Ezayíi
61 Gbigbɔ Aklúnɔ Nǔbǐwúkpétɔ́ Jexóva tɔn ɖo jǐ ce,
ɖó Jexóva sɔ́ mì bónú má jlá wɛn ɖagbe mɛɖéesɔ́hwetɔ́ lɛ́.
É sɛ́ mì dó bónú má blá akpa nú mɛ e ayi yětɔn xo akpa lɛ́ é,
bo jlá mɛ e ɖo mɛ kannu lɛ́ é ɖɔ yě jɛ yěɖée sí,
bo ɖɔ nú gantɔ́ lɛ́ ɖɔ nukún yětɔn lɛ́ ná hun,
2 bónú má jlá fɛ́nú Jexóva tɔn sín xwe,
bo jlá hlɔnbibazán Mawu mǐtɔn tɔn,
bo dó gbɔ nú mɛ e ɖo aluwɛ mɛ lɛ́ é bǐ,
3 bo ná dó kpé nukún dó mɛ e ɖo Sinyɔ́ɔ ví wɛ lɛ́ é wú,
bo ná dó ná yě nǔ e è nɔ dó ba acɔ́ nú ta ná é ɖó afín tɛnmɛ,
bo ná dó ná yě ami, bónú yě ní j’awǎ bo ma nɔ aluwɛ mɛ ó.
Bo ná ná yě susu kpikpa sín awu ɖó awakanmɛkúmɛ tɛnmɛ.
È ná ylɔ́ yě ɖɔ atín ɖaxó nǔjlɔ́jlɔ́wiwa tɔn lɛ́,
atín e Jexóva tun bo ná dó kpa susu nú éɖée* lɛ́ é.
4 Yě ná vɔ́ aglingbigba hwexónu tɔn lɛ́ mɛ;
yě ná vɔ́ nɔtɛn hwexónu tɔn e jɛ vɔ̌ lɛ́ é gbá,
bo ná vɔ́ toxo e è sú kún dó ná lɛ́ é ɖó ayǐ,
ɛɛn, nɔtɛn ɖěɖěe ɖo vɔ̌ sín hwenu línlín ɖíe lɛ́ é.
5 “Jǒnɔ lɛ́ ná wá bo ná kpé nukún dó kanlinhwan mitɔn lɛ́ wú,
bɔ toɖévomɛnu lɛ́ ná nyí glesi mitɔn lɛ́ kpó vǐwungbowúkpénukúndótɔ́ mitɔn lɛ́ kpó.
6 Midɛɛ lɛ́ ɔ, è ná nɔ ylɔ́ mi ɖɔ mɛ e nɔ xwlé vɔ̌sánú Jexóva lɛ́ é;
yě ná ylɔ́ mi ɖɔ sinsɛnzɔ́watɔ́ Mawu mǐtɔn tɔn lɛ́.
Mi ná ɖu nǔɖókan akɔta lɛ́ tɔn,
bɔ mi ná gó ɖó susu* yětɔn wú.
7 Mi ná ɖu winnyá ǎ, é nyɔ́ wa ɔ, kanta we wɛ mi ná ɖó,
è ná dó winnyá yě ǎ, é nyɔ́ wa ɔ, yě ná sú xó kpó awǎjijɛ kpó dó kanta yětɔn tamɛ.
Ɛɛn, yě ná ɖu kanta we sín gǔ ɖo to yětɔn mɛ.
Awǎjijɛ mavɔmavɔ ná nyí yětɔn.
8 Ðó nyɛ Jexóva yí wǎn nú hwɛjijɔ;
un gbɛ́ wǎn nú ajojija kpó nǔagɔwiwa kpó.
Un ná sú axɔ́ yětɔn yě kpó gbejíninɔ kpó,
bo ná jɛ akɔ mavɔmavɔ ɖé xá yě.
9 È ná tuun kúnkan yětɔn ɖo akɔta lɛ́ tɛ́ntin,
bo ná tuun kúnkan yětɔn lɛ́ ɖo togun lɛ́ tɛ́ntin.
Mɛ e mɔ yě lɛ́ é bǐ ná tuun yě,
ɖɔ yě wɛ nyí kúnkan e jí Jexóva kɔn nyɔ̌ná dó é.”
10 Un ná j’awǎ tawun ɖo Jexóva mɛ.
Nyiɖésúnɔ mɛtún ɔ bǐ* ná j’awǎ ɖo Mawu ce mɛ.
Ðó é sɔ́ hwlɛngán sín awu dó nú mì;
é bú nǔjlɔ́jlɔ́wiwa sín awu gaga ɔ* dó mì,
asisúnɔ e blá ta vɔ̌sánúxwlémawutɔ́ ɖɔhun é ɖé ɖɔhun,
yawó e ba acɔ́ kpó acɔ́ɖónú tɔn lɛ́ kpó é ɖɔhun.
11 Ðó lěe ayǐkúngban nɔ bló bɔ nǔkún nɔ tɔ́n kun,
bɔ jikpá nɔ bló bɔ nǔ e è dó ɖ’é mɛ é nɔ tɔ́n kun gbɔn é ɔ,
mɔ̌ ɖokpó ɔ, Aklúnɔ Nǔbǐwúkpétɔ́ Jexóva
ná bló bɔ nǔjlɔ́jlɔ́wiwa kpó susu kpikpa kpó ná tɔ́n kun ɖo akɔta lɛ́ bǐ nukɔn.