Nǔnywɛ́xó
1 Nǔnywɛ́xó Salomɔ́ɔ, Davídi ví, éé nyí axɔ́sú Izlayɛ́li tɔn é tɔn lɛ́:
2 Nǔnywɛ́xó énɛ́ lɛ́ nɔ bló bɔ è nɔ nyɔ́nǔi,* yě nɔ ná kplɔ́n mɛ;
yě nɔ bló bɔ è nɔ mɔ nǔ jɛ nǔnywɛ́ sín xó lɛ́ wú;
3 yě nɔ ná kplɔ́n e nɔ zɔ́n bɔ è nɔ ɖó nukúnnúmɔjɛnǔmɛ,
nɔ wa nǔ jlɔ́jlɔ́, nɔ ɖɔ hwɛ jlɔ́jlɔ́, bo nɔ lɛ́ ɖɔ nǔgbó é* mɛ;
4 yě nɔ bló bɔ mɛ e ma mɔ nǔ kpɔ́n ǎ lɛ́ é nɔ nɔ acéjí;
yě nɔ ná nǔtuuntuun kpó nǔwúkpíkpé tamɛ linlin tɔn kpó mɛ wínnyáwínnyá lɛ́.
5 Mɛ e ɖó nǔnywɛ́ é nɔ ɖótó wěɖexámɛ bo nɔ kplɔ́n nǔ d’é jí;
mɛ e ɖó nukúnnúmɔjɛnǔmɛ é nɔ tɛ́n kpɔ́n bɔ è nɔ xlɛ́ ali i kpó azɔ̌tuuntuun* kpó,
6 é nɔ mɔ nǔ jɛ nǔnywɛ́xó kpó xó e gɛ́dɛ́ é* kpó mɛ,
énɛ́ wɛ nyí nǔnywɛ́tɔ́ lɛ́ sín xó kpó lǒ yětɔn lɛ́ kpó.
7 Sísí e gɔ́ngɔ́n é ɖíɖó* nú Jexóva wɛ nyí fí e nǔtuuntuun bɛ́ sín é.
Xlonɔ lɛ́ kɛ́ɖɛ́ jɛ́n nɔ gɔn ya ké nú nǔnywɛ́ kpó kplɔ́n e è ná yě é kpó.
9 Jɛ̌gbákún ɖɛkpɛ ɖɛkpɛ wɛ yě nyí ɖo ta towe,
bo nyí kɔjɛ́ ɖagbe ɖagbe ɖo kɔ towe.
10 Vǐ ce, ényí hwɛhutɔ́ lɛ́ tɛ́n kpɔ́n bo ná dɔn we hǔn, ma lɔn ó.
11 Ényí yě ɖɔ: “Xwedó mǐ.
Wǎ mǐ ní tɔ wu bá kɔn hun kɔn nyi ayǐ.
Mǐ ná hɔn hwlá cí nǔglɔ́, bo ná ɖo te kpɔ́n xomɛvɔ́nɔ lɛ́ dó ɖe ayi ɖ’ayǐ.
12 Mǐ ná mì yě gbɛɖe Yɔdo* ɖɔhun,
mǐ ná mì yě kpéte mɛ ɖěɖěe ɖo domɛ yi wɛ lɛ́ é ɖɔhun.
13 Mǐ ní bɛ́ nǔ xɔ akwɛ́ yětɔn lɛ́ bǐ;
mǐ ná bɛ́ nǔ e mǐ bɛ́ ɖo ahwangbénu lɛ́ é gɔ́ xwé mǐtɔn lɛ́.
15 Vǐ ce, ma xwedó mɛ mɔ̌hun lɛ́ ó.
17 É ɖo wɛn ɖɔ yǎyá wɛ mɔ e è ɖó nú xɛ ɖo xɛ nukúnmɛ gannaganna é ná nyí.
18 Nǔ e wú yě mɛ énɛ́ lɛ́ nɔ tɔ wu bo ná dó kɔn hun kɔn nyi ayǐ é nɛ́;
yě nɔ hɔn hwlá cí nǔglɔ́ bá dó gblé gbɛ dó nú mɛ ɖěvo lɛ́.
