Ezayíi
42 Kpɔ́n mɛsɛntɔ́ ce e un nɔ nɔ gǔdo ná é!
Mɛ e un sɔ́, bɔ xomɛ nɔ hun mì* dó wǔtu tɔn é!
Un ná ɛ gbigbɔ ce;
é ná hɛn hwɛjijɔ wá nú akɔta lɛ́.
2 É ná sú xó, alǒ zé gbe dó jǐ ǎ,
é ná bló bónú è ná se gbe tɔn ɖo toxomɛli jí ǎ.
3 É ná gbídí fántín e ko tɔ é ɖěbǔ ǎ,
é ka ná cí zogbɛ́nkan e ko ɖo azɔ si wɛ é ɖěbǔ ǎ.
É ná hɛn hwɛjijɔ wá kpó gbejíninɔ kpó.
4 Hlɔ̌nhlɔ́n tɔn ná ɖe kpo ǎ, mɔ̌ jɛ́n è ma ná nyínyɛ́ ɛ, káká cóbónú é ná ɖó hwɛjijɔ ayǐ ɖo ayǐkúngban ɔ jí ǎ é nɛ́;
tɔtɛ́ntinto lɛ́ ɖo te kpɔ́n sɛ́n* tɔn.
5 Mawu nǔgbó ɔ Jexóva,
mɛ e dá jǐnukúnsin é, Mawu ɖaxó e vlɔ́n ɛ é,
mɛ e bló ayǐkúngban ɔ kpó nǔ e ɖ’é jí lɛ́ é kpó é,
mɛ e nɔ ná funfún mɛ e ɖ’é jí lɛ́ é,
bo nɔ ná gbigbɔ mɛ ɖěɖěe nɔ ɖi zɔnlin gbɔn jí lɛ́ é ɔ, xó e é ɖɔ é ɖíe:
6 “Nyɛ Jexóva ɔ, bo ná dó wa nǔ jlɔ́jlɔ́ ɔ, un ylɔ́ we;
un hɛn alɔ towe.
Un ná nya xɛ ɖo jǐ we, bɔ a ná cí akɔjijɛ ɖé ɖɔhun ɖo nyɛ kpó togun lɛ́ kpó tɛ́ntin,
bɔ a ná cí wěziza ɖɔhun nú akɔta lɛ́,
7 bónú a ná hun nukún nú nukúntɔ́nnɔ lɛ́,
bo ɖe gantɔ́ lɛ́ sín gankpá do glɔ́ tɔn lɛ́ mɛ,
lobo ɖe mɛ e ɖo ayǐjínjɔ́n ɖo ablu mɛ lɛ́ é sín gankpá mɛ.
8 Un nyí Jexóva. Nyǐkɔ ce nɛ́;
un nɔ sɔ́ susu ce jó nú mɛ ɖěvo ɖěbǔ ǎ,*
mɔ̌ jɛ́n un ma nɔ sɔ́ susu ce jó nú bǒcyɔ kpikpa lɛ́ ǎ é nɛ́.
9 Mi kpɔ́n, nǔ nukɔn nukɔntɔn lɛ́ jɛnu,
din ɔ, un ɖo nǔ yɔ̌yɔ́ lɛ́ jlá wɛ.
Cóbónú yě ná jɛ ɔ, un nɔ ɖɔ xó yětɔn nú mi.”
10 Mi mɛ e xu kpó nǔ e ɖ’é mɛ lɛ́ é kpó nɔ ná nǔɖuɖu lɛ́ é mi,
tɔtɛ́ntinto lɛ́ kpó mɛ e nɔ nɔ mɛ lɛ́ é kpó è mi,
mi ji han yɔ̌yɔ́ ɖé nú Jexóva,
mi kpa susu n’i sín fí e ayǐkúngban ɔ kponu ɖó lɛ́ é.
11 Gbětótló kpó toxo tɔn lɛ́ kpó ní zé gbe dó jǐ,
gletoxo e mɛ Kedáa nɔ nɔ lɛ́ é ní zé gbe dó jǐ.
Mɛ e nɔ nɔ sókan mɛ lɛ́ é ní sú xó kpó awǎjijɛ kpó;
yě ní sú xó sín só ɖaxó lɛ́ tanu.
12 Yě ní kpa susu nú Jexóva,
bo jlá susu tɔn gbɔn tɔtɛ́ntinto lɛ́ mɛ.
13 Jexóva ná tɔ́n súnnu hlɔ̌nhlɔ́nnɔ ɖé ɖɔhun.
É ná bló bɔ akpakpa ná sɔ́ ɛ ahwanfuntɔ́ ɖé ɖɔhun.
