Ezayíi

65 “Un jó nyiɖée dó, bɔ mɛ e ma kan mì byɔ́ ǎ lɛ́ é mɔ mì;

un jó nyiɖée dó, bɔ mɛ e ma ba mì ǎ lɛ́ é mɔ mì.

 2 Un kɛ awa nú togun tasyɛ́ntɔ́ ɖé ɖo azǎn ɔ bǐ jí,

nú mɛ ɖěɖěe ɖo zɔnlin ɖi wɛ ɖo ali e ma sɔgbe ǎ é jí,

bo ɖo linlin yěɖésúnɔ tɔn lɛ́ xwedó wɛ lɛ́ é;

 3 Togun ɖé wɛ, bo nɔ kpɔ́n nukúnmɛ nú mì hwɛhwɛ,

yě nɔ sá vɔ̌ ɖo jikpá lɛ́ mɛ, bo nɔ dó vɔ̌ zo ɖo blǐki lɛ́ jí.

 4 Yě nɔ jínjɔ́n yɔdo lɛ́ tɛ́ntin,

yě nɔ dɔ́ fí e ɖo hwlǎhwlá lɛ́ é,*

yě nɔ ɖu aglǔzalan,

bɔ nǔ blíblí lɛ́ sín nǔsúnnú nɔ ɖo zɛ̌n yětɔn lɛ́ mɛ.

 5 Yě nɔ ɖɔ: ‘Nɔ fí e a ɖe é; ma sɛkpɔ́ mì ó,

ɖó un nyí mɛ mímɛ́ hú we.’*

 6 Éɖíe! È ko wlán dó nukɔn ce;

un ná cí xwíí ǎ,

loɔ, un ná sú axɔ́ yě,

un ná sú axɔ́ yě mlɛ́mlɛ́,

 7 ɖó nǔwanyido yětɔn lɛ́ kpó nǔwanyido tɔ́gbó yětɔn lɛ́ tɔn lɛ́ kpó wútu,” wɛ Jexóva ɖɔ.

“Ðó yě dó vɔ̌ zo ɖo só ɖaxó lɛ́ jí,

bo dó winnyá mì ɖo só kpɛví lɛ́ jí wútu ɔ,

nǔ nukɔntɔn e un ná wa é wɛ nyí ɖɔ un ná sú axɔ́ yětɔn yě mlɛ́mlɛ́.”

“Ényí è mɔ vǐwun yɔ̌yɔ́ ɖo vǐwunkɔ ɖé mɛ ɔ,

mɛɖé nɔ ɖɔ: ‘Ma hɛn gblé ó, ɖó ɖagbe tɔn* ɖ’é mɛ.’

Mɔ̌ ɖokpó ɔ wɛ un ná bló ɖó mɛsɛntɔ́ ce lɛ́ wútu;

un ná sú kún dó nú yě mɛ bǐ ǎ.

 9 Un ná ná kúnkan ɖokpó Jakɔ́bu,

bo ná ná mɛ e ná ɖu só ce lɛ́ sín gǔ é Judáa;

mɛ e un sɔ́ lɛ́ é ná ɖu gǔ tɔn,

bɔ mɛsɛntɔ́ ce lɛ́ ná nɔ fínɛ́.

10 Calɔ́ni ná húzú fí e lɛ̌ngbɔ́ lɛ́ ná nɔ ɖu ama ɖe é,

bɔ tɔdo* Akɔ́ɔ tɔn ná húzú fí e nyibú lɛ́ nɔ gbɔjɛ ɖe é,

nú togun ce e ba mì é.

11 Amɔ̌, mi ɖo mɛ ɖěɖěe nɔ gbɛ́ Jexóva lɛ́ é tɛ́ntin,

mɛ ɖěɖěe nɔ wɔn só mímɛ́ ce,

mɛ ɖěɖěe nɔ tɛ́ távo nú Taɖagbevodún,

bo nɔ wún vɛ̌ɛn e è cáká é gɔ́ kɔ́fu nú Byɔ̌wávodún é.

12 Énɛ́ wú ɔ, un ná jó mi nú hwǐ,

bɔ mi mɛ bǐ ná jɛ kpo, bɔ è ná hu mi,

ɖó un ylɔ́ mi, amɔ̌, mi sɔ ǎ,

un ɖɔ xó nú mi, mi ka ɖótó ǎ;

mi nɔ fɔ́n bo nɔ ɖo nǔ e nylá nukún ce mɛ lɛ́ é wa wɛ,

lobo wa nǔ e un gbɛ́ wǎn ná lɛ́ é.”

