Nǔnywɛ́tɔ́xó
3 Nǔ bǐ wɛ ɖó hwenu,
nǔ e è nɔ wa ɖo hwe glɔ́ lɛ́ é ɖokpó ɖokpó wɛ ɖó hwenu;
2 hwenu e è ná ji mɛ dó é ɖe, bɔ hwenu e è ná kú dó é ɖe;
hwenu e è ná dó nǔ dó é ɖe, bɔ hwenu e è ná hɔn nǔ e è dó é ɖe;
3 hwenu e è ná hu mɛ dó é ɖe, bɔ hwenu e è ná gbɔ azɔn nú mɛ dó é ɖe;
hwenu e è ná mu nǔ dó é ɖe, bɔ hwenu e è ná gbá nǔ dó é ɖe;
4 hwenu e è ná y’avǐ dó é ɖe, bɔ hwenu e è ná ko nǔ dó é ɖe;
hwenu e è ná dó gbɛvíhan dó é ɖe, bɔ hwenu e è ná ɖú we* dó é ɖe;
5 hwenu e è ná nyi awǐnnya dó é ɖe, bɔ hwenu e è ná xo awǐnnya kplé dó é ɖe;
hwenu e è ná zunfán mɛ dó é ɖe, bɔ hwenu e è ma ná zunfán mɛ dó ǎ é ɖe;
6 hwenu e è ná ba nǔ dó é ɖe, bɔ hwenu e è ná jó gbe dó biba tɔn wú dó é ɖe;
hwenu e è ná hɛn nǔ dó é ɖe, bɔ hwenu e è ná sɔ́ nǔ nyi gbě dó é ɖe;
7 hwenu e è ná vún nǔ dó é ɖe, bɔ hwenu e è ná tɔ nǔ dó é ɖe;
hwenu e è ná nɔ abwɛ̌ dó é ɖe, bɔ hwenu e è ná ɖɔ xó dó é ɖe;
8 hwenu wǎnyíyí tɔn ɖe, bɔ hwenu wǎngbígbɛ́ tɔn ɖe;
hwenu e è ná fun ahwan dó é ɖe, bɔ hwenu e è ná nɔ fífá mɛ dó é ɖe.
9 Étɛ́ azɔ̌watɔ́ ka nɔ mɔ ɖo gǎn e é nɔ dó lɛ́ é bǐ mɛ? 10 Un mɔ azɔ̌ e Mawu sɔ́ dó así nú gbɛtɔ́ lɛ́, bo ná dó hɛn alɔnu yětɔn ján lɛ́ é. 11 É bló nǔ lɛ́ bǐ bɔ yě nyɔ́ kpɔ́n,* bo lɛ́ bló yě dó hwetɔnnu. É tlɛ sɔ́ jlǒ gbɛ ninɔ káká sɔ́yi tɔn* dó ayi mɛ nú gbɛtɔ́ lɛ́; é ɖo mɔ̌ có, yě ná tuun azɔ̌ e Mawu nǔgbó ɔ wa sín bǐbɛ́mɛ yi vivɔnu é sín do gbeɖé ǎ.
12 Un wá mɔ nǔ jɛ wú ɖɔ nǔ ɖě kún sɔ́ nyɔ́ nú yě hú gǎn ɖɔ yě ní j’awǎ, bo wa nǔ ɖagbe ɖo gbɛhwenu yětɔn ó, 13 gɔ́ ná ɔ, mɛ ɖokpó ɖokpó ɖó ná ɖu nǔ, bo nu ahan, lobo mɔ awǎjijɛ ɖo azɔ̌ syɛ́nsyɛ́n e é nɔ wa é bǐ mɛ. Nǔníná Mawu tɔn wɛ.
14 Un wá tuun ɖɔ nǔ e Mawu nǔgbó ɔ bló lɛ́ é bǐ ná nɔ ayǐ káká sɔ́yi. Nǔ ɖě ɖe bɔ è ná d’é jí ǎ, nǔ ɖě ka lɛ́ ɖe bɔ è ná ɖe sín mɛ ǎ. Mawu nǔgbó ɔ bló nǔ lɛ́ bǐ gbɔn mɔ̌, bónú gbɛtɔ́ lɛ́ ní ɖó sísí e gɔ́ngɔ́n é n’i.
15 Nǔ ɖěbǔ e ɖo jijɛ wɛ é ko jɛ kpɔ́n, nǔ e ná wá tíin é ko tíin kpɔ́n; amɔ̌, nǔ e gbé gbɛtɔ́ lɛ́ nya é* wɛ Mawu nǔgbó ɔ nɔ yi ba.
16 Un lɛ́ mɔ nǔ élɔ́ ɖo hwe glɔ́: fí e hwɛjijɔ ɖó ná ɖe é ɔ, nǔnyanyawiwa wɛ ɖo fínɛ́, bɔ fí e nǔjlɔ́jlɔ́wiwa ɖó ná ɖe é ɔ, nǔnyanyawiwa wɛ ɖo fínɛ́. 17 Énɛ́ wú ɔ, un ɖɔ dó ayi mɛ ɖɔ: “Mawu nǔgbó ɔ ná ɖɔ hwɛ xá nǔjlɔ́jlɔ́watɔ́ kpó mɛdídá kpó bǐ, ɖó hwenu e è ná w’azɔ̌ ɖokpó ɖokpó, alǒ nǔ ɖokpó ɖokpó dó é ɖe.”
18 Un ɖɔ dó ayi mɛ dó gbɛtɔ́ lɛ́ wú ɖɔ Mawu nǔgbó ɔ ná tɛ́n yě kpɔ́n, bo ná xlɛ́ yě ɖɔ kanlin lɛ́ ɖɔhun wɛ yě cí, 19 ɖó nǔɖé* ɖo te kpɔ́n gbɛtɔ́ lɛ́ bo lɛ́ ɖo te kpɔ́n kanlin lɛ́; nǔ ɖokpó ɔ wɛ ɖo te kpɔ́n yě bǐ. Lěe kanlin nɔ kú gbɔn é wɛ gbɛtɔ́ nɔ kú gbɔn; gbigbɔ ɖokpó ɔ wɛ yě bǐ ɖó. Énɛ́ wú ɔ, gbɛtɔ́ nyí nǔɖé hú gǎn kanlin lɛ́ ǎ, ɖó nǔ bǐ wɛ nyí nǔ yǎyá. 20 Fí ɖokpó ɔ wɛ yě bǐ xwe. Kɔ́ wɛ è sɔ́ dó bló yě bǐ ná, bɔ yě bǐ ná lɛ́ húzú kɔ́. 21 Gbigbɔ gbɛtɔ́ lɛ́ tɔn to nɔ yi jǐ aga, bɔ gbigbɔ kanlin lɛ́ tɔn to nɔ jɛ te byɔ́ ayǐkúngban mɛ hǔn, mɛ̌ ka tuun tawun? 22 Un mɔ ɖɔ nǔ ɖě kún sɔ́ nyɔ́ nú gbɛtɔ́ hú ɖɔ é ní mɔ awǎjijɛ ɖo azɔ̌ tɔn mɛ ó, ɖó ajɔ* tɔn nɛ́; ɖó mɛ̌ ka sixú bló bɔ é ná mɔ nǔ e ná wá jɛ ɖo kú tɔn gúdo lɛ́ é?