Ezayíi
14 Ðó Jexóva ná kú nǔbláwǔ nú Jakɔ́bu, bo ná lɛ́vɔ́ sɔ́ Izlayɛ́li. É ná sɔ́ yě ɖó* to yětɔn mɛ, bɔ toɖévomɛnu lɛ́ ná xo kpóɖó nú yě bo ná tɛ́ dó kúnkan Jakɔ́bu tɔn wú. 2 Gɔ́ ná ɔ, togun lɛ́ ná kplá yě wá nɔtɛn yěɖésúnɔ tɔn, bɔ togun énɛ́ lɛ́ ná nyí mɛsɛntɔ́ súnnu kpó nyɔ̌nu kpó nú togun Izlayɛ́li tɔn ɖo ayǐkúngban e Jexóva ná yě é jí; yě ná sɔ́ mɛ ɖěɖěe sɔ́ yě dó ɖó kannumɔ ɖ’ayǐ lɛ́ é dó ɖó kannumɔ, bo ná kp’acɛ dó mɛ ɖěɖěe hɛn yě gǎnnugǎnnu ɖ’ayǐ bónú yě ná w’azɔ̌ lɛ́ é* jí.
3 Azǎn e gbe Jexóva ná ɖe we sín wǔvɛ́ towe kpó adohu adohu syɛ́nsyɛ́n towe kpó mɛ, bo ná ɖe we sín kannumɔgbénu syɛ́nsyɛ́n e a ɖe é, lobo ná ná gbɔjɛ we é ɔ, 4 a ná dó lǒ élɔ́ dó axɔ́sú Babilɔ́nu tɔn wú dó cá ɛ ko:*
“Lěe mɛ e nɔ hɛn mɛ ɖěvo lɛ́ gǎnnugǎnnu bónú yě ná wa azɔ̌ é* sín xó fó gbɔn é ɖíe a!
Lěe kɔgbídínúmɛ ɔ fó gbɔn é ɖíe a!
5 Jexóva wɛ́n mɛ nyanya ɔ sín kpo,
é wɛ́n acɛkpatɔ́ lɛ́ sín kpo,
6 é sú kún dó nú mɛ e nɔ ɖo togun lɛ́ xo wɛ kpó xomɛsin syɛ́nsyɛ́n kpó magbokɔ é,
éyɛ́ mɛ e nɔ kpa acɛ dó akɔta lɛ́ jí kpó xomɛsin kpó gbɔn ya dídó nú yě magbokɔ gblamɛ é.
7 Din ɔ, ayǐkúngban ɔ blěbú ɖo gbɔjɛ mɛ, è ɖo tagba ɖě dó ná wɛ ǎ.
Mɛ lɛ́ ɖo xó sú wɛ kpó awǎjijɛ kpó.
8 Jenɛvliyéetín lɛ́
kpó sɛ́dlutín Libáan tɔn lɛ́ kpó lɔ tlɛ ɖo awǎ jɛ wɛ ɖó hwɛ wú.
Yě nɔ ɖɔ: ‘Sín hwenu e a j’ayǐ é ɔ,
atíngbotɔ́ ɖě sɔ́ tɔ́n mǐ gbo gbé ǎ.’
9 Akpakpa tlɛ ɖo Yɔdo* e ɖo do é sɔ́ wɛ,
bónú é ná yí we hwenu e a ná wá é.
É sín hwɛ wú bɔ é fɔ́n mɛ ɖěɖěe kú vɔ gǎn ná lɛ́ é,
gǎn kɔgbídínúmɛtɔ́* ayǐkúngban ɔ tɔn lɛ́ bǐ.
É nɔ bló bɔ axɔ́sú akɔta lɛ́ tɔn lɛ́ bǐ nɔ sí te sín axɔ́súzinkpo yětɔn lɛ́ jí.
