Ezayíi
41 “Tɔtɛ́ntinto lɛ́ mi, mi cí xwíí bo ɖótó mì;*
akɔta lɛ́ ní lɛ́ vɔ́ hlɔ̌nhlɔ́n yětɔn mɔ.
Yě ní sɛkpɔ́ mì, lobo ɖɔ xó.
Mǐ ní kpan nukɔn mǐɖée lɛ́, bónú má ɖɔ hwɛ xá mi.
2 Mɛ̌ ka fɔ́n mɛɖé sí te sín hwetɔ́nhwe jí,*
bo ylɔ́ ɛ kpó nǔjlɔ́jlɔ́wiwa kpó wá afɔ Tɔn lɛ́ kɔn,*
bo ná jó akɔta lɛ́ n’i,
lobo ná bló bɔ é ná ɖu ɖo axɔ́sú lɛ́ jí?
Mɛ̌ ka bló bɔ yě húzú afúntúntún ɖo hwǐ tɔn nukɔn,
lěe jɔhɔn nɔ d’alɔ nǔywɛ́ mɛ gbɔn é ɖo gǎ tɔn nukɔn?
3 É jɛ yě gúdo, nǔɖé ka sú ali dó è ǎ,
bɔ é ɖo ali e jí afɔ tɔn ma ko tɛ kpɔ́n ǎ lɛ́ é jí gbɔn wɛ.
4 Mɛ̌ sín azɔ̌ ka nyí énɛ́? Mɛ̌ ka wa nǔ énɛ́,
bo ylɔ́ jijimɛ lɛ́ sín bǐbɛ́mɛ?
Nyɛ Jexóva ɔ, nyi wɛ nyí Mɛ nukɔntɔn ɔ;
mɛ ɖokpó ɔ wɛ un ná nyí nú mɛ gǔdo gúdo tɔn lɛ́.”
5 Tɔtɛ́ntinto lɛ́ mɔ, bɔ xɛsi jɛ yě jí.
Mɛ e nɔ nɔ fí e ayǐkúngban ɔ kponu ɖó lɛ́ é jɛ sísɔ́sísɔ́ jí.
Yě xo yěɖée lɛ́ kplé, bo jawě.
6 Mɛ ɖokpó ɖokpó nɔ d’alɔ gbɛ̌ tɔn,
bo nɔ ɖɔ nú nɔví tɔn ɖɔ: “Dǒ hlɔ̌nhlɔ́n.”
7 Énɛ́ ɔ, alɔlyɛnzɔ́watɔ́* nɔ dó wǔsyɛ́n lanmɛ nú gankɔntɔ́;
mɛ e nɔ sɔ́ zǔn dó tun nǔ ná é
nɔ dó wǔsyɛ́n lanmɛ nú mɛ e nɔ ɖo nǔ zin dó wan jí wɛ é.
É nɔ ɖɔ dó gan e è cá é wú ɖɔ: “É nyɔ́.”
Énɛ́ ɔ, é xwe hǔnjɛ́n d’é mɛ, bónú é ní ma xo to ó.
8 “Amɔ̌, hwi Izlayɛ́li è, mɛsɛntɔ́ ce wɛ a nyí,
hwi Jakɔ́bu e un sɔ́ é,
xɔ́ntɔn ce Ablaxámu sín kúnkan,*
9 hwi mɛ e un kplá sín fí e ayǐkúngban ɔ kponu ɖó lɛ́ é,
hwi mɛ e un ylɔ́ sín fí e lín hú gǎn ɖo ayǐkúngban ɔ jí lɛ́ é.
Un ɖɔ nú we ɖɔ: ‘Hwi wɛ nyí mɛsɛntɔ́ ce;
un sɔ́ we; un gbɛ́ we ǎ.
10 Ma ɖi xɛsi ó, ɖó un ɖo kpɔ́ xá we.
Ado ma hu we ó, ɖó nyi wɛ nyí Mawu towe.
Un ná ná hlɔ̌nhlɔ́n we, ɛɛn, un ná d’alɔ we,
un ná hɛn we gbánwúngbánwún kpó ɖisílɔ ce nǔjlɔ́jlɔ́wiwa tɔn ɔ kpó.’
11 Éɖíe! Mɛ e nɔ jɛ ma dó jǐ towe lɛ́ é bǐ ná ɖu winnyá, bɔ wi yětɔn ná kɔ́n.
Mɛ ɖěɖěe nɔ fun ahwan xá we lɛ́ é sín xó ná fó, bɔ yě ná dɔn.
12 A ná ba mɛ ɖěɖěe nɔ li za xá we lɛ́ é, loɔ, a ná mɔ yě ǎ;
mɛ e ɖo ahwan fun xá we wɛ lɛ́ é ná cí nǔ e ma tíin ǎ é ɖɔhun, ɛɛn, nǔ yǎyá ɖɔhun.
13 Ðó nyɛ Jexóva Mawu towe ɔ, un hɛn ɖisílɔ towe,
un ɖo ɖiɖɔ nú we wɛ ɖɔ: ‘Ma ɖi xɛsi ó. Un ná d’alɔ we.’
14 Hwi wǎnvú* Jakɔ́bu, ma ɖi xɛsi ó,
súnnu Izlayɛ́li tɔn lɛ́ mi, un ná d’alɔ mi,” wɛ Jexóva, Mɛ e vɔ́ we xɔ é, Mɛ mímɛ́ Izlayɛ́li tɔn ɔ ɖɔ.
