Ezayíi
9 É ɖo mɔ̌ có, ablu ɔ ná cí lěe é cí hwenu e to ɔ ɖo aluwɛ mɛ ɖo hwexónu, hwenu e è wa wǎngbɛ́númɛ sín nǔ xá Zabulɔ́ɔn sín to kpó Nɛfutáli sín to kpó é ɖɔhun ǎ. Amɔ̌, ɖo nukɔnmɛ ɔ, é ná bló bɔ è ná wlí yɛ̌yi nú ali e ɖo xu ɔ kpá ɖo Judɛ́ɛn sín xá mɛ é, énɛ́ wɛ nyí Galilée akɔta lɛ́ tɔn.
2 Togun e nɔ ɖi zɔnlin ɖo ablu mɛ ɖ’ayǐ é
mɔ wěziza ɖaxó.
Mɛ ɖěɖěe nɔ nɔ ablu gɔngɔn sín to mɛ lɛ́ é ɔ,
wěziza hɔ́n dó yě jí.
3 A bló bɔ mɛ e ɖo akɔta ɔ mɛ lɛ́ é sukpɔ́;
a bló bɔ yě ɖó awǎjijɛ ɖaxó.
Yě nɔ j’awǎ ɖo nukɔn towe,
lěe mɛ lɛ́ nɔ j’awǎ ɖo nǔkúnyiyahwenu gbɔn é ɖɔhun,
mɛ ɖěɖěe nɔ má nǔ e yě bɛ́ ɖo ahwangbénu lɛ́ é kpó awǎjijɛ kpó lɛ́ é ɖɔhun.
4 Ðó a gba agbanhɛnkpo yětɔn hánnyá,
bo gba kpo e ɖo abɔ̌ yětɔn lɛ́ ta é kpó azɔ̌gán ɔ sín kpo kpó hánnyá,
lěe é nyí gbɔn ɖo Madiyáni sín azǎn gbe é.
5 Ahwanfɔkpa e nɔ húnhún ayǐkúngban ɔ hwenu e è ɖo zɔnlin ɖi wɛ lɛ́ é bǐ,
kpó awu e mɛ kanjɔ kpé é bǐ kpó
ná húzú myɔflɔ́nú.
È ná nɔ ylɔ́ ɛ ɖɔ Wěɖexámɛtɔ́ e nǔ bǐ vɔ ɖ’é wú é, Mawu hlɔ̌nhlɔ́nnɔ, Tɔ́ mavɔmavɔ, Axɔ́ví fífá tɔn.
7 Acɛkpikpa* tɔn ná kpé fí bǐ,
bɔ fífá e ná tíin ɖo axɔ́súzinkpo Davídi tɔn jí, bo ná tíin ɖo axɔ́súɖuto tɔn mɛ é
ná ɖó vivɔnu ǎ,
bónú è ná ɖó acɛkpikpa ɔ ayǐ, lobo hɛn ɛ ɖó te
gbɔn hwɛjijɔ kpó nǔjlɔ́jlɔ́wiwa kpó gblamɛ,
sín din káká sɔ́yi.
Jexóva ahwankpá lɛ́ tɔn ná wa mɔ̌ kpó akpakpa sɔ́ mɛ ɖaxó kpó.
8 Jexóva sɛ́ wɛn hwɛɖónúmɛ tɔn ɖé dó Jakɔ́bu,
bɔ é jɛnu dó Izlayɛ́li jí.
9 Bɔ mɛ lɛ́ bǐ ná tuun,
ɛɛn, Eflayímu kpó mɛ e nɔ nɔ Samalíi lɛ́ é kpó,
mɛ e nɔ ɖɔ xó élɔ́ kpó goyíyí kpó, kpódó mɛmasí kpán lɛ́ é:
10 “Blǐki lɛ́ mu,
amɔ̌, mǐ ná zán awǐnnya kpikpa dó vɔ́ mɛ.
È gbo sikomɔ́ɔtín lɛ́,
amɔ̌, mǐ ná sɔ́ sɛ́dlutín lɛ́ dó ɖyɔ́ yě ná.”
