Ezayíi
62 Ðó Sinyɔ́ɔ wú ɔ, un ná cí xwíí ǎ,
ɖó Jeluzalɛ́mu wú ɔ, un ná cí xwíí ǎ,
káká bɔ nǔjlɔ́jlɔ́wiwa tɔn ná kɔ́n wěziza e ɖo nyaa é ɖɔhun,
lobɔ hwlɛngán tɔn ná ɖi ɖɛ̌ zogbɛ́n ɖɔhun.
2 “Hwi nyɔ̌nu è, akɔta lɛ́ ná mɔ nǔjlɔ́jlɔ́wiwa towe,
bɔ axɔ́sú lɛ́ bǐ ná mɔ susu towe.
Bɔ è ná ylɔ́ we kpó nyǐkɔ yɔ̌yɔ́ ɖé kpó,
Jexóva ɖésúnɔ sín nu wɛ ná sun nyǐ énɛ́ we.
3 A ná húzú jɛ̌gbákún ɖɛkpɛ tɔn ɖo alɔ Jexóva tɔn mɛ,
bo ná húzú axɔ́súgbákún ɖo alɔkpákpá Mawu towe tɔn mɛ.
4 È sɔ́ ná ylɔ́ we ɖɔ nyɔ̌nu e è jó dó é ɖě ǎ,
è sɔ́ ná ylɔ́ to towe ɖɔ to e jɛ vɔ̌ é ɖě ǎ,
loɔ, è ná nɔ ylɔ́ we ɖɔ “Hwi mɛ wɛ nǔ e nɔ dó xomɛhunhun nú mì é ɖe,”
bo ná nɔ ylɔ́ to towe ɖɔ “Mɛ e wlí alɔ é.”
Ðó nǔ towe ná nyɔ́ Jexóva nukúnmɛ,
bɔ to towe ná cí mɛ e wlí alɔ é ɖɔhun.
5 Lěe dɔ̌nkpɛvú nɔ da nyɔ̌nu ɖo alɔjí gbɔn é ɔ,
to towe mɛ nu lɛ́ ná da we.
Mawu towe ná j’awǎ ɖó wǔ we,
lěe asisúnɔ ɔ nɔ j’awǎ ɖó yawó ɔ wú gbɔn é ɖɔhun.
6 Jeluzalɛ́mu è, un sɔ́ mɛcɔ́tɔ́ lɛ́ ɖó ahohó towe lɛ́ ta.
Zǎn kéze ɔ, yě ɖó ná nɔ abwɛ̌ gbeɖé ǎ.
Mi mɛ e nɔ ké nyǐkɔ Jexóva tɔn lɛ́ é mi,
mi ma gbɔjɛ ó,
7 mi ma ná ɛ gbɔjɛ ɖěbǔ, káká cóbónú é ɖó Jeluzalɛ́mu ayǐ, bónú é lí dǒ ó,
ɛɛn, káká cóbónú é ní sɔ́ ɛ dó húzú nǔ e è ná nɔ kpa susu ná ɖo ayǐkúngban ɔ jí é ó.”
8 Jexóva d’akpá bo xwlé nǔ d’é jí kpó ɖisílɔ tɔn kpó, ɛɛn, kpó awa tɔn hlɔ̌nhlɔ́nnɔ ɔ kpó, bo ɖɔ:
“Un sɔ́ ná ná jinukún mitɔn kɛntɔ́ mitɔn lɛ́, bɔ é ná nyí nǔɖuɖu nú yě ɖě ǎ,
mɔ̌ jɛ́n toɖévomɛnu lɛ́ ma sɔ́ ná nu vɛ̌ɛn yɔ̌yɔ́ mitɔn e tamɛ mi jɛ tagba dó é ɖě ǎ é nɛ́.
9 Amɔ̌, mɛ ɖěɖěe ɖo jinukún ɔ xo kplé wɛ lɛ́ é ná ɖu, bo ná kpa susu nú Jexóva,
bɔ mɛ ɖěɖěe ɖo vǐwun xo kplé wɛ lɛ́ é ná nu vɛ̌ɛn, ɖo kɔ́xota mímɛ́ ce lɛ́.”
10 Mi gbɔn hɔntogbó lɛ́ nu, mi gbɔn yě nu.
Mi bló ali ɔ ɖó nú togun ɔ.
Mi bló ali ɖaxó ɔ, mi bló.
Mi ɖe awǐnnya lɛ́ sín jí.
Mi sɔ́ wuntun* ɖé dó jǐ nú togun lɛ́.
11 Éɖíe! Jexóva jlá yi fí e ayǐkúngban ɔ kponu ɖó lɛ́ é ɖɔ:
“Ðɔ nú vǐ nyɔ̌nu Sinyɔ́ɔ tɔn ɖɔ:
‘Éɖíe! Hwlɛngán towe jawě.
Éɖíe! Ajɔ tɔn ɖo así tɔn,
bɔ azɔ̌kwɛ́ e é nɔ sú mɛ é ɖo nukɔn tɔn.’”
12 È ná ylɔ́ yě ɖɔ togun mímɛ́, mɛ ɖěɖěe Jexóva vɔ́ xɔ lɛ́ é,
è ná ylɔ́ we ɖɔ “Mɛ e è ba vɛ́návɛ́ná é,” “Toxo e è ma jó dó ǎ é.”