19 Mɔ̌ wɛ mɛ e nɔ wa nǔ agɔ dó ɖu le lɛ́ é nɔ wa nǔ gbɔn,
bɔ le e yě nɔ ɖu é wɛ ná gblé gbɛ dó nú yě.
20 Nǔnywɛ́ jɔ nǔnywɛ́ ɖo xó sú wɛ syɛ́nsyɛ́n ɖo ali jí.
É nɔ zé gbe dó jǐ ɖo tokplétɛn lɛ́.
21 É nɔ ɖo xó sú wɛ ɖo ali e jí gbɛtɔ́ sukpɔ́ ɖe lɛ́ é sín alikpléhɔ̌nkantɛn.*
É nɔ ɖo ɖiɖɔ wɛ ɖo hɔntogbó toxo ɔ tɔn lɛ́ ta ɖɔ:
22 “Mi mɛ e ma mɔ nǔ kpɔ́n ǎ lɛ́ é mi, káká jɛ hwetɛ́nu mi ka ná yí wǎn nú vimɛninɔ yi jɛ?
Mɛcákotɔ́ lɛ́ mi, káká jɛ hwetɛ́nu mɛcáko ka ná nɔ víví nú mi yi jɛ?
Xlonɔ lɛ́ mi, káká jɛ hwetɛ́nu mi ka ná gbɛ́ wǎn nú nǔtuuntuun yi jɛ?
23 Ényí un kɛ nu dó nǔ wú nú mi hǔn, mi ɖótó bo lɛ́ kɔ.
Énɛ́ ɔ, un ná gba gbigbɔ ce kɔn nyi mi jí;
un ná bló bɔ mi ná tuun xó ce lɛ́.
24 Ðó un sú xó ylɔ́ mi, amɔ̌, mi gbɛ́ tó ɖó mì,
un kɛ alɔ nú mi, amɔ̌, mɛ ɖěbǔ kpɔ́n jɛ ce jí ǎ,
25 mi nɔ dó vɛ̌ nú wěɖexámɛ ce lɛ́ bǐ,
bo nɔ gbɛ́ nu e un kɛ dó nǔ wú nú mi é,
26 nyi lɔ ná ko mi hwenu e awě ná xo mi é;
un ná cá nú mi hwenu e nǔ e ɖi xɛsi ná wɛ mi ɖe tawun é ná wá é,
27 hwenu e nǔ e ɖi xɛsi ná wɛ mi ɖe tawun é ná wá jɔhɔn ɖaxó ɖɔhun,
bɔ awě e ná xo mi é ná wá axásáxásá jɔhɔn syɛ́nsyɛ́n ɖɔhun é,
hwenu e aluwɛ kpó adohu adohu kpó ná wá mi jí é.
28 Hwenɛ́nu ɔ, yě ná nɔ ylɔ́ mì, amɔ̌, un ná nɔ kɛ nu d’é mɛ nú yě ǎ;
yě ná ba mì nukún myámyá, loɔ, yě ná mɔ mì ǎ,
29 ɖó yě gbɛ́ wǎn nú nǔtuuntuun,
bo nɔ ba ná ɖó sísí e gɔ́ngɔ́n é nú Jexóva ǎ.
30 Yě gbɛ́ wěɖexámɛ ce;
yě ɖó sísí nú nu e un kɛ dó nǔ wú nú yě lɛ́ é ɖě ǎ.
32 Ðó gǔfínfɔ́n mɛ e ma mɔ nǔ kpɔ́n ǎ lɛ́ é tɔn ná hu yě,
bɔ yamakénúnǔ xlonɔ lɛ́ tɔn ná sú kún dó nú yě.
33 Amɔ̌, mɛ e nɔ ɖótó mì é ná nɔ ayijayǐ mɛ,
é ná ɖi xɛsi nú awěxomɛ ǎ.”