Nǔnywɛ́xó
7 Vǐ ce, xwedó xó ce lɛ́,
bo hwlá gbeɖiɖe ce lɛ́ dɔkun ɖɔhun.
2 Xwedó gbeɖiɖe ce lɛ́ bo nɔ gbɛ;
nǔkplɔ́nmɛ* ce ní xɔ akwɛ́ nú we nukúnzin towe ɖɔhun.
3 Sin yě dó alɔví towe lɛ́ wú;
wlǎn yě dó ayi towe mɛ.
4 Ðɔ nú nǔnywɛ́ ɖɔ: “Nɔví nyɔ̌nu ce wɛ a nyí,”
bo ylɔ́ nukúnnúmɔjɛnǔmɛ ɖɔ “hɛ̌nnumɔ ce,”
5 bónú yě ná nya xɛ ɖo jǐ we sín nyɔ̌nu banáwatɔ́* ɔ sí,
lobo ná hwlɛ́n we sín nyɔ̌nu nǔblíblíwatɔ́* ɔ kpó xó víví e é nɔ ɖɔ lɛ́ é* kpó sí.
6 Un ɖo xɔ ce sín flɛtɛ́li nu gbe ɖokpó,
bo ɖo do kpɔ́n sɛ́ dó wɛ,
7 bɔ un mɔ mɛ e ma mɔ nǔ kpɔ́n ǎ* lɛ́ é;
un ɖó ayi dɔ̌nkpɛvú ɖokpó wú ɖo mɛ wínnyáwínnyá lɛ́ mɛ bɔ ayivɔ vún i.
8 É gbɔn toxomɛli e sɛkpɔ́ aliklán nyɔ̌nu énɛ́ tɔn é,
bo ɖi zɔnlin ɖidó nyɔ̌nu ɔ sín xɔ kɔn,
9 ɖo gbadanu hwenu e zǎn ɖo bibɔ wɛ,
bɔ ablu ɖo dídó wɛ é.
10 Énɛ́ ɔ, un mɔ bɔ nyɔ̌nu ɔ wá kpé è,
é sɔ́ nǔ tonyatɔ́ ɖɔhun,* bo ɖó ayi wínníwínní.
11 Zǐngídinɔ wɛ n’i, bo lɛ́ nyí tasyɛ́ntɔ́.
É* nɔ nɔ xwégbe gbeɖé ǎ.
12 A mɔ ɛ ɖo kɔ́xo din ɔ, a ná mɔ ɛ ɖo tokplétɛn lɛ́ din,
é nɔ tɔ wu ɖo aliklán lɛ́ bǐ kpá.
13 É zunfán dɔ̌nkpɛvú ɔ bo kí si n’i;
é ɖɔ n’i kpó wunhínhɔ́n kpó ɖɔ:
14 “Un ɖó ná sá kɔnɖókpɔ́vɔ́ lɛ́.
Égbé ɔ, un ɖe akpá e un dó lɛ́ é.
15 Énɛ́ wú wɛ un tɔ́n bo wá kpé we,
un jɛ gbě towe mɛ, bo mɔ we.
16 Un ko tɛ́ avɔ ɖagbe ɖagbe lɛ́ ɖó zan ce jí,
lɛ̌ɛnkanvɔ e ɖó sinmɛ vovo bo gosín Ejípu é wɛ.
17 Un ko vun mǐla, alowɛ́si kpó kanɛ́lu kpó dó zan ce jí.
18 Wǎ, mǐ ní nu wǎnyíyí mǐtɔn gɔ́ xo káká jɛ zǎnzǎn;
mǐ ní ɖu vǐví wǎnyíyí zozo tɔn ɖó kpɔ́,
19 ɖó asú ce ɖo xwégbe ǎ;
hwɛ línlín wɛ é zɛ.
20 É hɛn akwɛ́ dó éɖée jí,
é ná lɛ́ kɔ wá cóbónú sun ná kpé ká ǎ.”
21 Nyɔ̌nu ɔ zán xógbe e nɔ ɖu ɖo mɛ jí lɛ́ é ɖo ali ɖaxó ɖé nu dó flú dɔ̌nkpɛvú ɔ.
É ɖɔ xó víví dó lú i.
22 Ajijimɛ ɔ, é xwedó è nyibúsú e è kplá xwe huhu gbé é ɖɔhun,
é xwedó è xlonɔ e è ná dɔn tó ná ɖo sókpo* mɛ é ɖɔhun,
23 káká bɔ gǎ ɖé wá xo alǐn tɔn zlɛ́;
é cí xɛ e hwlɛndó bo yi jɛ mɔ mɛ é ɖɔhun, é tuun ɖɔ gbɛ* émítɔn ná yi ɖ’é mɛ ǎ.
24 Din ɔ, vǐ ce lɛ́ mi, mi ɖótó mì;
mi hɛn ayi dó xó e ɖɔ wɛ un ɖe lɛ́ é wú.
25 Ma nú ayi towe lílɛ́ jɛ nyɔ̌nu mɔ̌hun sín ali jí ó.
Ma ɖo flúflú wɛ bo yi gbɔn ali tɔn jí ó,
26 ɖó mɛ e é ko sín wǔ tɔn bɔ yě kú lɛ́ é sukpɔ́,
mɛ ɖěɖěe é ko hu lɛ́ é gégé.