Nǔnywɛ́xó
16 Gbɛtɔ́ nɔ to nǔ e lin wɛ é ɖe ɖo ayi tɔn mɛ lɛ́ é,*
amɔ̌, xósin e é nɔ ná é* ɔ, Jexóva gɔ́n wɛ é nɔ gosín.
2 Ali e gbɛtɔ́ nɔ mlɛ́ lɛ́ é bǐ nɔ cí nǔ e sɔgbe* é ɖɔhun ɖo nukún éɖésúnɔ tɔn mɛ,
amɔ̌, Jexóva nɔ gbéjé nǔ e nɔ sísɛ́ mɛ bɔ è nɔ wa nǔ é* kpɔ́n.
3 Sɔ́ nǔ ɖěbǔ e a nɔ wa é dó alɔ mɛ nú Jexóva,*
énɛ́ ɔ, tuto towe lɛ́ ná yi ta.
4 Jexóva bló bɔ nǔ lɛ́ bǐ nɔ wa azɔ̌ nú linlin tɔn,
é tlɛ nɔ bló bɔ è ná sú kún dó nú mɛdídá ɖo awěxomɛzángbe.
5 Mɛ ɖěbǔ e nɔ yí go ɖo ayi mɛ é nɔ vɛ́ mɔ nú Jexóva.
Ðeji ɖɔ è ná dɔn tó n’i jɛ́n wɛ.
6 Wǎnyíyí e ma nɔ sɛ do ǎ é kpó gbejíninɔ kpó nɔ zɔ́n bɔ è nɔ sɔ́ hwɛ kɛ mɛ,
sísí e gɔ́ngɔ́n é ɖíɖó nú Jexóva nɔ zɔ́n bɔ è nɔ hɔn nú nǔnyanyawiwa.
7 Ényí ali mɛɖé tɔn nyɔ́ Jexóva nukúnmɛ ɔ,
é nɔ bló bɔ kɛntɔ́ mɛ ɔ tɔn lɛ́ tlɛ nɔ nɔ fífá mɛ xá ɛ.
8 È ɖó nǔ kpɛɖé bo nɔ wa nǔ jlɔ́jlɔ́ ɔ,
é nyɔ́ hú è ɖó nǔ gěgé bo ka nɔ wa nǔ e ma sɔgbe ǎ é.
9 Gbɛtɔ́ sixú to nǔ e wa gbé é ja lɛ́ é ɖo ayi tɔn mɛ,
amɔ̌, Jexóva wɛ nɔ xlɛ́ ali afɔ tɔn lɛ́.
10 Gbeta e gosín Mawu gɔ́n é ɖó ná ɖo axɔ́sú ɖé sín nu;
é ɖó ná ɖɔ hwɛ agɔ gbeɖé ǎ.
11 Jexóva gɔ́n wɛ nǔdagan kpó nǔjlɛ́nú kpó e sɔgbe lɛ́ é nɔ gosín;
nǔjlɛ́nú e ɖo sáki ɔ mɛ lɛ́ é bǐ wɛ nyí nǔwiwa tɔn.
12 Nǔnyanyawiwa nɔ vɛ́ mɔ nú axɔ́sú lɛ́,
ɖó è ɖó axɔ́súzinkpo ɔ ayǐ ɖó dodónu syɛ́nsyɛ́n jí gbɔn nǔjlɔ́jlɔ́wiwa gblamɛ.
13 Xó e jlɔ́ é nɔ dó xomɛhunhun nú axɔ́sú lɛ́.
Yě nɔ yí wǎn nú mɛ e nɔ ɖɔ nǔgbó é.
14 Xomɛsin axɔ́sú tɔn cí mɛ e è sɛ́ dó mɛ hu gbé é ɖɔhun,
amɔ̌, nǔnywɛ́tɔ́ nɔ hwíhwɛ́ ɛ.*
15 Ényí axɔ́sú ná fɛ́nú mɛɖé ɔ, mɛ énɛ́ ná ɖó gbɛ ɖagbe;
fɛ́nú tɔn cí akpɔ́kpɔ́ e nɔ dɔn jǐ wá xwejíhwenu é ɖɔhun.
16 Nǔnywɛ́ ɖíɖó nyɔ́ hú siká ɖíɖó mɛ nya!
Nukúnnúmɔjɛnǔmɛ ɖíɖó nyɔ́ hú kpatágan ɖíɖó.
