Nǔnywɛ́xó
24 Ma jló mɛ nyanya lɛ́ sín gbɛ ó,
gbɛ̌ yětɔn dídó ní ma ka gbo vɛ̌ we ó,
2 ɖó yě nɔ ɖo tamɛ lin dó dǎkaxixo jí wɛ,
bɔ nu yětɔn nɔ ɖo nǔ nyanya ɖɔ wɛ.
3 Nǔnywɛ́ wɛ è nɔ zán dó gbá xwé,*
nukúnnúmɔjɛnǔmɛ wɛ è nɔ zán dó bló bɔ é nɔ lí dǒ.
4 Nǔtuuntuun wɛ è nɔ zán dó bló bɔ dɔkun xɔ akwɛ́ lɛ́
kpó éé dɔn mɛ lɛ́ é kpó alɔkpa lɛ́ bǐ nɔ gɔ́ xwé ɔ sín xɔ lɛ́ mɛ.
5 Mɛ e ɖó nǔnywɛ́ é ɖó hlɔ̌nhlɔ́n,
nǔtuuntuun nɔ zɔ́n bɔ hlɔ̌nhlɔ́n mɛɖé tɔn nɔ jɛjí.
6 Ali e è xlɛ́ we kpó azɔ̌tuuntuun* kpó é wɛ a ná xwedó dó fun ahwan,
ényí wěɖexámɛtɔ́ sukpɔ́ ɔ, ɖuɖéjí* nɔ tíin.
7 Nǔnywɛ́ jɔ nǔnywɛ́ ɖíɖó vɛ́ xlonɔ;
é ɖó nǔ ɖě bo ná ɖɔ ɖo hɔntogbó toxo ɔ tɔn ta ǎ.
8 Mɛ ɖěbǔ e nɔ bló tuto nǔ nyanya tɔn é ɔ,
è ná ylɔ́ ɛ ɖɔ ayiwínníwínnígán.
9 Xlojijɔ* sín tuto lɛ́ ɔ, hwɛhuhu wɛ,
è nɔ gbɛ́ wǎn nú mɛcákotɔ́.
11 Hwlɛ̌n mɛ ɖěɖěe è kplá xwe kú lɛ́ é,
bo d’alɔ mɛ ɖěɖěe ɖo sa fún wɛ xwe fí e è ná hu yě ɖe lɛ́ é.
12 Ényí a ɖɔ: “Mǐ ma ka tuun nǔɖé d’é wú nɛ́” ɔ,
Mɛ e nɔ gbéjé ayi* kpɔ́n é mɔ nukúnnú jɛ mɛ ǎ cé?
Ɛɛn, Mɛ e ɖo kpínkpɔ́n we wɛ* é ná tuun,
é ná sú axɔ́ mɛ ɖokpó ɖokpó sɔgbe xá nǔ e mɛ ɔ wa é.
13 Vǐ ce, nɔ ɖu wǐin, ɖó é nyɔ́;
wǐin e gosín wǐinkpa mɛ é nɔ víví ɖo nu mɛ.
14 Mɔ̌ ɖokpó ɔ, tuun ɖɔ nǔnywɛ́ ná hɛn le wá nú we.*
Ényí a mɔ ɔ, a ná ɖó sɔgúdo ɖagbe,
bɔ nukúnɖíɖó towe ná cifo ǎ.
15 Ma ɖó ayi dídá, bo tɔ wu ɖo nǔjlɔ́jlɔ́watɔ́ sín xwé kpá ó;
ma kíjá fí e é nɔ gbɔjɛ ɖe é ó.
16 Ðó nǔjlɔ́jlɔ́watɔ́ sixú j’ayǐ azɔn tɛ́nwe, amɔ̌, é ná lɛ́ sí te,
loɔ, awě wɛ ná zin mɛdídá dɛ́.
