Wěma nukɔntɔn e è wlán sɛ́dó Kɔlɛ́ntinu lɛ́ é

8 Din ɔ, xó e un ɖó bo ná ɖɔ dó nǔɖuɖu e è xwlé vodún lɛ́ é wú é ɖíe: Mǐ tuun ɖɔ mǐ mɛ bǐ wɛ tuun nǔ. Nǔtuuntuun nɔ zɔ́n bɔ è nɔ yí go, amɔ̌, wǎnyíyí nɔ bló bɔ è nɔ lí dǒ. 2 Ényí mɛ ɖěbǔ lin ɖɔ émí tuun nǔɖé ɔ, é ko tuun nǔ ɔ lěe é ɖó ná tuun gbɔn é ǎ. 3 Amɔ̌, ényí mɛ ɖěbǔ yí wǎn nú Mawu ɔ, Mawu tuun mɛ énɛ́.

4 Din ɔ, mi nú mǐ ní ɖɔ xó dó nǔɖuɖu e è xwlé vodún lɛ́ é ɖuɖu wú: Mǐ tuun ɖɔ vodún kún nyí nǔtí ó, bo lɛ́ tuun ɖɔ Mawu ɖokpó wɛ ɖe. 5 Ðó nǔ gěgé wɛ ɖo jǐxwé alǒ ayǐkúngban jí bɔ mɛ lɛ́ nɔ ylɔ́ ɖɔ “mawu,” lobɔ nǔgbó ɔ, “mawu” gěgé kpó “aklúnɔ” gěgé kpó wɛ tíin có, 6 nú mǐdɛɛ lɛ́ ɔ, Mawu ɖokpó wɛ ɖe, é wɛ nyí Tɔ́ ɔ, é wɛ ɖó nǔ lɛ́ bǐ, bɔ mǐ ɖo gbɛ n’i; Aklúnɔ ɖokpó wɛ ɖe, é wɛ nyí Jezu Klísu, jǐ tɔn wɛ è bló nǔ lɛ́ bǐ gbɔn, bɔ mǐ ɖo gbɛ gbɔn jǐ tɔn.

7 É ɖo mɔ̌ có, mɛ bǐ wɛ ɖó mɔjɛmɛ énɛ́ ǎ. Mɛɖé lɛ́ tíin bɔ ɖó yě ko sɛn vodún ɖ’ayǐ wútu ɔ, ényí yě ɖo nǔ ɖu wɛ bo kpɔ́n dó mɔ nǔ e è xwlé vodún é ɔ, ayixa yětɔn nɔ xo hun xá yě, ɖó é ɖó gǎn ǎ wútu. 8 Amɔ̌, nǔɖuɖu wɛ ná zɔ́n bɔ mǐ ná sɛkpɔ́ Mawu ǎ; ényí mǐ ma ɖu ǎ ɔ, nǔɖé ná gú mǐ ǎ, ényí mǐ ka ɖu ɔ, é ná hɛn le ɖé wá nú mǐ ǎ. 9 Amɔ̌, mi hɛn ayi dó miɖée wú, bónú acɛ e mi ɖó bo ná wá gbeta lɛ́ kɔn é ma wá nyí afɔklɛ́nnú nú mɛ e ma ɖó gǎn ǎ lɛ́ é ɖo ali ɖé nu ó. 10 Ðó ényí hwi mɛ e tuun nǔ é ɖo nǔ ɖu wɛ ɖo vodúnxɔ mɛ, bónú mɛ ɖěbǔ e ayixa tɔn ma ɖó gǎn ǎ é mɔ we ɔ, énɛ́ ná ná ɛ adɔgbígbó bɔ é ná ɖu nǔɖuɖu e è xwlé vodún lɛ́ é ǎ cé? 11 Mɔ̌ mɛ ɔ, nǔtuuntuun towe ná zɔ́n bɔ mɛ e ma ɖó gǎn ǎ é, énɛ́ wɛ nyí nɔví towe e tamɛ Klísu kú dó é ná dɔn.* 12 Ényí mi nɔ hu hwɛ dó nɔví mitɔn lɛ́ gbɔn mɔ̌, bo nɔ d’akpa ayixa yětɔn e ma ɖó gǎn ǎ é wú ɔ, Klísu hu hwɛ dó wɛ mi ɖe. 13 Énɛ́ wú ɔ, ényí nǔɖuɖu wɛ ná zɔ́n bɔ nɔví ce ná klɛ́n afɔ ɔ, un sɔ́ ná ɖu lan gbeɖé ǎ, mɔ̌ mɛ ɔ, un ná nyí afɔklɛ́nnú nú nɔví ce ǎ.