10 Yě bǐ jɛ xó ɖɔ jí, bo nɔ ɖɔ nú we ɖɔ:
‘Hwi lɔ wá vɔ́ da mǐɖɔhun wɛ a?
A wá cí mǐɖɔhun wɛ a?
11 È dɔn goyíyí towe
kpó kanhún towe lɛ́ sín nǔɖiɖɔ kpó káká wá Yɔdo* mɛ.
Wě lɛ́ kpé glɔ̌ towe zan ɖɔhun,
bɔ wǎnvú lɛ́ nyí wǔcyɔ́n towe.’
12 Hwi mɛ e nɔ kɔ́n é, vǐ súnnu ayǐtéhɔ̌nnu tɔn è,
ayǐ wɛ a jɛ sín jǐnukúnsin lě a!
Hwi mɛ e ɖu ɖo akɔta lɛ́ jí é,
wɛ è gbo zin dɛ́ lě a!
13 A ɖɔ dó ayi mɛ ɖɔ: ‘Un ná hun káká yi jǐnukúnsin.
Un ná sɔ́ axɔ́súzinkpo ce ɖó sunví Mawu tɔn lɛ́ tanu,
bo ná jínjɔ́n só e jí è nɔ kplé ɖe é jí,
ɖo fí e jɛ zɔ hú gǎn ɖo totaligbé lɛ́ é.
14 Un ná hun káká yi akpɔ́kpɔ́ lɛ́ tanu;
un ná bló bo ná cí Ajalɔ̌nlɔn ɔ ɖɔhun.’
15 Loɔ, káká Yɔdo* mɛ wɛ è ná dɔn we yi,
yi fí e gɔ́ngɔ́n hú gǎn ɖo do glɔ́ lɛ́ é.
16 Mɛ e ná mɔ we lɛ́ é ná kpɔ́n we dáán;
yě ná gbéjé we kpɔ́n kpó sɔxwixwe kpó, bo ná nɔ ɖɔ:
‘Nya e nɔ húnhún ayǐkúngban ɔ ɖ’ayǐ é ɖíe a?
Éyɛ́ mɛ e nɔ bló bɔ axɔ́súɖuto lɛ́ nɔ sísɔ́ é ɖíe a?
17 Éyɛ́ mɛ e bló bɔ fí e è nɔ nɔ ɖo ayǐkúngban ɔ jí lɛ́ é cí gbětótló ɖɔhun,
bo sú kún dó nú toxo tɔn lɛ́ é ɖíe a?
Éyɛ́ mɛ e nɔ gbɛ́ ɖɔ émí kún ná jó gantɔ́ émítɔn lɛ́ bónú yě ná yi xwé ó é ɖíe a?’
19 Amɔ̌ hwɛ ɔ, è sɔ́ we nyi gbě bɔ a ɖó yɔdo ɖě ǎ,
a cí kun* e è gbɛ́ wǎn ná é ɖé ɖɔhun,
bɔ mɛ ɖěɖěe è sɔ́ hwǐ dó hu,
bɔ yě yi do e mɛ awǐnnya gɔ́ é sín cyɔ lɛ́ cyɔ́n we.
A cí cyɔ e è gbídí ɖó afɔ wú é ɖé ɖɔhun.
20 A ná xo kpóɖó nú yě ɖo yɔdo mɛ ǎ,
ɖó a sú kún dó nú to hwiɖésúnɔ tɔn,
a hu togun hwiɖésúnɔ tɔn.
È sɔ́ ná ylɔ́ kúnkan nǔnyanyawatɔ́ lɛ́ tɔn sín nyǐkɔ gbeɖé ǎ.
21 Mi sɔ́ nǔ nú mɛhutɛn ɖé dó vǐ tɔn lɛ́ tamɛ,
ɖó hwɛ e tɔ́gbó yětɔn lɛ́ hu é wú,
bónú yě ní ma wá sí te bo kp’acɛ dó ayǐkúngban ɔ jí,
lobonú toxo yětɔn lɛ́ kpé to ɔ mɛ ó.”