17 Nǔjlɔ́jlɔ́watɔ́ nɔ gbɔn zɔ nú ali nǔnyanyawiwa tɔn.
Mɛ ɖěbǔ e nɔ cɔ́ ali tɔn é nɔ hwlɛ́n gbɛ* tɔn gán.
18 Kún mɛtɔn ja súsú dó gbé ɔ, goyíyí wɛ è nɔ bɛ́,
bɔ mɛɖée mimɔ nɔ jɛ nukɔn nú ayǐjijɛ.
19 É nyɔ́ ɖɔ è ní nɔ sɔ́ mɛɖée hwe* ɖo mɛɖéesɔ́hwetɔ́ lɛ́ tɛ́ntin,
hú ɖɔ è ní má nǔ e mɛ e nɔ mɔ yěɖée lɛ́ é bɛ́ ɖo ahwangbénu lɛ́ é xá yě.
20 Mɛ e nɔ ɖe nukúnnúmɔjɛnǔmɛ xlɛ́ ɖo ninɔmɛ ɖé mɛ é ná mɔ nu tɔn,*
awǎjijɛnɔ wɛ nú mɛ e nɔ ɖeji dó Jexóva wú é.
21 È ná ylɔ́ mɛ e nyí nǔnywɛ́tɔ́ ɖo ayi mɛ é ɖɔ mɛ e ɖó nukúnnúmɔjɛnǔmɛ é,
mɛ e nɔ ɖɔ xó kpó xomɛnyínyɔ́ kpó é* nɔ ɖu ɖo mɛ jí hú gǎn.
22 Nukúnnúmɔjɛnǔmɛ ɔ, jɔtɛn gbɛ tɔn wɛ é nyí nú mɛ ɖěɖěe ɖó lɛ́ é,
amɔ̌, xlonɔ lɛ́ ɔ, xlojijɔ yěɖésúnɔ tɔn wɛ nɔ ná kplɔ́n yě.
23 Ayi nǔnywɛ́tɔ́ tɔn nɔ ná nukúnnúmɔjɛnǔmɛ nu tɔn,
bɔ xó tɔn nɔ ɖu ɖo mɛ jí hú gǎn.
24 Xó e nɔ dɔn mɛ lɛ́ é cí wǐinkpa ɖɔhun,
yě nɔ víví nú lǐndɔ̌n,* bo nɔ gbɔ azɔn nú xú.
25 Mɛɖé sixú lin ɖɔ émí ɖo ali ɖagbe ɔ jí,
amɔ̌, ɖo vivɔnu ɔ, kú wɛ ali énɛ́ nɔ kplá mɛ yi.
26 Xovɛ́ e nɔ sin jokóxotɔ́ é* nɔ zɔ́n bɔ é nɔ wa azɔ̌ syɛ́nsyɛ́n,
ɖó xovɛ́ e ɖo sinsin i wɛ é* wɛ nɔ sísɛ́ ɛ d’é kɔn.
27 Mɛ e nyí nǔvɔ́nɔ é nɔ kun nǔ nyanya tɔ́n;
xó e é nɔ ɖɔ lɛ́ é cí myɔ hɛhɛ ɖɔhun.
29 Dǎkaxotɔ́ nɔ lú nɔzo tɔn,
bo nɔ dɔn ɛ yi ali nyanya jí.
30 Ényí é ɖo ayi kan wɛ bá wa nǔ nyanya ɔ, é nɔ bló nukún nú mɛ.
Ényí é ɖo nǔ nyanya wa wɛ ɔ, é nɔ tɛ aɖǔma.
31 Jɛ̌gbakún ɖɛkpɛ* tɔn wɛ hwa nyí,
ényí è mɔ mɛ e ta é ɖe é ɖo nǔjlɔ́jlɔ́wiwa sín ali jí ɔ nɛ́.
32 Mɛ e ma nɔ yá wǔ sin xomɛ ǎ é nyɔ́ hú súnnu hlɔ̌nhlɔ́nnɔ,
mɛ e nɔ ɖu ɖo xomɛsin tɔn jí é* nyɔ́ hú mɛ e ɖu ɖo toxo ɖé jí é.
33 Akpo* mɛ wɛ è nɔ nyi akɔ dó,
amɔ̌, Jexóva gɔ́n wɛ gbeta akɔ e è nyi é tɔn lɛ́ bǐ nɔ gosín.