Nǔnywɛ́xó
30 Xó agbɔ̌nnɔ e Agúu Yakɛ ví ɔ ɖɔ nú Itiɛ́li kpó Wukáli kpó é ɖíe:
2 Un ɖo vi mɛ hú mɛ ɖěvo ɖěbǔ,
nukúnnúmɔjɛnǔmɛ e gbɛtɔ́ ɖó ná ɖó é hwedó mì.
3 Un kplɔ́n nǔ e nǔnywɛ́ nyí é ǎ,
un ka tuun nǔ e Mɛ e mɛ́ bɔ nǔ bǐ vɔ ɖ’é wú é tuun é ǎ.
4 Mɛ̌ ka yi jǐxwé bo wá kpɔ́n?
Mɛ̌ ka wlí jɔhɔn dó alɔkpákpá tɔn we lɛ́ bǐ mɛ kpɔ́n?
Mɛ̌ ka bú sin dó awu tɔn mɛ kpɔ́n?
Mɛ̌ ka ɖó fí e gbɛ ɔ kponu ɖó lɛ́ é ayǐ?
Ényí a tuun nyǐkɔ tɔn kpó vǐ tɔn sín nyǐkɔ kpó hǔn, ɖɔ nú mì.
5 Nǔ kwíji ɖě nɔ ɖo xó e Mawu nɔ ɖɔ lɛ́ é wú ǎ.
Gǎglónú wɛ é nyí nú mɛ ɖěɖěe nɔ ba bibɛtɛn ɖo gɔ̌n tɔn lɛ́ é.
6 Ma gɔ́ nǔ ɖěbǔ nú xó tɔn lɛ́ ó,
é ma nyí mɔ̌ ǎ ɔ, é ná kɛ nu dó nǔ wú nú we,
bɔ a ná nyí adingbannɔ.
7 Nǔ we byɔ́ we wɛ un ɖe.
Ma tɛ mì cóbónú má kú ó.
8 Sɛ yɛmɛnúwiwa kpó adingban kpó dó zɔ nú mì tawun.
Ma ná ya mì ó, ma ná dɔkun mì ó.
Nɔ ná nǔɖuɖu e ná kpé mì é mì kpowun,
9 bónú un ma wá gɔ́ xo, bo gbɛ́ we, lobo ɖɔ: “Mɛ̌ ka nyí Jexóva?” ó.
Mawu ce, ma nú un húzú wamamɔnɔ, bo jɛ ajo lobo ɖe yɛ̌yi sín* nyǐkɔ towe wú ó.
10 Ma dó ji mɛsɛntɔ́ ɖo gǎn tɔn gɔ́n ó,
é ma nyí mɔ̌ ǎ ɔ, é sixú dó nu we, bɔ a ná kú hwɛ.
11 Jijimɛ ɖé tíin, bo nɔ dó nu tɔ́ yětɔn,
lobo nɔ byɔ́ nyɔ̌ná nú nɔ yětɔn ǎ.
12 Jijimɛ ɖé tíin, bo nɔ mɔ ɖɔ émí nyí mɛ mímɛ́,
amɔ̌, è ko ɖe nǔ kwíji* sín wǔtu tɔn ǎ.
13 Jijimɛ ɖé tíin bo ɖó nukún goyíyí tɔn,
lobo nɔ hu tɛ́ nú mɛ ɖěvo lɛ́.
14 Jijimɛ ɖé tíin, bɔ aɖǔ yětɔn nyí hwǐ,
bɔ aglan yětɔn nyí jivǐ e nɔ hu nǔ é;
yě nɔ vúnvún mɛmaɖómɛɖé e ɖo ayǐkúngban ɔ jí lɛ́ é,
bo nɔ vúnvún wamamɔnɔ sín gbɛtɔ́ lɛ́ mɛ.
15 Asán ɖó vǐ nyɔ̌nu we, bɔ yě nɔ sú xó ɖɔ: “Nǎ mì! Nǎ mì!”
Nǔ atɔn tíin bo nɔ gɔ́ xo ǎ,
ɛɛn, nǔ ɛnɛ, bo nɔ ɖɔ gbeɖé ɖɔ: “É kpé!” ǎ.
16 Nǔ énɛ́ lɛ́ wɛ nyí Yɔdo,* nyɔ̌nu wɛnsinɔ,
ayǐkúngban e ba sin kpo é,
kpó myɔ e ma nɔ ɖɔ: “É kpé!” gbeɖé ǎ é kpó.