15 “Éɖíe! Un sɔ́ we dó bló nǔkúnsónú,
nǔkúnsónú nuwenɔ e ɖó aɖǔ é yɔ̌yɔ́ ɖé.
A ná gba só ɖaxó lɛ́, bo ná li yě,
lobo ná bló bɔ só kpɛví lɛ́ ná húzú fló.
16 A ná fún yě,
bɔ jɔhɔn ná bɛ́ yě yi;
jɔhɔn ɖaxó ná fúnfún yě kpé.
A ná j’awǎ ɖo Jexóva mɛ,
bo ná gó ɖo Mɛ mímɛ́ Izlayɛ́li tɔn ɔ mɛ.”
17 “Gbɛ̌dónánɔ kpó wamamɔnɔ kpó ɖo sin ba wɛ, sin ɖě ka ɖe ǎ.
Ðɛ̌ yětɔn xú ɖó kɔ xú yě wútu.
Nyɛ Jexóva ná d’alɔ yě.
Nyɛ Mawu Izlayɛ́li tɔn ɔ ná ɖe alɔ sín kan yětɔn mɛ ǎ.
18 Un ná bló bɔ tɔ ná sa ɖo só kpɛví e jí nǔɖé ma ɖe ǎ lɛ́ é jí,
bɔ tɔjɔtɛn lɛ́ ná ɖo ayǐkúngban wɛnjɛ lɛ́ jí.
Un ná sɔ́ gbětótló dó húzú sindo e mɛ fántín ɖe é,
bo ná sɔ́ ayǐkúngban e jí sin ma ɖe ǎ é dó húzú tɔjɔtɛn.
19 Un ná tun sɛ́dlutín,
kasyatín, mǐititín kpó pínutín kpó ɖó gbětótló ɔ mɛ.
Un ná tun jenɛvliyéetín,
gɔ́ nú flɛ́nitín kpó siplɛ́tín kpó ɖó gbětótló ɔ mɛ,
20 bónú togun lɛ́ bǐ ní dó sixú mɔ bo tuun,
ɖó ayi wú, lobo mɔ nǔ jɛ mɛ
ɖɔ alɔ Jexóva tɔn wɛ bló nǔ énɛ́,
Mɛ mímɛ́ Izlayɛ́li tɔn ɔ wɛ bló bɔ nǔ nyí mɔ̌.”
21 “Mi ɖɔ xó e hɛn mi wá é,” wɛ Jexóva ɖɔ.
“Mi ná hwɛjijɔ mitɔn lɛ́,” wɛ Axɔ́sú Jakɔ́bu tɔn ɖɔ.
22 “Mi ná kúnnuɖenú lɛ́, bo ɖɔ nǔ ɖěɖěe ná jɛ lɛ́ é nú mǐ.
Alǒ mi ɖɔ nǔ e ná wá jɛ lɛ́ é nú mǐ.
23 Mi ɖɔ nǔ e ná jɛ ɖo sɔgúdo é nú mǐ,
bónú mǐ ní dó sixú tuun ɖɔ mi nyí mawu.
Ɛɛn, mi ní wa nǔɖé, é sixú nyí nǔ ɖagbe, alǒ nǔ nyanya,
bónú é ní dó sixú jí wǔ nú mǐ hwenu e mǐ ná mɔ é.
24 Éɖíe! Mi tíin ǎ,
azɔ̌ mitɔn nyí nǔtí ǎ.
Mɛ ɖěbǔ e sɔ́ mi é nɔ nyí nǔvɛ́mɔ.
25 Un ná fɔ́n mɛɖé sí te sín totaligbé, bɔ é ná wá,
mɛ e gosín hwetɔ́nhwe jí* é ná xomlá nyǐkɔ ce.
É ná gbídí acɛkpatɔ́* lɛ́ ɖó afɔ wú cí nǔ ɖɔ ko wɛ yě nyí ɖɔhun,
lěe zɛ̌nmɛtɔ́ ɖé nɔ nya ko kpó afɔ kpó gbɔn é ɖɔhun.
26 Mɛ̌ ka ɖɔ xó dó nǔ énɛ́ wú sín bǐbɛ́mɛ, bónú mǐ ní dó sixú tuun,
alǒ sín hwexónu, bónú mǐ ní dó sixú ɖɔ: ‘Hwɛ tɔn jɔ’?
Nǔgbó ɔ, mɛ ɖěbǔ ɖɔ ɖ’ayǐ ǎ!
Mɛ ɖěbǔ jlá ǎ!
Mɛ ɖěbǔ se xó ɖé ɖo nu mitɔn ǎ!”
27 Nyɛ wɛ nyí mɛ nukɔntɔn e ɖɔ xó élɔ́ nú Sinyɔ́ɔ é: “Éɖíe! Yě ɖíe!”
Bɔ un ná sɛ́ mɛ e nɔ dó wɛn ɖagbe mɛ é ɖé dó Jeluzalɛ́mu.
28 Amɔ̌, un ɖo kpínkpɔ́n wɛ, mɛ ɖěbǔ ka ɖe ǎ;
mɛ ɖěbǔ ɖo yě mɛ, bo ná ɖe wě xá mɛ ǎ.
Bɔ un nɔ ɖo byɔ̌byɔ́ yě wɛ ɖɔ yě ní ná xósin.
29 Éɖíe! Yě ɖě nyí nǔɖéwanú ǎ.*
Azɔ̌ yětɔn lɛ́ nyí nǔ yǎyá.
Ganbócyɔ yětɔn lɛ́* ɔ, jɔhɔn wɛ yě nyí, bo nyí nǔ tófwé.