, e Saskatchewan, e Kenada. Sega ni dede, rau vulica sara na iVolatabu, keitou vakaliuca tale ga ena neitou bula. Au vakasamataka niu se gone, rauta ni dua taucoko na siga neitou lako ina cakacaka vakavunau vakavuvale, au dau veiwalitaka ga niu se “painia veivuke” tu niu yabaki walu!

Rau dravudravua noqu itubutubu; ia rau ivakaraitaki vinaka ni rau vakuai rau ena vuku i Jiova. Kena ivakaraitaki, ena 1963 rau volitaka e levu na ka rau taukena me rawa kina na sede me keitou tiko ena soqo ni veimatanitu e Pasadena, e Kalifonia, e Merika. Ena 1972, keitou toki i Trail e British Columbia, e Kenada, ya e rauta ni 1,000 na kilomita me keitou veivuke ena yalava ni vosa vakaItali. E dau sasamaki o ta, e sega ni vinakata me tosocake nona itutu me rawa ni vakaliuca tiko ga na ka vakayalo.

Au vakavinavinakataka vakalevu na nodrau ivakaraitaki vinaka na neitou itubutubu vei keitou na gone. Au vulica sara ga e levu na ka me baleta noqu veiqaravi ena nodrau ivakaraitaki, wili kina qo: Keu vakaliuca na Matanitu ni Kalou, o Jiova ena karoni au.—Maciu 6:33.

ITEKITEKIVU NI VEIQARAVI VAKATABAKIDUA

Ena 1980 au vakamautaki Debbie, e dua na goneyalewa totoka e dau yalodina ni qaravi Jiova. Keirau via veiqaravi vakatabakidua, e tekivu painia gona o Debbie ni oti e tolu na vula neirau vakamau. Oti e dua na yabaki neirau vakamau, keirau toki ina dua na ivavakoso lailai e vinakati kina vakalevu na veivuke, au mani tomani koya ena painia.

Toso na gauna keirau yalolailai, keirau sa via toki tale. Ia keirau taro ivakasala vua na ivakatawa ni tabacakacaka. E vakasalataki keirau vakayalololoma, e vakadodonu tale ga. E kaya: “Drau kuria tiko ga na leqa. Drau kauaitaka tiko ga na veika dredre drau sotava. Vacava mo drau raica ga na ka vinaka.” E yaco donu sara ga mai na ivakasala qori. (Same 141:5) Keirau muria sara, keirau raica ni levu dina tu na veika vinaka e dodonu me keirau kauaitaka. E levu ena ivavakoso era via vakalevutaka nodra qaravi Jiova, wili kina o ira na itabagone kei na so na tacida yalewa e sega ni tiko ena dina o watidra. Qori e dua na ka bibi keirau vulica. Me keirau dau raica ga na ka vinaka qai waraki Jiova me vakadodonutaka na ituvaki e nanumi tu ni dredre. (Maika 7:7) Keirau marau tale, toso tale na veiqaravi.

O ratou na tacida ratou veivakavulici ena imatai ni neirau vuli ni painia, ratou a veiqaravi tu mai vanuatani. Ni ratou vakaraitaka tiko na itaba, na veika dredre ratou sotava kei na veivakalougatataki, keirau vinakata sara ga me keirau daukaulotu. Keirau vakadeitaka e keri me neirau isausau qori.

Me keirau sauva qori, keirau toki ena yalava vosa vakaVaranise e Quebec ena 1984, e sivia ni 4,000 na kilomita na kena yawa mai British Columbia. Keirau sa na lai vulica e dua na itovo vou vakavanua kei na vosa. Dua tale na ka dredre, ni lailai neirau sede. Dua na gauna, keirau sa kana ga mai na ivovo ni pateta ena nona iteitei e dua na turaga. E matai sara o Debbie me vakasaqara na veimataqali icakacaka ni pateta! E levu dina na ka dredre, ia keirau saga me keirau marau tiko ga. Koya e bibi sara, keirau raica tu ga na liga i Jiova.—Same 64:10.

