Ezayíi
26 Ðo azǎn énɛ́ gbe ɔ, è ná ji han élɔ́ ɖo Judáa to ɔ mɛ:
“Mǐ ɖó toxo hlɔ̌nhlɔ́nnɔ ɖokpó.
É bló bɔ dǒ tɔn lɛ́ kpó ahohó tɔn lɛ́ kpó nyí hwlɛngán.
2 Mi hun hɔntogbó lɛ́, bónú akɔta nǔjlɔ́jlɔ́watɔ́ ɔ ní dó sixú byɔ́ mɛ,
akɔta ɖé wɛ bo nɔ wa nǔ kpó gbejíninɔ kpó.
3 A ná nya xɛ ɖo mɛ e nɔ gán jɛ wǔtu towe bǐ mlɛ́mlɛ́ lɛ́ é* jí;
a ná ná fífá tɛgbɛ tɔn yě,
ɖó hwi wú wɛ yě ɖeji dó.
4 Mi ɖeji dó Jexóva wú káká sɔ́yi,
ɖó Jǎa* Jexóva wɛ nyí Só mavɔmavɔ ɔ.
5 Ðó é dɔn mɛ e nɔ nɔ fí e yi aga lɛ́ é wá do, é dɔn toxo e ɖo aga é wá do.
É dɔn ɛ wá do,
é dɔn ɛ wá do ɖo ayǐkúngban jí;
é zín i dó afúntúntún mɛ.
6 È ná sɔ́ afɔ dó gbídí i,
mɛ e ɖo wǔvɛ́ se wɛ é sín afɔ, ɛɛn, mɛmaɖómɛɖé sín afɔ ná gbídí i.”
7 Ali nǔjlɔ́jlɔ́watɔ́ tɔn jlɔ́.
Ðó a nɔ wa nǔ jlɔ́jlɔ́ wútu ɔ,
a ná bló nǔjlɔ́jlɔ́watɔ́ sín ali ɖó.
8 Jexóva è, ɖó mǐ ɖo hwɛɖiɖɔ towe lɛ́ sín ali xwedó wɛ wútu ɔ,
mǐ ɖo nukún ɖó we wɛ.
Nyǐkɔ towe kpó flínflín we kpó* nɔ myá nukún nú mǐ.*
9 Zǎnmɛ ɔ, un nɔ ba ná mɔ we kpó ayi ce bǐ kpó,*
ɛɛn, gbigbɔ ce nɔ ɖo biba we wɛ;
ɖó ényí a ɖo hwɛ ɖɔ xá ayǐkúngban ɔ wɛ ɔ,
mɛ e nɔ nɔ to ɔ mɛ lɛ́ é nɔ kplɔ́n nǔ dó nǔjlɔ́jlɔ́wiwa wú.
10 Ényí è tlɛ nyɔ́ xomɛ dó mɛdídá wú ɔ,
é ná kplɔ́n nǔjlɔ́jlɔ́wiwa ǎ.
É ná bo tlɛ nyí ɖo nǔjlɔ́jlɔ́wiwa* sín to mɛ ɔ, é ná wa nǔ nyanya;
é ná mɔ susu Jexóva tɔn ǎ.
11 Jexóva è, alɔ towe ɖo jǐ, amɔ̌, yě mɔ ǎ.
Yě ná mɔ wǎnyíyí syɛ́nsyɛ́n e a ɖó nú togun towe é, bɔ winnyá ná hu yě.
Ɛɛn, myɔ towe ná fyɔ́ kɛntɔ́ towe lɛ́.
12 Jexóva è, a ná ná fífá mǐ,
ɖó nǔ e mǐ bló lɛ́ é bǐ ɔ,
hwi wɛ bló nú mǐ.
13 Jexóva Mawu mǐtɔn è, gǎn ɖěvo lɛ́ kp’acɛ dó mǐ jí gbɔn vo nú hwɛ,
amɔ̌, nyǐkɔ towe kɛ́ɖɛ́ wɛ mǐ nɔ ylɔ́.
14 Yě kú; yě ná nɔ gbɛ ǎ.
Yě ɖó hlɔ̌nhlɔ́n ɖě ǎ, yě ná fɔ́n ǎ.
Ðó a sɔ́ ayi towe ɖó yě jí,
bo ná sú kún dó nú yě mlɛ́mlɛ́, bɔ è sɔ́ ná flín yě ɖě ǎ.
15 A bló bɔ akɔta ɔ sukpɔ́ d’é jí, Jexóva è,
a bló bɔ akɔta ɔ sukpɔ́ d’é jí;
a sɔ́ hwiɖée su.
A gbló ada nú dogbó to ɔ tɔn lɛ́ bǐ tawun.
16 Jexóva è, hwenu e yě ɖo wǔvɛ́ mɛ é ɔ, yě wá gɔ̌n towe;
yě ɖe kpá bo xo ɖɛ sɛ́dó we, bo ɖɔ nǔ e ɖo ayi yětɔn mɛ é bǐ hwenu e a dɔn tó nú yě é.
17 Lěe nyɔ̌nu xoxónɔ e ja vǐ ji gbé é
nɔ ɖo wǔvɛ́ ajidonu tɔn se wɛ bo nɔ ɖo xó sú wɛ, ɖó wǔvɛ́ wú gbɔn é ɔ,
Jexóva è, lěe a bló bɔ nǔ cí nú mǐ é nɛ́.
18 Mǐ mɔ xo, mǐ se ajidonu sín wǔvɛ́,
amɔ̌, é cí nǔ ɖɔ jɔhɔn wɛ mǐ ji ɖɔhun.
Mǐ hɛn hwlɛngán wá to ɔ mɛ ǎ,
mɛ ɖěbǔ ka ji vǐ bónú é ná nɔ to ɔ mɛ ǎ.
19 “Mɛ towe e kú lɛ́ é ná lɛ́ nɔ gbɛ.
Cyɔ ce lɛ́* ná fɔ́n.
Mi mɛ e ɖo kɔ́ glɔ́ lɛ́ é mi,
mi fɔ́n bo sú xó kpó awǎjijɛ kpó!
Ðó amǔ mitɔn cí amǔ zǎnzǎn tɔn* ɖɔhun,
bɔ ayǐkúngban ná jó gǎnmaɖowǔnánɔ e ɖo yɔdo mɛ lɛ́ é dó, bɔ yě ná wá gbɛ.*
20 Togun ce, mi yi, mi byɔ́ xɔnɔnɔ mitɔn lɛ́ mɛ,
bo sú hɔn mitɔn lɛ́ dó ta.
Mi hwlá miɖée nú hwenu kléwún ɖé,
káká bónú xomɛsin syɛ́nsyɛ́n ɔ ní wá yi.
21 Ðó éɖíe! Jexóva jawě sín nɔtɛn tɔn,
bo ná ylɔ́ mɛ e nɔ nɔ to ɔ mɛ lɛ́ é ɖɔ yě ní wá ɖó nǔwanyido yětɔn sín gbe;
to ɔ ná ɖe hun e è kɔn nyi ayǐ ɖ’é mɛ lɛ́ é gba,
bo sɔ́ ná hwlá mɛ tɔn e è hu lɛ́ é ɖě ǎ.”