22 “Un ná sí te dó yě jí,” wɛ Jexóva ahwankpá lɛ́ tɔn ɖɔ.
“Un ná súnsún nyǐkɔ, mɛ e kpo lɛ́ é, kúnkan lɛ́ kpó jijimɛ e ja lɛ́ é kpó mlɛ́mlɛ́ sín Babilɔ́nu,” wɛ Jexóva ɖɔ.
23 “Un ná bló bɔ é ná nyí nɔtɛn ajijá lɛ́ tɔn, bo lɛ́ nyí xá e mɛ gba ɖe é, lobɔ un ná sɔ́ akíza e nɔ sú kún dó nú nǔ mlɛ́mlɛ́ é dó za ɛ,” wɛ Jexóva ahwankpá lɛ́ tɔn ɖɔ.
24 Jexóva ahwankpá lɛ́ tɔn xwlé nǔ ɖɔ:
“Lěe un lin gbɔn é ɔ, mɔ̌ wɛ é ná jɛ gbɔn,
bɔ nǔ e sín gbeta kɔn un wá é ɔ, nǔ énɛ́ wɛ ná jɛnu.
25 Un ná nyínyɛ́ Asilíinu ɔ ɖo to ce mɛ,
bo ná gbídí i ɖó afɔ wú ɖo só ce lɛ́ jí.
È ná ɖe agbanhɛnkpo tɔn sín yě jí,
bo ná ɖe agban tɔn sín abɔ̌ yětɔn lɛ́ ta.
26 Gbeta e kɔn è wá* dó ayǐkúngban ɔ bǐ wú é nɛ́,
alɔ e è dlɛ́n bo ná wa nǔ dó akɔta lɛ́ bǐ wú é* nɛ́.
27 Ðó Jexóva ahwankpá lɛ́ tɔn wá gbeta ɔ kɔn,
mɛ̌ ka sixú gbo kpo nyi ali jí ná?
Alɔ tɔn ɖo dlɛ̌ndlɛ́n jí,
mɛ̌ ka sixú sɛ ɛ wún?
28 Xwe e xwe axɔ́sú Akázi kú é ɔ, è ɖɔ xó élɔ́:
29 “Filisitíi è, mi mɛ ɖě ní ma j’awǎ,
ɖó è wɛ́n mɛ e ɖo mi xo wɛ é sín kpo kpowun wútu ó.
Ðó dan aɖǐvɛ́nɔ ɖé ná gosín dan ɔ sín kúnkan mɛ,
bɔ kúnkan tɔn ná nyí dan aɖǐvɛ́nɔ e nɔ zɔn é* ɖé.
30 Hwenu e nukɔngbéví mɛmaɖómɛɖé tɔn ná ɖo nǔ ɖu wɛ,
bɔ wamamɔnɔ ná nɔ mlɔ́ ayǐ ɖo ayijayǐ mɛ é ɔ,
un ná sɔ́ adɔ dó hu togun* towe,
bo ná hu mɛ e kpo nú we lɛ́ é.
31 Hɔntogbó è, dǒ gbɛvíhan! Toxo è, sú xó!
Filisitíi è, ayi mi bǐ tɔn ná gba dó,
ɖó azizɔ ɖé jawě sín totaligbé,
mɛ ɖěbǔ ɖo lɛjɛlɛjɛ dán wɛ ɖo ahwankpá ɔ mɛ ǎ.”
32 Nɛ̌ yě ka ɖó ná ná xósin wɛndótɔ́ akɔta ɔ tɔn lɛ́ gbɔn?
Yě ná ɖɔ nú yě ɖɔ Jexóva ɖó dodónu Sinyɔ́ɔ tɔn ayǐ,
bɔ mɛmaɖómɛɖé e ɖo togun tɔn mɛ lɛ́ é ná sɔ́ dó ɖó bibɛtɛn.