14 Éɖíe! Mɛsɛntɔ́ ce lɛ́ ná sú xó kpó awǎjijɛ kpó, ɖó ninɔmɛ ɖagbe e mɛ ayi yětɔn ɖe é wú,

midɛɛ lɛ́ ka ná ya avǐ, ɖó wǔvɛ́ e se wɛ ayi mitɔn ɖe é wú,

bɔ mi ná dó gbɛvíhan, ɖó ayi mitɔn gba dó wútu.

15 Mi ná jó nyǐkɔ ɖé dó gǔdo mitɔn, bɔ mɛ ce e un sɔ́ lɛ́ é ná zán nudómɛ ɖé ɖɔhun,

Aklúnɔ Nǔbǐwúkpétɔ́ Jexóva ná hu mi mɛ ɖokpó ɖokpó,

amɔ̌, é ná zán nyǐkɔ ɖěvo dó ylɔ́ mɛsɛntɔ́ éɖésúnɔ tɔn lɛ́ ná;

16 bónú mɛ ɖěbǔ e ɖo nyɔ̌ná ba nú éɖée wɛ ɖo ayǐkúngban ɔ jí é ɔ,

Mawu nǔgbó* ɔ ní kɔn nyɔ̌ná dó jǐ tɔn,

lobonú mɛ ɖěbǔ e dó akpá, bo xwlé nǔ d’é jí ɖo ayǐkúngban ɔ jí é

ní xwlé nǔ gbɔn Mawu nǔgbó* ɔ gblamɛ.

Ðó è ná wɔn wǔvɛ́* xóxó lɛ́;

è ná sɔ́ yě hwlá sín nukún ce mɛ.

17 Ðó éɖíe! Un ɖo jǐnukúnsin yɔ̌yɔ́ kpó ayǐkúngban yɔ̌yɔ́ ɖé kpó dá wɛ;

è sɔ́ ná flín nǔ xóxó lɛ́ ǎ,

mɔ̌ jɛ́n yě ma sɔ́ ná wá ayi mɛ ǎ é nɛ́.

Ðó éɖíe! Un ɖo Jeluzalɛ́mu dá wɛ, bónú é ná dó awǎjijɛ nú mɛ,

bo ɖo togun tɔn dá wɛ, bónú é ná dó xomɛhunhun nú mɛ.

19 Un ná j’awǎ ɖó Jeluzalɛ́mu wú, bɔ xomɛ ná hun mì ɖó togun ce wú;

mɔ̌ jɛ́n è ma sɔ́ ná se avǐ sín gbe alǒ wǔvɛ́ mimɔ sín xósúsú ɖě ɖo to ɔ mɛ ǎ é nɛ́.”

20 “Vǐ yɛ̌yɛ́ ɖě sɔ́ ná ɖo to ɔ mɛ, bo ná nɔ gbɛ nú azǎn yɔywɛ ɖé kpowun ǎ,

mɔ̌ jɛ́n degénɔ ɖě ma ná gɔn ji dɔ́ ǎ é nɛ́.

Ðó mɛ ɖěbǔ e ná ɖó xwe 100 bo kú é ɔ, è ná ɖɔ ɖɔ yɔkpɔ́vú kpowun wɛ n’i,

bɔ è ná dó nu hwɛhutɔ́, ényí é tlɛ ɖó xwe 100 ɔ nɛ́.*

21 Yě ná sá xwé, bo ná nɔ mɛ,

yě ná tun vǐwun bo ná ɖu sínsɛ́n tɔn.

22 Yě ná sá xwé bónú mɛ ɖěvo ná nɔ mɛ ǎ,

mɔ̌ jɛ́n yě ma ná tun vǐwun bónú mɛ ɖěvo ná ɖu ǎ é nɛ́.

Ðó ji e atín nɔ dɔ́ é wɛ togun ce ná dɔ́,

bɔ mɛ ce e un sɔ́ lɛ́ é ná ɖu vǐví azɔ̌ e yě sɔ́ alɔ yětɔn dó wa ná lɛ́ é tɔn mlɛ́mlɛ́.

23 Yě ná jɛ tagba* dó wǔvɔ́* ǎ,

mɔ̌ jɛ́n yě ma ná ji vǐ bónú yě ná se wǔvɛ́ ǎ é nɛ́,

ɖó kúnkan e jí Jexóva kɔn nyɔ̌ná dó é wɛ yě nyí,

yě kpó vǐ yětɔn lɛ́ kpó.

24 Cóbónú yě tlɛ ná ylɔ́ mì ɔ, un ná sɔ nú yě;

hwenu e yě ná kpo ɖo xó ɖɔ wɛ é ɔ, un ná se.

25 Hla kpó lɛ̌ngbɔ́ kpó ná ɖu nǔ ɖó kpɔ́,

kinnikínní ná ɖu gběhan nyibú ɖɔhun,

bɔ dan sín nǔɖuɖu ná nyí kɔ́.