Ezayíi
46 Bɛ̌lu jɛ tɔ́tɔ́, bɔ Nɛbo fɛ yi do.
È dó bǒcyɔ yětɔn lɛ́ sín agban nú kanlin lɛ́, è dó nú kanlin e nɔ hɛn agban lɛ́ é,
yě cí agban e ɖo kanlin e nǔ ci kɔ ná lɛ́ é kpɛn wɛ é ɖɔhun.
3 “Kúnkan Jakɔ́bu tɔn è, ɖǒtó mì, hwi kpó mɛ e kpo ɖo togun Izlayɛ́li tɔn mɛ lɛ́ é bǐ kpó,
mi mɛ e un d’alɔ sín jiji hwenu bo hɛn sín adɔgo mɛ lɛ́ é.
4 Káká jɛ hwenu e mi ná kpo é ɔ, mɛ ɖokpó ɔ jɛ́n un ná nyí;
káká jɛ hwenu e ɖa mitɔn lɛ́ ná wé é ɔ, un ná kpo ɖo mi hɛn wɛ.
Un ná zé mi bo ná hɛn mi, lobo ná hwlɛ́n mi lěe un ko nɔ bló gbɔn é.
5 Mɛ̌ ɖɔhun mi ka ná ɖɔ un cí? Mɛ̌ mi ka ná ɖɔ nyi kpó é kpó ɖo zɛ̌nzɛ̌n? Mɛ̌ wú mi ka ná sɔ́ mì jlɛ́ dó,
bónú mǐ ní dó sixú ɖi mǐɖée lɛ́?
6 Mɛɖé lɛ́ tíin bo nɔ bɛ́ siká gěgé sín akwɛ́kpo yětɔn mɛ;
yě nɔ da kpatágan ɖo nǔdagan jí.
Yě nɔ xáya gankɔntɔ́, bɔ é nɔ sɔ́ kpatágan ɔ dó bló nǔmɛsɛn ná.
Énɛ́ gúdo ɔ, yě nɔ xwe agbɔ̌nnusú do, ɛɛn, yě nɔ sɛn ɛ.*
7 Yě nɔ sɔ́ ɖó abɔ̌ yětɔn lɛ́ ta;
yě nɔ hɛn bo nɔ sɔ́ yi ɖó tɛn tɔn mɛ, bɔ é nɔ cí fínɛ́.
É nɔ sɛ tɛn sín tɛn tɔn mɛ ǎ.
Yě nɔ sú xó ylɔ́ ɛ, amɔ̌, é nɔ kɛ nu ǎ;
é sixú hwlɛ́n mɛ ɖěbǔ sín wǔvɛ́ mɛ ǎ.
8 Mi flín nǔ énɛ́ lɛ́ bo kpankɔ́n.
Sɛ́ngbatɔ́ lɛ́ mi, mi hɛn dó ayi mɛ.
9 Mi flín nǔ xóxó* hwenu línlín ɖíe tɔn lɛ́,
mi flín ɖɔ nyɛ wɛ nyí Mawu bɔ ɖěvo ɖě sɔ́ ɖe ǎ.
Nyɛ wɛ nyí Mawu bɔ mɛ ɖě cí nyɛɖɔhun ǎ.
10 Un ɖɔ nǔ e ná wá jɛ é sín bǐbɛ́mɛ,
bo ɖɔ nǔ e ma ko jɛ ǎ lɛ́ é sín hwenu línlín ɖíe.
Un ɖɔ: ‘Gbeta* ce ná ɖyɔ́ ǎ,
un ná wa nǔ ɖěbǔ e nyɔ́ nukún ce mɛ é.’
11 Un ɖo nǔwlíxɛ ɖé ylɔ́ sín hwetɔ́nhwe jí* wɛ,
bo ɖo mɛɖé ylɔ́ sín to línlín ɖé mɛ wɛ, bónú é ná wa nǔ sɔgbe xá gbeta* ce.
Un ko ɖɔ, bɔ un ná bló bɔ é ná jɛ.
Un ko ɖó linlin tɔn, un ná lɛ́ bló bɔ é ná jɛnu.
12 Mi ɖótó mì, mi mɛ e sín ayi syɛ́n* lɛ́ é,
mi mɛ e lín dó nǔjlɔ́jlɔ́wiwa tawun lɛ́ é.
13 Un ko bló bɔ nǔjlɔ́jlɔ́wiwa ce sɛkpɔ́;
é ɖo fí línlín ǎ,
hwlɛngán ce ná gbɔ hwenu ǎ.
Un ná hwlɛ́n Sinyɔ́ɔ gán, bo ná ná ɖɛkpɛ ce Izlayɛ́li.”