Dua na siga, e lako mai e dua na qiri keirau sega ni namaka. Keirau sureti me keirau lai veiqaravi ena Peceli e Kenada. Keirau marautaka na veisureti qori, ena gauna vata qori keirau rarawa tale ga ni keirau sa vakalewe fomu oti tu ena vuli e Kiliati. Ia keirau mani vakadonuya. Ni keirau yaco i Peceli, keirau tarogi Brother Kenneth Little sara, e lewe ni Komiti ni Tabana, “Vacava neirau fomu ni vuli e Kiliati?” E kaya mai: “Tou na qai raica qori ke drau sureti.”

Oti e dua tale na macawa, keirau sa sureti kei Debbie ena vuli e Kiliati. E vinakati me keirau vakatulewa. E kaya vei keirau o Brother Little: “Se cava ga drau vakatulewataka, eso na siga drau na diva mo drau digia e dua tale na ilesilesi. E tautauvata kece vei Jiova na ilesilesi, ena vakalougatataka.” Keirau mani vakadonuya na veisureti e Kiliati, ni toso na gauna keirau vakadinadinataka na ivakasala nei Brother Little. Keirau dau tukuna tu ga nona ivakasala vei ira era lomalomaruataka na ilesilesi mera qarava.

BULA VAKADAUKAULOTU

Keirau marau me keirau dua vei ira na le 24 na gonevuli ena ika83 ni kalasi e Kiliati e caka e Brooklyn, Niu Yoka, ena Epereli 1987. O rau na neimami dauniveivakavulici o Brother Ulysses Glass kei Jack Redford. E totolo tu ga na vuli e lima na vula, keimami tauri ivola ena ika6 ni Seviteba, 1987. Keirau lesi sara i Haiti kei rau o John kei Marie Goode.

Na iotioti ga ni gauna era lesi kina i Haiti na daukaulotu ya ena 1962, nira vakaukauataki na vo ni daukaulotu mera biuta na vanua qori. Oti e tolu na macawa neirau tuvaitutu, keirau sa lai veiqaravi e Haiti, ena dua na ivavakoso lailai e 35 na kena dautukutuku e tiko ena veiulunivanua. Keirau se gone, e levu na ka me keirau vulica, keirau ga keirau tawana tu na vale ni daukaulotu e kea. Era dravudravua vakalevu na lewenivanua, levu tale ga era sega ni kila na wilivola. Ena itekitekivu ni neirau daukaulotu, keirau donuya na leqa vakapolitiki, era via vuaviri, era vakamakama, keirau donuya tale ga na cagilaba.

Era yaloqaqa tu ga na mataveitacini e Haiti, era mamarau. E levu sara na ka keirau vulica vei ira. Levu e dredre sara nodra bula, ia era lomani Jiova, era taleitaka tale ga na cakacaka vakavunau. Dua na tacida yalewa itabaqase e sega ni kila na wilivola, ia e rawa ni cavuqaqataka e rauta ni 150 na tikinivolatabu. Na ituvaki ni vanua qori e uqeti keirau me keirau vunautaka tiko ga na itukutuku vinaka ni Matanitu ni Kalou, e iwali duadua ga ni leqa ni kawatamata. Dua na ka neirau marau nira toso na imatai ni neirau vuli iVolatabu mera painia tudei, painia lavotaki, mera qase ni ivavakoso tale ga.

Niu tiko e Haiti, au sota kei na dua na cauravou o Trevor, e daukaulotu ni Momani. Vakavica neirau dau veivosakitaka na iVolatabu. Oti e vica na yabaki, e volavola mai vei au, au sega sara ga ni namaka. E vola: “Au sa na papitaiso ena soqo ni tabacakacaka mai qo! Au na via lesu i Haiti meu lai painia lavotaki ena vanua ga au daukaulotu tu kina ni Momani.” E qai lai veiqaravi dina e kea me vica na yabaki kei watina.

