Ezayíi
54 “Hwi nyɔ̌nu wɛnsinɔ e ma ji vǐ kpɔ́n ǎ é, sú xó kpó awǎjijɛ kpó!
Hwi mɛ e ma se wǔvɛ́ ajidonu tɔn kpɔ́n ǎ é, xomɛ ní hun we, bónú a ní sú xó kpó awǎjijɛ kpó,
ɖó mɛ e è jó dó é sín vǐ súnnu* lɛ́ sukpɔ́
hú nyɔ̌nu e ɖó asú* é sín vǐ súnnu lɛ́,” wɛ Jexóva ɖɔ.
2 “Blǒ bónú goxɔ towe sín nɔtɛn ní gbló d’é jí.
Vlɔ̌n goxɔ towe ɖaxó ɔ sín avɔ lɛ́.
Ma ɖó dogbó nú hwiɖée ó, dlɛ̌n goxɔ towe sín kan lɛ́,
bo ná hlɔ̌nhlɔ́n goxɔ towe sín só lɛ́.
3 A ná gbló ada yi ɖisí amyɔ.
Kúnkan towe ná yí akɔta lɛ́,
bɔ yě ná nɔ toxo e jɛ vɔ̌ lɛ́ é mɛ.
4 Ma ɖi xɛsi ó, ɖó è ná dó winnyá we ǎ;
ma mɔ ɖɔ è ɖe émí kpo ó, ɖó è ná flú we ǎ.
A ná wɔn winnyá e a ɖu ɖo vǔ é,
bɔ yɛ̌yi e è ɖe sín wǔ we hwenu e a nyí asúkúsi é ɔ, a sɔ́ ná flín ɖě ǎ.”
5 “Ðó Mɛ ɖaxó e bló we é cí asú ɖɔhun nú we,
Jexóva ahwankpá lɛ́ tɔn wɛ nyǐkɔ tɔn nɔ nyí,
bɔ Mɛ mímɛ́ Izlayɛ́li tɔn ɔ, wɛ nyí Mɛ e vɔ́ we xɔ é.
È ná ylɔ́ ɛ ɖɔ Mawu ayǐkúngban ɔ blěbú tɔn.
6 Ðó Jexóva ylɔ́ we, asi e è jó dó é, mɛ e aluwɛ vun blá é, wɛ a nyí ɖɔhun,
a cí asi e è da ɖo wǐnnyáwínnyá mɛ, bo wá gbɛ́ é ɖɔhun,” wɛ Mawu towe ɖɔ.
7 “Ðó un jó we dó nú hwenu kléwún ɖé,
amɔ̌, un ná kplá we lɛ́ kɔ kpó nǔbláwǔkúnúmɛ ɖaxó kpó.
8 Un ná hwlá nukúnmɛ ce dó we kpó xomɛsin ɖaxó kpó nú hwenu ɖé,
amɔ̌, ɖó wǎnyíyí e ma nɔ sɛ do ǎ e un ɖó é nɔ nɔ ayǐ sɔ́yi wútu ɔ, un ná kú nǔbláwǔ nú we,” wɛ Jexóva Mɛ e vɔ́ we xɔ é ɖɔ.
9 “Lěe é nyí gbɔn ɖo Nɔwée hwenu é wɛ é cí nú mì.
Lěe un xwlé nǔ hwenɛ́nu ɖɔ sin kún sɔ́ ná cyɔ́n ayǐkúngban ɔ jí ɖě ó gbɔn é ɔ,
mɔ̌ ɖokpó ɔ, un xwlé nǔ ɖɔ un kún sɔ́ ná sin xomɛ dó we syɛ́nsyɛ́n, alǒ gbɛ́ nǔ nú we ɖě ó.
10 Ðó è sixú ɖe só ɖaxó lɛ́ síin,
bɔ só kpɛví lɛ́ sixú húnhún,
amɔ̌, wǎnyíyí e ma nɔ sɛ do ǎ e un ɖó nú we é ná bú ǎ,
mɔ̌ jɛ́n è ma ná gba fífá sín akɔ e un jɛ xá we é ǎ é nɛ́,” wɛ Jexóva, Mɛ e nɔ kú nǔbláwǔ nú we é ɖɔ.
11 “Nyɔ̌nu e se wǔvɛ́ é, hwi mɛ e jɔhɔn syɛ́nsyɛ́n dán é, hwi mɛ e è ma dó gbɔ ná ǎ é,
kɔ́ nyinya syɛ́nsyɛ́n wɛ un sɔ́ dó ɖo awǐnnya towe lɛ́ tɛ́ wɛ,
bo sɔ́ safíi dó ɖo dodónu towe ɖó ayǐ wɛ.
12 Un ná sɔ́ awǐnnya hwlibíi dó bló dǒ toxo towe tɔn sín ta ná,
bo ná sɔ́ awǐnnya e nɔ kɔ́n lɛ́ é dó bló hɔntogbó towe lɛ́ ná,
lobo ná sɔ́ awǐnnya xɔ akwɛ́ lɛ́ dó bló dogbó towe lɛ́ bǐ.
14 È ná dó we do syɛ́nsyɛ́n nyi nǔjlɔ́jlɔ́wiwa jí.
Kɔgbídínúmɛ ná lín dó we tawun,
a ná ɖi xɛsi nú nǔ ɖě ǎ, nǔ ɖě ka ná ɖó adohu adohu nú we ǎ,
ɖó nǔ e nɔ ɖó adohu adohu nú mɛ é ɖě ná sɛkpɔ́ we ǎ.
15 Ényí mɛ ɖěbǔ tɔ́n ahwan we gbeɖé ɔ,
é ná nyí nyɛ wɛ ɖe gbe tɔn n’i ǎ.
Mɛ ɖěbǔ e ná tɔ́n ahwan we é ná cí ahwan ɖó hwɛ wú.”
16 “Éɖíe! Nyiɖésú wɛ dá alɔlyɛnzɔ́watɔ́,*
éé nɔ fún jɔhɔn dó akán e ɖo jiji wɛ é,
bɔ azɔ̌ tɔn nɔ ná alyánnú é.
Nyiɖésú wɛ lɛ́ dá mɛ e nɔ sú kún dó nú mɛ é, bónú é ná sú kún dó nú mɛ.
17 Alyánnú e è ná sɔ́ dó jǐ towe é ɖěbǔ ná ɖó ɖuɖéjí ǎ,
a ná ɖó hwɛ nú ɖɛ̌ ɖěbǔ e ná sí te dó jǐ towe ɖo hwɛɖiɖɔ hwenu é.
Mɛsɛntɔ́ Jexóva tɔn lɛ́ sín gǔ nɛ́,
bɔ gɔ̌n ce wɛ nǔjlɔ́jlɔ́wiwa yětɔn nɔ gosín,” wɛ Jexóva ɖɔ.