11 Jexóva ná fɔ́n Hlesíni sín kɛntɔ́ lɛ́ dó jǐ tɔn,
bo ná sísɛ́ kɛntɔ́ tɔn lɛ́ bɔ yě ná tɔ́n ahwan ɛ,
12 Silíi ná gosín zǎnzǎnhwe jí, bɔ Filisitɛ́ɛn lɛ́ ná gosín gbadahwe jí,*
yě ná kɛ nu baa bo ná vún Izlayɛ́li ɖu.
Ðó nǔ énɛ́ lɛ́ bǐ wú ɔ, xomɛsin tɔn kpo ɖo te,
bɔ alɔ tɔn kpo ɖo dlɛ̌ndlɛ́n jí, bónú é ná xo yě.
13 Ðó togun ɔ lɛ́ kɔ wá Mɛ e dɔn tó nú yě é gɔ́n ǎ;
yě ba Jexóva ahwankpá lɛ́ tɔn ɔ ǎ.
14 Jexóva ná sɔ́ azǎn ɖokpó ɖó te,
bo ná sɛ́n ta kpó sí kpó, ala kpó fɛ́n kpó* sín Izlayɛ́li wú.
15 Mɛxómɔ kpó mɛ e è nɔ ɖó sísí ná tawun é kpó wɛ nyí ta ɔ,
bɔ gbeyíɖɔ e nɔ kplɔ́n adingban mɛ é wɛ nyí sí ɔ.
16 Mɛ ɖěɖěe ɖo ali xlɛ́ togun élɔ́ wɛ lɛ́ é ɖo yě hɛn flú wɛ,
bɔ nǔ bǐ wlú dó mɛ ɖěɖěe xlɛ́ ali wɛ è ɖe lɛ́ é.
17 Énɛ́ wú wɛ xomɛ ma ná hun Jexóva dó dɔ̌nkpɛvú yětɔn lɛ́ wú ǎ,
é ná kú nǔbláwǔ ɖěbǔ nú tɔ́cyɔvǐ yětɔn lɛ́ kpó asúkúsi yětɔn lɛ́ kpó ǎ,
ɖó yě mɛ bǐ wɛ nyí gǔfɔ́ndómawujítɔ́ kpó nǔnyanyawatɔ́ kpó,
bɔ yě mɛ bǐ nɔ ɖo xó maɖótaɖé lɛ́ ɖɔ wɛ.
Ðó nǔ énɛ́ lɛ́ bǐ wú ɔ, xomɛsin tɔn kpo ɖo te,
bɔ alɔ tɔn kpo ɖo dlɛ̌ndlɛ́n jí, bónú é ná xo yě.
18 Ðó nǔnyanyawiwa ɖo jiji wɛ myɔ ɖɔhun,
bo ɖo wunkan lɛ́ kpó gběhan nyanya lɛ́ kpó fyɔ́ wɛ.
É ná flɔ́ myɔ dó zun e ɖo zungbó ɔ mɛ lɛ́ é mɛ,
bɔ yě ná ji, bo ná mlí azizɔ yi jǐ.
19 Xomɛsin Jexóva ahwankpá lɛ́ tɔn tɔn zɔ́n bɔ
è dó to ɔ zo,
bɔ gbɛtɔ́ lɛ́ ná húzú myɔflɔ́nú.
Mɛ ɖěbǔ ná xásá mɛ e tlɛ nyí nɔví tɔn é ɖó ǎ.
20 Mɛɖé ná sɛ́n nǔ ɖo ɖisíxwé,
amɔ̌, xovɛ́ ná kpo ɖo sinsin i wɛ;
mɛɖé ná ɖu nǔ ɖo amyɔxwé,
amɔ̌, é ná gɔ́ xo ǎ.
Mɛ ɖokpó ɖokpó ná vún awa éɖésúnɔ tɔn sín lan ɖu,
21 Manasée ná vún Eflayímu ɖu,
bɔ Eflayímu ná vún Manasée ɖu.
Yě ná nɔ bǔ bo ná tɔ́n ahwan Judáa.
Ðó nǔ énɛ́ lɛ́ bǐ wú ɔ, xomɛsin tɔn kpo ɖo te,
bɔ alɔ tɔn kpo ɖo dlɛ̌ndlɛ́n jí, bónú é ná xo yě.