Nǔnywɛ́xó
18 Mɛ ɖěbǔ e nɔ ɖó wǔ zɔ nú mɛ ɖěvo lɛ́ é nɔ nya jlǒ cejɛ́nnábí tɔn éɖésúnɔ tɔn lɛ́ sín gbě;
é nɔ hɔn nǔnywɛ́ alɔkpa bǐ nyi gbě.*
2 Xlonɔ nɔ ba ná mɔ nukúnnú jɛ nǔ ɖě mɛ ǎ;
é nyɔ́ wa ɔ, é nɔ kɔ́n sɛ sín nǔ e ɖo ayi tɔn mɛ é jí.
3 Ényí mɛdídá wá ɔ, wǎngbɛ́númɛ lɔ nɔ jɛ túnu tɔn,
è kɔ́n wi mɛtɔn ɔ, winnyá wɛ nɔ jɛ túnu tɔn.
4 Xó e nɔ tɔ́n sín gbɛtɔ́ nu mɛ é cí tɔ e gɔ́ngɔ́n é ɖɔhun.
Jɔtɛn nǔnywɛ́ tɔn cí tɔ e ɖo sisa wɛ é ɖɔhun.
5 É nyɔ́ ɖɔ è ní nɔ mɛdídá jí,
alǒ tɛ hwɛjijɔ nǔjlɔ́jlɔ́watɔ́ ǎ.
6 Xlonɔ sín xó nɔ dɔn jlɛ wá,
bɔ nu tɔn nɔ dɔn hunxixo wá.
7 Xlonɔ sín nu ɖésú wɛ nɔ sú kún tɔn dó,
bɔ nufló tɔn lɛ́ nyí mɔ nú gbɛ* tɔn.
8 Jidómɛtɔ́ sín xó cí nǔɖuɖu e dó tɔ́n é* ɖɔhun;
è nɔ mì hlowun, bɔ é nɔ yi tɔ́n ɖo adɔgo mɛ.
9 Mɛ ɖěbǔ e nɔ ɖi fɔnlín ɖo azɔ̌ tɔn kɔn é
nyí nɔví nú mɛ e nɔ sú kún dó nú nǔ é.
10 Nyǐkɔ Jexóva tɔn nyí ahohó syɛ́nsyɛ́n ɖé.
Nǔjlɔ́jlɔ́watɔ́ nɔ hɔn byɔ́ mɛ, bo nɔ mɔ alɔcyɔ́nmɛjí.*
11 Dɔkun e dɔkunnɔ jɛ é cí toxo e ahohó lɛ́ lɛ̌ dó é ɖɔhun n’i;
ɖo linlin tɔn mɛ ɔ, dɔkun tɔn cí dǒ e nɔ nya xɛ ɖo mɛ jí é ɖɔhun.
12 Goyíyí e ɖo gbɛtɔ́ sín ayi mɛ é wɛ nɔ sú kún tɔn dó,
mɛɖée wɛ è nɔ sɔ́ hwe cóbɔ è nɔ sɔ́ mɛ su.
13 Ényí mɛɖé kɛ nu dó xó ɖé wú cóbó se nǔ e kunkplá xó ɔ lɛ́ é bǐ ɔ,
xlonɔnú wɛ é wa bo lɛ́ dó winnyá éɖée.
14 Mɛ e kpankɔ́n é ná kpé wú bo ná dɛ hwenu e é ɖo azɔn jɛ wɛ é,
amɔ̌, mɛ̌ ka sixú dɛ ɖo awakanmɛ kú mɛ nu?
15 Mɛ e ɖó nukúnnúmɔjɛnǔmɛ é sín ayi nɔ ɖó nǔtuuntuun,
bɔ tó nǔnywɛ́tɔ́ tɔn nɔ ba nǔtuuntuun mɔ.
16 Nǔ e mɛɖé ná é nɔ hun ali n’i;
é nɔ hun ali n’i yi gbɛtɔ́ nukúnɖéjí lɛ́ gɔ́n.
17 Nú mɛɖé wá jɛ hwɛ dó nukɔn ɔ, é nɔ cí ɖɔ hwɛ tɔn jɔ wɛ ɖɔhun,
káká jɛ hwenu e mɛ wegɔ́ ɔ nɔ wá, bo nɔ ɖɔ é ní ná kúnnuɖenú lɛ́ é.*
18 Akɔ nyinyi nɔ ɖó nǔ nǔdindɔn nu,
é nɔ dó hwɛ gbɔ nú* mɛ e ɖo nǔ dɔn wɛ syɛ́nsyɛ́n lɛ́ é.
19 Nɔví e è wa nǔ nyi do ná é nɔ hɛn nǔ gángángán b’ɛ nɔ syɛ́n hú toxo e è mɛ ahohó lɛ́ lɛ̌ dó é,
nǔdindɔn ɖé lɛ́ tíin bo cí toxo e è mɛ ahohó lɛ́ lɛ̌ dó é sín hɔnkpo lɛ́ ɖɔhun.
20 Xó e nɔ tɔ́n sín mɛɖé nu mɛ é ná zɔ́n bɔ adɔgo tɔn ná gɔ́;
nǔ e nu tɔn ji lɛ́ é ná kpé è kpo.
21 Ðɛ̌ ɖó hlɔ̌nhlɔ́n bo ná hu mɛ alǒ hwlɛ́n gbɛ gán;
mɛ e yí wǎn ná bo nɔ zán lɛ́ é ná ɖu sínsɛ́n tɔn lɛ́.
22 Mɛ e mɔ asi ɖagbe é ɔ, dɔkun wɛ é mɔ,
é nɔ mɔ fɛ́nú* Jexóva tɔn.
23 Wamamɔnɔ nɔ ɖo vo sa wɛ hwenu e é nɔ ɖo xó ɖɔ wɛ é,
amɔ̌, dɔkunnɔ nɔ kán gbe nú mɛ dó ná xósin.
24 Xɔ́ntɔn ɖé lɛ́ tíin bo nɔ ɖo gbesisɔmɛ bo ná wa nǔ dó yěɖée lɛ́ wú,
amɔ̌, xɔ́ntɔn ɖé lɛ́ tíin bo nɔ tɛ́ dó mɛ wú hú nɔví.