Ezayíi
40 “Mi dó gbɔ nú togun ce, ɛɛn, mi dó gbɔ n’i,” wɛ Mawu mitɔn ɖɔ.
2 “Mi ɖɔ xó nú é ní byɔ́ ayi mɛ* nú Jeluzalɛ́mu,
mi jlá ɛ ɖɔ azɔ̌ e è ɖó kɔ jí n’i é ko fó,
ɖɔ hwɛ ɖě kún sɔ́ ɖo kɔ n’i ó.
Jexóva ko sú hwɛ e é hu lɛ́ é bǐ sín axɔ́ ɛ mlɛ́mlɛ́.”*
3 Mɛɖé ɖo xó sú wɛ ɖo gbětótló mɛ ɖɔ:
“Mi bló ali Jexóva tɔn ɖó!
Mi ɖe ali jlɔ́jlɔ́ ɖaxó ɖokpó gbɔn gbětótló mɛ nú Mawu mǐtɔn.
4 Tɔdo lɛ́ bǐ ní gɔ́,
só ɖaxó lɛ́ kpó só kpɛví lɛ́ kpó bǐ ní hwíhwɛ́.
Ayǐkúngban e nyí kpó ɖě do ɖě é ná jlɔ́,
bɔ ayǐkúngban kacakaca ná húzú ayǐkúngban wɛnjɛ.
6 Ðǒtó! Mɛɖé ɖo ɖiɖɔ wɛ ɖɔ: “Sú xó!”
Mɛ ɖěvo kanbyɔ́ ɖɔ: “Étɛ́ sín xó un ka ɖó ná sú?”
“Gbɛtɔ́* lɛ́ bǐ wɛ nyí gběhan mǔ.
Wǎnyíyí e ma nɔ sɛ do ǎ é yětɔn bǐ wɛ cí sɛ́ e ɖo gle mɛ lɛ́ é ɖɔhun.
É ɖo wɛn ɖɔ, gběhan kpowun wɛ gbɛtɔ́ nyí.
9 Hwi nyɔ̌nu e hɛn wɛn ɖagbe wá nú Sinyɔ́ɔ é,
fán kpó yi só ɖaxó ɖokpó jí.
Hwi nyɔ̌nu e hɛn wɛn ɖagbe wá nú Jeluzalɛ́mu é,
sɔ́ gbe towe dó jǐ kpó hlɔ̌nhlɔ́n kpó.
Sɔ́ dó jǐ, ma ɖi xɛsi ó.
Ðɔ nú toxo Judáa tɔn lɛ́ ɖɔ: “Mawu mitɔn ɖíe.”
10 Éɖíe! Aklúnɔ Nǔbǐwúkpétɔ́ Jexóva ná wá kpó hlɔ̌nhlɔ́n kpó,
bɔ awa tɔn ná ɖo acɛ kpa wɛ.
Éɖíe! Ajɔ tɔn ɖo así tɔn,
bɔ azɔ̌kwɛ́ e é nɔ sú mɛ é ɖo nukɔn tɔn.
11 É ná kpé nukún dó lɛ̌ngbɔ́hwan tɔn wú* lɛ̌ngbɔ́nyitɔ́ ɖɔhun.
É ná sɔ́ awa tɔn dó xo lɛ̌ngbɔ́ lɛ́ kplé,
bo ná bɛ́ yě ɖó akɔ́nnu.
É ná kplá ɖěɖěe ɖó vǐ ɖo anɔ̌ nu lɛ́ é dɛ̌dɛ̌.
12 Mɛ̌ ka zán alɔgogo tɔn dó jlɛ́ sin,
bo zán alɔbá tɔn dó jlɛ́ jǐnukúnsin?
Mɛ̌ ka xo kɔ́gúdu ayǐkúngban ɔ tɔn lɛ́ kplé dó nǔjlɛ́nú mɛ,
alǒ da só ɖaxó lɛ́
kpó só kpɛví lɛ́ kpó ɖo nǔdagan lɛ́ jí?
13 Mɛ̌ ka jlɛ́ gbigbɔ Jexóva tɔn?*
Mɛ̌ ka sixú nyí wěɖexámɛtɔ́ tɔn bo kplɔ́n nǔ i?
14 Mɛ̌ é ka nɔ kan nǔ byɔ́ bo ná dó ɖó nukúnnúmɔjɛnǔmɛ?
Mɛ̌ ka nɔ kplɔ́n nǔ i ɖo hwɛjijɔ sín ali jí?
Mɛ̌ ka nɔ kplɔ́n ɛ nǔtuuntuun?
Mɛ̌ ka nɔ xlɛ́ ɛ nukúnnúmɔjɛnǔmɛ nǔgbó sín ali ɔ?
15 Éɖíe! Akɔta lɛ́ cí sin e kun téwún sín tɔká mɛ é ɖɔhun,
è nɔ kpɔ́n yě dó mɔ kɔ́kwín lɛ́ ɖo nǔdagan lɛ́ jí.
Éɖíe! É sɔ́ tɔtɛ́ntinto lɛ́ sí te afúntúntún ɖɔhun.
