Ezayíi
6 Ðo xwe e mɛ axɔ́sú Oziyási kú é ɔ, un mɔ Jexóva ɖo ayǐjínjɔ́n ɖo axɔ́súzinkpo e yi jǐ tawun é ɖokpó jí, bɔ awu tɔn sín tó gɔ́ sinsɛnxɔ ɔ. 2 Selafɛ́ɛn lɛ́ ɖo te ɖo ta tɔn nu; yě mɛ ɖokpó ɖokpó ɖó awa ayizɛ́n. Yě mɛ ɖokpó ɖokpó* cyɔ́n awa we nukúnmɛ, bo cyɔ́n we dó afɔ, lobɔ yě mɛ ɖokpó ɖokpó nɔ zɔn kpó awa we kpó.
3 Yě nɔ sú xó sɛ́ dó yěɖée lɛ́ ɖɔ:
“Mǐmɛ́, mǐmɛ́, mǐmɛ́ wɛ nyí Jexóva ahwankpá lɛ́ tɔn.
Susu tɔn gɔ́ ayǐkúngban ɔ blěbú jí.”
4 Xósúsú ɔ* zɔ́n bɔ hɔnsóswé lɛ́ nɔ húnhún, bɔ azizɔ gɔ́ xwé ɔ.
5 Énɛ́ ɔ, un ɖɔ: “Heelú mì!
Un kú lo,*
ɖó un nyí mɛɖé bɔ nufló ce blí,
bɔ un nɔ nɔ togun e sín nufló blí é tɛ́ntin;
ɖó nukún ce lɛ́ mɔ Axɔ́sú ɔ, Jexóva ahwankpá lɛ́ tɔn ɖésúnɔ!”
6 Ée un ɖɔ mɔ̌ é ɔ, Selafɛ́ɛn lɛ́ ɖokpó zɔn wá gɔ̌n ce, bɔ akán zozo e é sɔ́ bɛ̌kpa dó ɖe ná ɖo vɔ̌sákpe ɔ jí é ɖo alɔ tɔn mɛ. 7 É sɔ́ myɔkán ɔ sɔ́ sɔ́ nu ce, bo ɖɔ:
“Éɖíe! Myɔkán élɔ́ sɔ́ nufló towe lɛ́.
È ɖe nǔwanyido towe síin,
bo súnsún hwɛ towe.”
8 Énɛ́ gúdo ɔ, un se gbe Jexóva tɔn, bɔ é ɖɔ: “Mɛ̌ un ka ná sɛ́ dó? Mɛ̌ ka ná yi nú mǐ?” Bɔ un ɖɔ: “Nyɛ ɖíe! Sɛ́ mì dó!”
9 É yí gbe nú mì ɖɔ: “Yi, bo ɖɔ nú togun élɔ́ ɖɔ:
‘Mi ná se azɔn gěgé,
amɔ̌, mi ná mɔ nukúnnú jɛ mɛ ǎ;
mi ná mɔ azɔn gěgé,
amɔ̌, mi ná tuun nǔtí ǎ.’
10 Blǒ bónú togun élɔ́ sín ayi ní kú atli,
blǒ bónú tó yětɔn lɛ́ ní sú,
sú nukún yětɔn lɛ́,
bónú yě ní ma wá kpé wú, bo mɔ nǔ ɖó nukún yětɔn lɛ́ wú,
lobo se nǔ ɖó tó yětɔn lɛ́ wú ó.
Mɔ̌ mɛ ɔ, ayi yětɔn ná mɔ nukúnnú jɛ nǔ mɛ ǎ,
yě ka ná lɛ́ kɔ, bónú è ná gbɔ azɔn nú yě ǎ.”
11 Énɛ́ ɔ, un ɖɔ: “Jexóva è, káká jɛ hwetɛ́nu?” Bɔ é ɖɔ:
“Káká jɛ hwenu e toxo lɛ́ ná gba hánnyá, bɔ mɛ ɖěbǔ ma sɔ́ ná ɖo yě mɛ ǎ,
lobɔ mɛ ɖěbǔ ma sɔ́ ná ɖo xwé lɛ́ gbe ǎ,
bɔ to ɔ ná gba, bo ná jɛ vɔ̌ é;
12 káká jɛ hwenu e Jexóva ná bɛ́ súnnu lɛ́ yi fí línlín,
bɔ lěe to ɔ jɛ vɔ̌ gbɔn é ná syɛ́n tawun é.
13 Amɔ̌, togun Izlayɛ́li tɔn ɔ sín wǒvlɔ́ɖó ná kpo ɖo to ɔ mɛ, bɔ è ná lɛ́ dó yě zo. Yě cí atín ɖaxó kpó cɛ́nitín kpó ɖɔhun, bɔ ée è gbo yě zin dɛ́ gúdo é ɔ, é kpo atínta ɔ; kúnkan mímɛ́ ɖé wɛ ná nyí atínta tɔn.”