Nǔnywɛ́xó
5 Vǐ ce, hɛn ayi dó nǔnywɛ́ ce wú.
Ðǒtó nǔ e kplɔ́n mɛ wɛ un ɖe dó nukúnnúmɔjɛnǔmɛ wú é kpó sɔxwixwe kpó,
2 bo ná dó sixú nya xɛ ɖo nǔwúkpíkpé tamɛ linlin tɔn towe jí,
lobo zán nu towe dó nya xɛ ɖo nǔtuuntuun jí.
3 Ðó nyɔ̌nu banáwatɔ́* sín nufló víví wǐinjá ɖɔhun,
bɔ nu tɔn ɖíɖí hú ami.
4 Amɔ̌, ɖo vivɔnu ɔ, é nɔ vɛ́ vǐvɛ́ ɖɔhun,
lobo nɔ ɖá hwǐ nuwenɔ ɖɔhun.
5 Kú wɛ afɔ tɔn lɛ́ xwe.
Afɔ e ɖe wɛ é ɖe lɛ́ é nɔ kplá mɛ yi Yɔdo* mɛ tlɔlɔ.
6 É nɔ lin tamɛ ɖě dó gbɛli ɔ jí ǎ.
É nɔ ɖo flúflú wɛ ɖo ali tɔn lɛ́ jí, bo ka tuun fí e yě nɔ kplá mɛ yi é ǎ.
7 Din ɔ, vǐ ce lɛ́ mi, mi ɖótó mì,
bo ma lɛ́ kɔ sín nǔ e ɖɔ wɛ un ɖe lɛ́ é gúdo ó.
8 Nɔ zɔ vwéé dó nyɔ̌nu mɔ̌hun;
ma sɛkpɔ́ ali e yi xwé tɔn gbe é ó,
9 énɛ́ ɔ, wi e ɖo ta towe é ná kɔ́n ǎ,
mɔ̌ jɛ́n a ma ná se wǔvɛ́ nú xwe gěgé ǎ é nɛ́;
10 mɔ̌ ɖokpó ɔ, jǒnɔ lɛ́ ná vɔ nǔɖókan towe lɛ́* ǎ,
bɔ nǔ e a jɛ tagba bo ɖó lɛ́ é ná yi toɖévomɛnu xwégbe ǎ.
11 É ma nyí mɔ̌ ǎ ɔ, a ná wɛn azɔn ɖo vivɔnu gbɛzán towe tɔn,
hwenu e hlɔ̌nhlɔ́n towe kpó agbaza towe kpó ná yi gǔdo é.
12 A ná ɖɔ: “Étɛ́wú un ka gbɛ́ wǎn nú kplɔ́n e è ná mì é?
Étɛ́wú ayi ce ka dó vɛ̌ nú nu e è kɛ dó nǔ wú nú mì é?
13 Un ɖótó nǔkplɔ́nmɛtɔ́ ce lɛ́ sín gbe ǎ,
un hɛn ayi dó nǔ e mɛ̌si ce lɛ́ ɖɔ lɛ́ é wú ǎ.
14 Xó ce ko ɖibla fó bǐ
ɖo agun ɔ blěbú tɛ́ntin.”*
15 Nɔ nu sitɛ́nu hwiɖésúnɔ tɔn sín sin,
nɔ nu sin e nɔ sa sín dotɔ hwiɖésúnɔ tɔn mɛ é.*
16 Tɔjɔtɛn towe lɛ́ ɖó ná fúnfún kpé kɔ́xo wɛ a?
Sin towe e ɖo sisa wɛ lɛ́ é ɖó ná kpé tokplétɛn lɛ́ wɛ a?
17 Yě ní nyí hwiɖokpónɔ tɔn,
bo ma nyí hwi kpó jǒnɔ lɛ́ kpó tɔn ó.
18 Nyɔ̌ná ní kɔn dó tɔjɔtɛn* hwiɖésúnɔ tɔn jí,
j’awǎ xá asi e a da ɖo wǐnnyáwínnyá mɛ é,
19 agbanlín asi ɖagbe ɖagbe ɖé wɛ, sógbɔ́ ɖɛkpɛ ɖɛkpɛ ɖé wɛ.
Anɔ̌ tɔn lɛ́ ní nɔ jɛmɛ nú* we hwebǐnu.
Wǎnyíyí tɔn ní nɔ dɔn we hwebǐnu.
20 Énɛ́ wú ɔ, vǐ ce, étɛ́wú nyɔ̌nu banáwatɔ́* ka ná jló we?
Étɛ́wú a ka ná zunfán nyɔ̌nu nǔblíblíwatɔ́* gbánwúngbánwún dó akɔ́nnu?
21 Ðó ali gbɛtɔ́ tɔn lɛ́ bǐ wɛ Jexóva nɔ mɔ;
é nɔ gbéjé ali tɔn lɛ́ bǐ kpɔ́n.
22 Mɛ nyanya ɔ, nǔwanyido éɖésúnɔ tɔn lɛ́ wɛ nɔ nyí mɔ n’i,
hwɛ éɖésúnɔ tɔn sín kan wɛ ná blá ɛ.
23 É ná kú, ɖó é se kplɔ́n ǎ wútu.
É ná bú ali, ɖó xlonɔnúwiwa tɔn zɛ jlɛ̌ wú wútu.