16 Atín e ɖo Libáan lɛ́ é ná tlɛ kpé, bo ná bló bɔ myɔ ná kpo ɖo jiji wɛ ǎ,*
bɔ gběkanlin tɔn lɛ́ ná kpé vɔ̌ e è nɔ dó zo é sísá ǎ.
17 Akɔta lɛ́ bǐ cí nǔ e ma tíin ǎ é ɖɔhun ɖo nukɔn tɔn;
é nɔ kpɔ́n yě dó mɔ nǔ yǎyá, ɛɛn, nǔ tófwé.
18 Mɛ̌ wú mi ka sixú sɔ́ Mawu jlɛ́ dó?
Étɛ́ ɖɔhun é ka cí bɔ mi sixú ɖɔ?
20 É sɔ́ atín ɖokpó bɔ é nyí nǔníná tɔn,
atín e ma ná jɛ wɔvli ǎ é ɖé.
É nɔ ba alɔlyɛnzɔ́watɔ́* e alɔ se kpɛ́n ná é ɖokpó,
bónú é ná kpa bǒcyɔ e ma ná flí ǎ é ɖé.
21 Mi tuun ǎ cé?
Mi se ǎ cé?
È ɖɔ nú mi sín do ǎ cé?
Mi mɔ nukúnnú jɛ mɛ sín hwenu e è dá ayǐkúngban ɔ é ǎ cé?
22 Mawu nɔ nɔ tobotobo ayǐkúngban ɔ tɔn tanu,
bɔ mɛ e nɔ nɔ jí lɛ́ é cí bɔkle lɛ́ ɖɔhun.
É ɖo jǐxwé vlɔ́n wɛ xɔmɛgbovɔ ɖagbe ɖagbe ɖé ɖɔhun,
é vlɔ́n ɛ goxɔ ɖɔhun bo ná nɔ mɛ.
23 É sɔ́ acɛkpatɔ́ nukúnɖéjí lɛ́ dó húzú nǔ yǎyá,
bo bló bɔ hwɛɖɔtɔ́* ayǐkúngban ɔ jí tɔn lɛ́ húzú nǔ tófwé.
24 È ko tun yě zinzin ǎ,
è ko dó yě zinzin ǎ,
ɖɔ yětɔn lɛ́ ko jínjɔ́n ayǐ ɖo ayǐkúngban lanmɛ zinzin ǎ,
bɔ jɔhɔn nyi dó yě bɔ yě xú,
lobɔ jɔhɔn bɛ́ yě yi nǔywɛ́ ɖɔhun.
25 “Mɛ̌ wú mi ka sixú sɔ́ mì jlɛ́ dó? Mɛ̌ kpó nyi kpó ka ɖo zɛ̌nzɛ̌n?” wɛ Mɛ mímɛ́ ɔ ɖɔ.
26 “Mi sɔ́ nukún mitɔn lɛ́ d’aga, bo kpɔ́n jǐnukúnsin.
Mɛ̌ ka dá nǔ énɛ́ lɛ́?
Mɛ e nɔ ɖe yě tɔ́n ahwankpá ɖɔhun, bo nɔ sɔ́ kɛ́n yě mɛ ɖokpó ɖokpó tɔn é wɛ;
é nɔ sɔ́ nyǐkɔ yě mɛ ɖokpó ɖokpó tɔn dó ylɔ́ yě ná.
Ðó hlɔ̌nhlɔ́n tɔn aditi e é nɔ dó wa nǔ é kpó hlɔ̌nhlɔ́n tɔn e jí wǔ é kpó wú ɔ,
yě ɖě nɔ hwe sín mɛ ǎ.
27 Jakɔ́bu è, étɛ́wú a ka nɔ ɖɔ, ɛɛn, Izlayɛ́li è, étɛ́wú a ka nɔ ɖɔ:
‘Ali ce ɖo hwlǎhwlá dó Jexóva,
un nɔ mɔ hwɛjijɔ ɖě sín Mawu gɔ́n ǎ’?
28 A tuun ǎ cé? A se ǎ cé?
Jexóva, éyɛ́ mɛ e dá nǔ e ɖo ayǐkúngban ɔ jí lɛ́ é bǐ, káká yi fí e é kponu ɖó lɛ́ é wɛ nyí Mawu káká sɔ́yi.
Nǔ nɔ ci kɔ n’i, alǒ gǎn nɔ vɔ ɖo wǔ tɔn gbeɖé ǎ.
È sixú mɔ do nú* nukúnnúmɔjɛnǔmɛ tɔn ǎ.
30 Nǔ ná ci kɔ nú yɔkpɔ́vú lɛ́, bɔ gǎn ná vɔ ɖo yě wú,
dɔ̌nkpɛvú lɛ́ ná klɛ́n afɔ, bo ná j’ayǐ,
31 amɔ̌, mɛ e nɔ ɖó nukún Jexóva lɛ́ é ná lɛ́ vɔ́ hlɔ̌nhlɔ́n mɔ.
Yě ná zɔn hɔ̌n lɛ́ ɖɔhun, cí nǔ ɖɔ yě ɖó awa wɛ ɖɔhun.
Yě ná kán wezun, bɔ gǎn ka ná vɔ ɖo yě wú ǎ;
yě ná ɖi zɔnlin, bɔ nǔ ka ná ci kɔ nú yě ǎ.”