MAI UROPE I AFERIKA

Keirau a lesi ena so na vanua e Urope sa dola tale kina na cakacaka vakavunau. Ena 1992 keirau yaco yani i Ljubljana, e Slovenia, volekata sara ga na vanua rau susu kina o Ta kei Na ni bera ni rau toki i Itali. Se carubi tiko ga na ivalu ena veivanua vakaYugoslavia. E qarava tiko na cakacaka ena vanua qori na valenivolavola ni tabana e Vienna e Austria, kei na valenivolavola e Zagreb e Croatia, kei Belgrade e Serbia. Ia na matanitu e tugalala e sa na dua ga na kena Peceli.

Ena vinakati gona me keirau vulica e dua tale na vosa kei na itovo vakavanua. Era dau kaya na tiko e kea, “Jezik je težek,” kena ibalebale “E vosa dredre.” Io, e dredre dina! Keirau qoroya nodra yalodina na mataveitacini era yalorawarawa mera muria na veiveisau ena isoqosoqo, kei na sala e vakalougatataki ira kina o Jiova. Keirau raica tale na sala e vakadodonutaka kina o Jiova na ituvaki ena gauna donu. Levu na ka keirau vulica mai e lai yaga e Slovenia, keirau vulica tale ga e kea eso na ka vou.

Ia e levu tale na veiveisau. Ena 2000 keirau lesi i Côte d’Ivoire, ena Ra kei Aferika. Ni yaco na ivalu ena Noveba 2002, keirau mani tokitaki i Sierra Leone. Se qai oti sara ga nodra veivaluvaluti na lewenivanua me 11 na yabaki. E dredre sara ga me keirau biubiu vakasauri e Côte d’Ivoire. Ia na ka kece keirau vulica mai e vakavuna me keirau marau tiko ga.

Keirau kauaitaka tiko ga na vuavuaivinaka ni yalava kei na nodra vosota na ivalu na mataveitacini me vica vata na yabaki. Era dravudravua, ia era via wasea na ka e tu vei ira. Dua na tacida yalewa e via solia vei Debbie eso na isulu. E sega ni via taura o Debbie, ia e cikevi koya tiko ga na tacida qori qai kaya: “Ena gauna ni ivalu era dau tokoni keimami na mataveitacini ena so tale na vanua. Ia qo, keimami sa na cakava qori.” Keirau saga sara ga me keirau vakatotomuria na nodra ivakaraitaki.

Keirau mani lesu i Côte d’Ivoire, ia e qai yaco tale na tikoyavavala. Ena Noveba 2004, keirau kau gona ena elikopta kei na neirau dui kato, e 10 ga na kilokaramu dua na kato. Keirau moce ena fuloa ni nodratou keba na sotia ni Varanise ena bogi ya, ena siga e tarava keirau vuka sara i Suwitisiladi. Ni keirau yaco yani ena bogilevu ena valenivolavola ni tabana, e tavaki keirau mai o ratou na lewe ni Komiti ni Tabana, o ratou na dauniveivakavulici ena Koronivuli ni Vuli Veiqaravi Vakaitalatala, kei na dui watidratou, eratou mokoti keirau, e vakarautaki tu na kakana katakata, kei na levu na jokeliti. E tarai keirau sara ga qori.

Keirau lesi vakalekaleka i Ghana, oti ya keirau lesu tale i Côte d’Ivoire ni sa malumu na tikoyavavala. Na nodra yalovinaka na mataveitacini e vukei keirau me keirau vosota na veitokiyaki, kei na neirau ilesilesi me keirau qarava ga ena dua na gauna lekaleka. Eda dau kilai tani na tamata i Jiova ena noda veilomani, ia keirau vakadeitaka kei Debbie me keirau kua vakadua ni vakawalena na nodra loloma na tacida. Keirau sa qai liaca ni gauna dredre kece qori, e levu na ka yaga keirau vulica kina.

