Wěma nukɔntɔn e è wlán sɛ́dó Kɔlɛ́ntinu lɛ́ é

10 Din ɔ, nɔví lɛ́ mi, un jló ɖɔ mi ní tuun ɖɔ tɔ́gbó mǐtɔn lɛ́ bǐ wɛ nɔ akpɔ́kpɔ́ ɔ glɔ́, bɔ yě bǐ xo xu ɔ zlɛ́. 2 Yě bǐ bló batɛ́mu ɖo Mɔyízi mɛ,* gbɔn akpɔ́kpɔ́ ɔ kpó xu ɔ kpó gblamɛ. 3 Yě bǐ ɖu nǔɖuɖu gbigbɔ tɔn ɖokpó ɔ. 4 Yě bǐ nu sin gbigbɔ tɔn ɖokpó ɔ. Ðó yě nɔ nu sin e nɔ tɔ́n sín awǐnnya gbigbɔ tɔn e xwedó yě é mɛ é; awǐnnya énɛ́ wɛ nyí Klísu. 5 É ɖo mɔ̌ có, Mawu hun xomɛ dó gěgé yětɔn wú ǎ, nǔ e mɛ énɛ́ tɔ́n kɔ dó é wɛ nyí ɖɔ yě kú ɖo gbětótló mɛ.

6 Kpɔ́ndéwú wɛ nǔ énɛ́ lɛ́ nyí nú mǐ, bónú mǐ ní ma jló nǔ e ná hɛn nǔ gblé dó mɛ wú lɛ́ é lěe yě jló gbɔn é ó. 7 Mǐ ní ma jɛ bǒcyɔ sɛn jí lěe yě mɛ ɖé lɛ́ bló gbɔn é ó; lěe è ko wlán gbɔn é ɔ: “Togun ɔ jínjɔ́n ayǐ bo ɖu nǔ, bo nu sin. Énɛ́ gúdo ɔ, yě sí te bo ná d’ayihún.” 8 Mǐ ní ma nɔ lɛ aga* lěe yě mɛ ɖé lɛ́ lɛ aga,* bɔ yě mɛ 23 000 kú gbe ɖokpó é ɖɔhun ó. 9 Mǐ ní ma tɛ́n Jexóva* kpɔ́n lěe yě mɛ ɖé lɛ́ tɛ́n ɛ kpɔ́n, bɔ dan ɖu yě bɔ yě kú é ɖɔhun ó. 10 Mǐ ní ma nɔ húnhún nǔ ɖɔ lěe yě mɛ ɖé lɛ́ húnhún nǔ ɖɔ, bɔ wɛnsagun ɖé* hu yě gbɔn é ɖɔhun ó. 11 Kpɔ́ndéwú wɛ nǔ énɛ́ lɛ́ e jɛ dó yě jí lɛ́ é nyí, bɔ è wlán ɖ’ayǐ bo ná dó gb’akpá nú mǐ mɛ e ɖo gbɛ nɔ wɛ ɖo vivɔnu gbɛ élɔ́ tɔn lɛ́ é.

12 Énɛ́ wú ɔ, mi nú mɛ e nɔ lin ɖɔ émí ɖo te é ní cɔ́ éɖée bo ma wá j’ayǐ ó. 13 Mi gbɔn mɛtɛ́nkpɔ́n ɖěbǔ mɛ zɛ éé mɛ gbɛtɔ́ nɔ gbɔn é wú ǎ. Amɔ̌, Mawu ɖo gbejí. É ná lɔn bónú mi ná gbɔn mɛtɛ́nkpɔ́n e hú gǎn mi é mɛ ǎ. Hwenu e mi ka ná ɖo mɛtɛ́nkpɔ́n mɛ é ɔ, é ná lɛ́ ɖe ali e mi ná gbɔn bo tɔ́n sín mɛ é, bónú mi ná dó sixú kpé wú bo dɛ ɖ’é nu.

14 Énɛ́ wú ɔ, mɛ vívɛ́ná ce lɛ́ mi, mi hɔn nú bǒcyɔsinsɛn. 15 Un ɖo xó ɖɔ nú mi wɛ lěe un ná ɖɔ xó nú mɛ e ɖó nukúnnúmɔjɛnǔmɛ lɛ́ é gbɔn é ɖɔhun; miɖésúnɔ ní da nǔ e un ɖɔ é kpɔ́n. 16 Nú mǐ nu kɔ́fu nyɔ̌ná tɔn e jí mǐ byɔ́ nyɔ̌ná dó é ɔ, hun Klísu tɔn mɛ ɖó mǐmá ɖe wɛ mǐ ɖe nɛ́ ǎ cé? Nú mǐ ɖu wɔ̌xúxú e mǐ fɛ́n é ɔ, agbaza Klísu tɔn mɛ ɖó mǐmá ɖe wɛ mǐ ɖe nɛ́ ǎ cé? 17 Nǔgbó wɛ ɖɔ mǐ sukpɔ́, amɔ̌, ɖó wɔ̌xúxú ɖokpó wɛ tíin wútu ɔ, agbaza ɖokpó wɛ mǐ nyí, ɖó mǐ bǐ wɛ ɖo wɔ̌xúxú ɖokpó énɛ́ ɖu wɛ.