17 Ényí kɛntɔ́ towe j’ayǐ hǔn, ma j’awǎ ó,
ényí é klɛ́n afɔ hǔn, xomɛ ní ma hun we ó;
18 é ma nyí mɔ̌ ǎ ɔ, Jexóva ná mɔ,
bɔ é ná nyɔ́ nukún tɔn mɛ ǎ, lobɔ é sɔ́ ná sin xomɛ dó è* ǎ.
19 Xomɛ ní ma sin we* ɖó mɛ nyanya lɛ́ wú ó;
ma jló mɛdídá lɛ́ sín gbɛ ó,
20 ɖó sɔgúdo ɖagbe ɖě ɖe nú mɛ ɖěbǔ e nyí mɛ nyanya é ǎ;
è ná cí mɛdídá sín zogbɛ́n.
21 Vǐ ce, ɖǒ sísí e gɔ́ngɔ́n é nú Jexóva kpó axɔ́sú ɔ kpó.
Ma dó gǔfɔ́ntɔ́ lɛ́* há ó,
22 ɖó awě e ná xo yě é ná wá ajijimɛ.
Mɛ̌ ka tuun kún e yě mɛ we lɛ́* ná sú dó nú yě é?
23 Nǔnywɛ́tɔ́ ɔ sín xó wɛ nyí xó élɔ́ lɛ́ lɔ:
É nyɔ́ ɖɔ è ní ɖe mɛɖé ɖó vo ɖo mɛɖé mɛ hwenu e è ɖo hwɛ ɖɔ wɛ é ǎ.
24 Mɛ ɖěbǔ e ɖɔ nú mɛdídá ɖɔ: “A nyí nǔjlɔ́jlɔ́watɔ́” é ɔ,
togun lɛ́ ná dó nu i, bɔ akɔta lɛ́ ná ɖe è gba.
25 Amɔ̌, nǔ bǐ ná yi ganjí nú mɛ e nɔ kɛ nu dó nǔ wú n’i lɛ́ é;
nyɔ̌ná ná kɔn dó jǐ yětɔn.
26 Gbɛtɔ́ lɛ́ ná kí si nú mɛ e nɔ ná xósin kpó ayi jlɔ́jlɔ́ kpó é dó nufló jí.*
27 Blǒ tuto azɔ̌ e ɖo gle towe mɛ é tɔn, bo sɔ́ nǔ nú nǔ bǐ ɖ’ayǐ ɖo gle towe mɛ.
Énɛ́ gúdo hǔn, gbǎ xwé towe.*
28 Ma nɔ yǎyá kpowun bo ɖe kúnnu dó nɔzo towe wú ó.
Ma zán nu towe dó blɛ́ mɛ ɖěvo lɛ́ ó.
29 Ma ɖɔ lě ó: “Lěe é bló gbɔn nú mì é wɛ un ná bló gbɔn n’i;
un ná sú nǔ e é wa é sín axɔ́ ɛ.”*
30 Un gbɔn fɔnlínnɔ sín gle mɛ,
ɛɛn, un gbɔn mɛ e ayivɔ vún é sín vǐwungbo mɛ.
31 Un mɔ bɔ gběhan nyanya gɔ́ mɛ;
wunkan lɛ́ vun blá ayǐkúngban ɔ,
bɔ dǒ tɔn* e è sɔ́ awǐnnya dó bló é gba hánnyá.
32 Un kpɔ́n nǔ énɛ́ bo hɛn dó ayi mɛ;
un mɔ nǔ énɛ́ bo kplɔ́n nǔ élɔ́:*
33 Amlɔ kpɛɖé, kɔmlɔgɔ́ sisa kpɛɖé,
alɔ bíblá dó wǔ bá gbɔjɛ kpɛɖé,
34 bɔ ya ná fyán we ajotɔ́ ɖɔhun,
lobɔ hɛ̌n ná fyán we ajotɔ́ axánsúnxó ɖɔhun.