GOLE INA TOKALAU E LOMA

Ena 2006 eratou volavola mai na itikotiko liu ni sa na dua neirau ilesilesi vou ena Tokalau e Loma. Keirau na vulica tale e keri eso na ka vovou, me vaka na vosa, na itovo vakavanua kei na ituvaki dredre. Levu eke na leqa vakapolitiki kei na veika vakalotu. Keirau taleitaka na veimataqali vosa ena duidui ivavakoso, keirau raica tale ga na duavata ni muri na veidusimaki ni isoqosoqo. Keirau qoroya nodra yaloqaqa na tacida nira vosota na nodra veitusaqati na lewenivuvale, e koronivuli, vanua ni cakacaka, kei ira na tiko veitikivi.

Keirau tiko ena soqo lavotaki e Tel Aviv e Isireli ena 2012. Qo se qai imatai ni soqo ni veiwasewase era tiko kina vakalewe levu na tamata i Jiova ena vanua qo, se caka sara ena Penitiko 33 G.V. Qo e dua na soqo guiguilecavi dredre!

Ena gauna qori keirau lesi me keirau lai veisiko ena dua na matanitu e vakadredretaki tu kina noda cakacaka. Keirau kauta eso noda ivola, keirau vunau, keirau tiko tale ga ena vica na soqo ni tabacakacaka. Era yadra tu na sotia ena levu na vanua, era vakaiyaragi tu, ia keirau taqomaki ni keirau qaqarauni ena neimami veitosoyaki tiko kei na vica na dautukutuku.

LESU I AFERIKA

Ena 2013, e dua tale neirau ilesilesi e duatani sara, me keirau lai veiqaravi ena Peceli e Kinshasa, e Congo. Qo e dua na matanitu levu, e vanua rairai totoka, ia e kilai nira dravudravua sara qai levu kina na ivalu. Keirau tukuna ga: “Keirau sa kilai Aferika tu, keirau sa tu vakarau me keirau lako.” Ia se levu na ka me keirau vulica, vakabibi ni keirau lakova na veivanua e sega kina na gaunisala kei na ikawakawa se wavu. Levu na ka vinaka me keirau kauaitaka, wili kina nodra vosota kei na nodra mamarau tu ga na tacida ni dredre mada ga na bula vakailavo, nodra taleitaka na vunau, kei na nodra sasaga mera tiko ena soqoni kei na soqo lelevu. Keirau raica sara ga na vuavuaivinaka ni cakacaka ena veitokoni duadua ga i Jiova kei na nona veivakalougatataki. Na balavu ni gauna keirau veiqaravi tiko kina e Congo, e levu sara na ka yaga keirau vulica kina, keirau lewena tale ga e dua na vuvale levu.

Ni cava na 2017, e dua tale neirau ilesilesi vou, o Sauca Aferika. Qo e dua na valenivolavola ni tabana levu duadua me keirau veiqaravi kina, e vou tale ga vei keirau na neirau ilesilesi e Peceli. Io, se levu tale na ka me keirau vulica, ia e yaga vakalevu na ka keirau sa vulica mai. Keirau lomani ira e levu na tacida era vosota tu mai ena yalodina me vicasagavulu na yabaki. Keirau qoroya tale ga nodra duavata na lewenivuvale e Peceli nira cavutu mai na duidui vanua, e duidui tale ga nodra itovo vakavanua. E kilai sara ga ni vakalougatataka o Jiova nodra veiyaloni nira sulumaka na itovo vou, era muria tale ga na ivakavuvuli vakaivolatabu.

Ena veiyabaki sa sivi, e levu na neirau ilesilesi kei Debbie, keirau vulica na ivakarau ni bula vou, kei na vosa vovou. E sega ni rawarawa dina, ia keirau raica tu ga na dei ni loloma i Jiova ena nona isoqosoqo kei ira na mataveitacini. (Same 144:2) Keirau vakadinadinataka ni veika keirau vulica ena veiqaravi vakatabakidua, keirau mai dua kina na dauveiqaravi vinaka i Jiova.

Au vakavinavinakataka nodrau veisusu na noqu itubutubu, nona veitokoni noqu daulomani o Debbie, kei na nodra ivakaraitaki vakasakiti na mataveitacini. Ni keirau vakanamata tu ena gauna se bera mai, keirau vakadeitaka me keirau vuli tiko ga vua na Dauniveivakavulici Levu.