18 Mi kpɔ́n togun Izlayɛ́li tɔn:* Nú yě ɖo vɔ̌sánú e è xwlé Mawu ɖo vɔ̌sákpe ɔ jí lɛ́ é ɖu wɛ ɔ, nǔ ɖu xá Mawu wɛ yě ɖe ɖɔhun wɛ é nɔ cí ǎ cé? 19 Étɛ́ ɖɔ wɛ un ka ɖe lo? Ðiɖɔ wɛ un ɖe ɖɔ nǔ e è sɔ́ dó sá vɔ̌ nú bǒcyɔ é, alǒ bǒcyɔ nyí nǔɖé a? 20 Éǒ; é nyɔ́ wa ɔ, ɖiɖɔ wɛ un ɖe ɖɔ vɔ̌ e akɔta ɖě lɛ́ nɔ sá lɛ́ é ɔ, awǒvi lɛ́ wɛ yě nɔ sá ná, é nyí nú Mawu ǎ; un ka ba bónú mi ní kpé nǔɖé xá awǒvi lɛ́ ǎ. 21 Mi sixú ɖo kɔ́fu Jexóva* tɔn nu wɛ bo ná nɔ lɛ́ nu kɔ́fu awǒvi lɛ́ tɔn ǎ; mi sixú ɖo nǔ ɖu ɖo “távo Jexóva* tɔn” jí wɛ bo ná nɔ lɛ́ ɖu ɖo távo awǒvi lɛ́ tɔn jí ǎ. 22 Alǒ ‘wǔ hwan zɔ́n Jexóva* wɛ mǐ ɖe’ a? Mǐ ɖó hlɔ̌nhlɔ́n hú i ǎ, kabǐ?

23 Sɛ́n ɔ* yí gbe bɔ è sixú wa nǔ lɛ́ bǐ, amɔ̌, nǔ lɛ́ bǐ wɛ nɔ hɛn le wá ǎ. Sɛ́n ɔ yí gbe bɔ è sixú wa nǔ lɛ́ bǐ, amɔ̌, nǔ lɛ́ bǐ wɛ nɔ bló bɔ è nɔ lí dǒ ǎ. 24 Mi nú mɛ ɖokpó ɖokpó ní nɔ ba nǔ e ná hɛn le wá nú mɛ ɖěvo lɛ́ é, é ní ma nyí nǔ e ná hɛn le wá nú éɖésúnɔ é ó.

25 Mi ɖu nǔ ɖěbǔ e sa wɛ è ɖe ɖo lansɔjí é, mi ma kan nǔɖé byɔ́ d’é wú ó, ɖó ayixa mitɔn wútu, 26 ɖó “Jexóva* tɔn wɛ nú ayǐkúngban ɔ kpó nǔ e ɖ’é jí lɛ́ é bǐ kpó.” 27 Ényí nǔmaɖitɔ́ ɖé ylɔ́ mi bónú é jló mi bɔ mi yi hǔn, mi ɖu nǔ ɖěbǔ e è ná xwlé mi é, mi ma kan nǔ ɖě byɔ́ d’é wú ó, ɖó ayixa mitɔn wútu. 28 Amɔ̌, ényí mɛ ɖěbǔ ɖɔ nú mi ɖɔ: “Nǔ élɔ́ ɔ, bǒcyɔ lɛ́ wɛ è sɔ́ dó sá vɔ̌ ná” hǔn, mi ma ɖu ó, ɖó mɛ e ɖɔ nú mi é wútu, bónú ayixa mɛ ɖěbǔ tɔn ní ma xo hun xá ɛ ó. 29 É nyí ayixa miɖésúnɔ tɔn xó ɖɔ wɛ un ɖe ǎ, loɔ, mɛ ɖě ɔ tɔn xó ɖɔ wɛ un ɖe. Ðó étɛ́wú ayixa mɛ ɖěvo tɔn ka ná ɖɔ hwɛ xá mɛɖésúsíninɔ ce? 30 Ényí un tlɛ nɔ dó kú hwenu e un ɖo nǔ ɖu wɛ é, bɔ nǔ e tamɛ dó kú dó wɛ un ɖe é ka nɔ zɔ́n bɔ mɛ ɖěvo lɛ́ nɔ mɔ xó ɖɔ dó wǔtu ce ɔ, étɛ́wú un ka ɖó ná ɖu lo?

31 Énɛ́ wú ɔ, nǔ ɖu wɛ mi ɖe oo, ahan nu wɛ mi ɖe oo, alǒ nǔ ɖěbǔ wa wɛ mi ɖe hǔn, mi ní nɔ wa nǔ bǐ dó sɔ́ Mawu su. 32 Mi ma húzú afɔklɛ́nnú nú Jwifu lɛ́, Glɛ̌kinu lɛ́ kpó agun Mawu tɔn kpó ó. 33 Gǎn e dó wɛ un ɖe é nɛ́. Nǔ e ná hɛn le wá nú nyiɖésúnɔ é wɛ un nɔ ba ǎ, é nyɔ́ wa ɔ, nǔ e ná hɛn le wá nú mɛ gěgé é wɛ un nɔ ba, ɛɛn, un nɔ wa nǔ lɛ́ bǐ bo ná dó nyɔ́ ɖo mɛ bǐ nukúnmɛ, bónú è ní dó sixú hwlɛ́n yě gán.