17 Mɛ e nɔ cá nú tɔ́ tɔn, bo ma nɔ ké ya nú tónú sise nú nɔ tɔn ǎ é ɔ,
avǔnsákɔwó tɔdo* mɛ tɔn lɛ́ ná lyɔ́ nukún tɔn,
bɔ hɔ̌n wínnyáwínnyá lɛ́ ná ɖu i.
18 Nǔ atɔn tíin, bo zɛ nukúnnúmɔjɛnǔmɛ ce wú,*
ɛɛn, nǔ ɛnɛ, bɔ un tuun do yětɔn ǎ:
19 Ali e hɔ̌n e ɖo zinzɔn gbɔn jǐnukúnsin wɛ é nɔ gbɔn é,
ali e dan e ɖo awǐnnya jí gbɔn wɛ é nɔ gbɔn é,
ali e tɔjíhún e ɖo yiyi wɛ ɖo xu faɖaɖa jí é nɔ gbɔn é,
kpó lěe súnnu ɖé nɔ wa nǔ gbɔn, hwenu e é ɖo ɖyɔ̌vǐ ɖé gúdo é kpó.
20 Lěe nyɔ̌nu e nɔ d’afɔ gbě é nɔ wa nǔ gbɔn é ɖíe:
É nɔ ɖu nǔ, bo nɔ súnsún nu;
énɛ́ gúdo ɔ, é nɔ ɖɔ: “Un wa nǔ ɖě gbɔ ǎ.”
21 Nǔ atɔn tíin, bo nɔ húnhún ayǐkúngban ɔ,
ɛɛn, nǔ ɛnɛ, bɔ gbɛtɔ́ nɔ sixú dɛ ɖ’é nu ǎ:
22 Hwenu e kannumɔ húzú axɔ́sú é,
hwenu e xlonɔ ɖu nǔ dín é,
23 hwenu e è sɔ́ nyɔ̌nu e è gbɛ́ wǎn ná é* dó ɖó asi é,
kpó hwenu e mɛsɛntɔ́ nyɔ̌nu yí gǎn tɔn nyɔ̌nu sín tɛnmɛ* é kpó.
24 Nǔ ɛnɛ tíin ɖo ayǐkúngban jí, bo ɖo nǔ e hwe hú gǎn lɛ́ é mɛ,
amɔ̌, yě ɖó nǔnywɛ́ ɖo jɔwámɔ linu:*
25 Ayǐsínzɛn lɛ́ nyí nǔɖíɖó hlɔ̌nhlɔ́nnɔ lɛ́ ǎ,*
é ɖo mɔ̌ có, yě nɔ sɔ́ nǔ nú nǔɖuɖu yětɔn ɖo yǒzohwenu.
26 Agidigbǎnwún lɛ́ ɖó hlɔ̌nhlɔ́n sɔmɔ̌ ǎ,*
é ɖo mɔ̌ có, yě nɔ wa xwé nyi sókan mɛ.
27 Bɔkle lɛ́ ɖó axɔ́sú ǎ,
é ɖo mɔ̌ có, yě bǐ nɔ ɖo tuto jí,* bo nɔ ɖo yiyi wɛ.
28 Nyɔxwenyɔxwe nɔ fán nǔ kpó afɔ tɔn lɛ́ kpó,
bo nɔ yi axɔ́sú sín hɔnmɛ.
29 Nǔ atɔn tíin bɔ ényí yě ɖo zɔnlin ɖi wɛ ɔ, é nɔ jí wǔ,
ɛɛn, nǔ ɛnɛ, bɔ ényí yě ɖo yiyi wɛ ɔ, é nɔ jí wǔ. Yě wɛ nyí:
30 Kinnikínní, é wɛ ɖó hlɔ̌nhlɔ́n hú gǎn ɖo kanlin lɛ́ mɛ,
é nɔ jó agɔ yi gǔdo ɖo mɛ ɖěbǔ nukɔn ǎ;
31 cukú; gbɔ̌sú;
kpó axɔ́sú e ahwankpá tɔn ɖo kpɔ́ xá ɛ é kpó.
32 Ényí xlojijɔ zɔ́n bónú a sɔ́ hwiɖée su,
alǒ, ényí a ɖo tuto bló wɛ bo ná wa mɔ̌ hǔn,
sú alɔ nu.
33 Ðó ényí è xo anɔ̌sin ɔ, é nɔ ná bɔ̌ta,
ényí è dó nǔ awɔntín jí ɔ, hun nɔ tɔ́n,
mɔ̌ ɖokpó ɔ, xomɛsin fɔ́n dó jǐ nɔ dɔn jlɛ wá.