Sofoníi
1 Xó e Jexóva ɖɔ nú Sofoníi* vǐ súnnu Kúcí tɔn, vǐ súnnu Gedalíya tɔn, vǐ súnnu Amalíya tɔn, vǐ súnnu Ezekiyási tɔn ɖo axɔ́sú Judáa tɔn Joziyási Amɔ́ni ví ɔ hwenu é ɖíe:
2 “Un ná za nǔ e ɖo ayǐkúngban ɔ nukúnmɛ lɛ́ é bǐ síin mlɛ́mlɛ́,” wɛ Jexóva ɖɔ.
3 “Un ná za gbɛtɔ́ kpó kanlin kpó.
Un ná za xɛ e nɔ zɔn gbɔn jǐnukúnsin lɛ́ é kpó hweví e ɖo xu mɛ lɛ́ é kpó,
gɔ́ nú afɔklɛ́nnú lɛ́* kpó mɛ nyanya lɛ́ kpó;
un ná ɖe gbɛtɔ́ lɛ́ sín ayǐkúngban ɔ nukúnmɛ,” wɛ Jexóva ɖɔ.
4 “Alɔ ce ná jɛ Judáa
kpó mɛ e nɔ nɔ Jeluzalɛ́mu lɛ́ é bǐ kpó wú;
un ná za Baálu sín nǔ e kpo lɛ́ é bǐ sín tɛn énɛ́ mɛ,
nǔmɛsɛn toɖévomɛ tɔn sín hunnɔ lɛ́ sín nyǐkɔ gɔ́ nú vɔ̌sánúxwlémawutɔ́ e nɔ sɛn vodún lɛ́ é,
5 mɛ ɖěɖěe nɔ jɛ kpo ɖo xɔ lɛ́ ta nú ahwankpá jǐnukúnsin tɔn lɛ́ é,
gɔ́ nú mɛ ɖěɖěe nɔ jɛ kpo bo nɔ ɖɔ ɖɔ émí ná nɔ gbejí nú Jexóva,
bɔ ɖo hwe ɖokpó ɔ nu ɔ, yě nɔ xwlé nǔ bá nɔ gbejí nú Malukámu lɛ́ é,
6 kpó mɛ ɖěɖěe lɛ́ kɔ sín Jexóva gúdo,
bo ma nɔ ba Jexóva alǒ wěɖexámɛ tɔn ǎ lɛ́ é kpó.”
7 Mi cí xwíí ɖo Aklúnɔ Nǔbǐwúkpétɔ́ Jexóva nukɔn, ɖó azǎn Jexóva tɔn sɛkpɔ́.
Jexóva sɔ́ nǔ nú vɔ̌sísá ɖé; é bló bɔ mɛ ɖěɖěe é ylɔ́ lɛ́ é nyí mɛ mímɛ́.
8 “Vɔ̌sísá Jexóva tɔn sín azǎn gbe ɔ, un ná byɔ́ axɔ́ví lɛ́,
ɛɛn, axɔ́sú ɔ sín vǐ súnnu lɛ́, kpó mɛ ɖěɖěe nɔ dó toɖévomɛnu lɛ́ sín awu lɛ́ é kpó ɖɔ yě ní ɖó gbe.
9 Un ná byɔ́ mɛ ɖěɖěe nɔ xá atáa* ɔ jí lɛ́ é bǐ ɖɔ yě ní ɖó gbe ɖo azǎn énɛ́ gbe,
yě mɛ e nɔ bló bɔ dǎkaxixo kpó mɛflúflú kpó nɔ kpé gǎn yětɔn sín xwégbe lɛ́ é.
10 Ðo azǎn énɛ́ gbe ɔ,” wɛ Jexóva ɖɔ,
“è ná se xósúsú sín gbe sín Hwevíhɔntogbó ɔ ta,
è ná se gbɛvíhan sín toxo ɔ sín akpá wegɔ́ ɔ xwé,
bo ná se nǔgbigba ɖaxó sín gbe sín só kpɛví lɛ́ kɔn.
11 Mi mɛ e nɔ nɔ Makitɛ́ci* lɛ́ é ní dó gbɛvíhan,
ɖó è ko sú nǔsatɔ́* lɛ́ bǐ sín kún dó;*
è ko sú yě mɛ e nɔ da kpatágan lɛ́ é bǐ sín kún dó.
12 Ðo hwe énɛ́ nu ɔ, un ná hɛn zogbɛ́n bo kíjé Jeluzalɛ́mu kpó sɔxwixwe kpó,
un ná byɔ́ yě mɛ e gbɛ e zán wɛ yě ɖe é ko nyɔ́ nú yě,* bɔ yě nɔ ɖɔ ɖo ayi yětɔn mɛ ɖɔ:
‘Jexóva ná wa nǔ ɖagbe ǎ, é ka ná lɛ́ wa nǔ nyanya ǎ,’ lɛ́ é ɖɔ yě ní ɖó gbe.
13 È ná vɔ dɔkun yětɔn lɛ́ bo ná gba xɔ yětɔn lɛ́ hánnyá.
Yě ná gbá xɔ lɛ́, amɔ̌, yě ná nɔ yě mɛ ǎ;
yě ná tun vǐwuntín lɛ́, amɔ̌, yě ná nu vɛ̌ɛn yětɔn lɛ́ ǎ.
14 Azǎn ɖaxó Jexóva tɔn sɛkpɔ́!
É sɛkpɔ́ bo ɖo wǐwá wɛ wunnáwúnná!*
Azǎn Jexóva tɔn sín gbe ná dó xɛsi.
Azǎn énɛ́ gbe ɔ, ahwanfuntɔ́ ná sú xó.
15 Azǎn énɛ́ ɔ, xomɛsin syɛ́nsyɛ́n sín azǎn ɖé wɛ,
wǔvɛ́ kpó adohu adohu kpó sín azǎn ɖé wɛ,
jɔhɔn syɛ́nsyɛ́n kpó kúnsúdónúnǔ kpó sín azǎn ɖé wɛ,
ablu kpó zǐnflú kpó sín azǎn ɖé wɛ,
akpɔ́kpɔ́ kpó zǐnflú gɔngɔn kpó sín azǎn ɖé wɛ,
16 azǎn e gbe è ná kún lanzo bo sú ahwanfunfun sín xó,
dó tɔ́n ahwan toxo syɛ́nsyɛ́n lɛ́ kpó atɔxwɛ zwejí tɔn e yi jǐ lɛ́ é kpó é wɛ.
17 Un ná dɔn wǔvɛ́ wá gbɛtɔ́ lɛ́ jí,
bɔ yě ná ɖi zɔnlin nukúntɔ́nnɔ lɛ́ ɖɔhun,
ɖó Jexóva wɛ yě hu hwɛ dó.
Hun yětɔn ná funfún kpé afúntúntún ɖɔhun,
bɔ lan* yětɔn ná gba kpé mǐ ɖɔhun.
18 Kpatágan yětɔn alǒ siká yětɔn ná kpé wú bo hwlɛ́n yě ɖo xomɛsin syɛ́nsyɛ́n Jexóva tɔn sín azǎn gbe ǎ;
ɖó akpakpa sɔ́ mɛ tɔn sín myɔ ná fyɔ́ ayǐkúngban ɔ blěbú,
ɖó é ná vívá mɛ e nɔ nɔ ayǐkúngban ɔ jí lɛ́ é bǐ, ɛɛn, é ná vívá yě bɔ é ná vɛ́ jlɛ́.”