É ná sú xó, ɛɛn, é ná sú ahwanfunfun sín xó;
é ná ɖe xlɛ́ ɖɔ émí hú agbɔ̌n kɛntɔ́ émítɔn lɛ́.
14 “Un tin xwíí nú hwenu línlín.
Un nɔ abwɛ̌, bo ɖu ɖo nyiɖée jí.
Nyɔ̌nu e ɖo vǐ ji wɛ é ɖɔhun ɔ,
un ná wɛn azɔn, zɛn, bo lɛ́ gbɔjɛ syɛ́nsyɛ́n hwe ɖokpó ɔ nu.
15 Un ná gba só ɖaxó lɛ́ kpó só kpɛví lɛ́ kpó mlɛ́mlɛ́,
bo ná bló bɔ gběhan e ɖo yě jí é bǐ ná xú.
Un ná sɔ́ tɔsisa lɛ́ dó húzú tɔtɛ́ntinto,*
bo ná bló bɔ tɔdo e mɛ fántín gɔ́ é ná xú.
16 Un ná kplá nukúntɔ́nnɔ lɛ́ gbɔn ali e yě ma tuun ǎ é jí,
bo ná bló bɔ yě ná ɖi zɔnlin gbɔn ali e ma má dó yě ǎ lɛ́ é jí.
Un ná sɔ́ ablu e ɖo nukɔn yětɔn é dó húzú wěziza,
bo ná sɔ́ ayǐkúngban kacakaca dó húzú ayǐkúngban jlɔ́jlɔ́.
Nǔ e un ná wa nú yě é nɛ́, un ná ɖe alɔ sín kan yětɔn mɛ ǎ.”
17 Mɛ ɖěɖěe nɔ ɖeji dó bǒcyɔ kpikpa lɛ́ wú lɛ́ é,
mɛ ɖěɖěe nɔ ɖɔ nú ganbócyɔ lɛ́* ɖɔ: “Mi wɛ nyí mawu mǐtɔn” lɛ́ é ɔ,
yě ná dó gǔdofɔ, bɔ è ná dó winnyá yě bǐ mlɛ́mlɛ́.
18 Mi mɛ e nyí tókúnɔ lɛ́ é mi, mi ɖótó;
mi mɛ e nyí nukúntɔ́nnɔ lɛ́ é mi, mi kpɔ́n bo mɔ.
19 Mɛ̌ ka nyí nukúntɔ́nnɔ, bɔ é ma nyí mɛsɛntɔ́ ce ǎ?
Mɛ̌ ka nyí tókúnɔ sɔ wɛndótɔ́ e un sɛ́ dó é?
Mɛ̌ ka nyí nukúntɔ́nnɔ sɔ mɛ e è dó ajɔ é?
Mɛ̌ ka nyí nukúntɔ́nnɔ sɔ mɛsɛntɔ́ Jexóva tɔn?
20 A nɔ mɔ nǔ gěgé, amɔ̌, a nɔ nɔ acéjí ǎ.
A nɔ hun tó towe lɛ́, amɔ̌, a nɔ ɖótó ǎ.
21 Ðó nǔjlɔ́jlɔ́wiwa tɔn wútu ɔ,
Jexóva ná xlɛ́ ɖɔ sɛ́n* ɔ d’agba, bɔ susu jɛxá.
22 Amɔ̌, togun e è vɔ, bo bɛ́ nǔ tɔn lɛ́ é wɛ togun élɔ́ nyí;
yě mɛ bǐ wɛ è wlí dó do mɛ, bo hwlá yě dó gankpá lɛ́ mɛ.
È vɔ yě, bɔ mɛ ɖěbǔ ɖe bo hwlɛ́n yě ǎ,
è bɛ́ nǔ yětɔn lɛ́, bɔ mɛ ɖěbǔ ɖe bo ɖɔ: “Mi kplá yě lɛ́ kɔ!” ǎ.
23 Mɛ̌ ka ɖo mi mɛ bo ná se xó énɛ́?
Mɛ̌ ka ná wlí tó wú, alǒ ɖótó ɖó hwenu e jawě é wú?
24 Mɛ̌ ka jó Jakɔ́bu bɔ è bɛ́ nǔ tɔn lɛ́?
Mɛ̌ ka jó Izlayɛ́li nú mɛ e nɔ vɔ mɛ lɛ́ é?
Jexóva, mɛ e mǐ hu hwɛ dó é wɛ ǎ cé?
Yě gbɛ́ ɖɔ émí kún ná ɖi zɔnlin gbɔn ali tɔn lɛ́ jí ó,
yě gbɛ́ ɖɔ émí kún ná se tónú nú sɛ́n* tɔn ó.
25 É kpo ɖo xomɛsin tɔn kɔn dó yě jí wɛ,
xomɛsin tɔn kpó ahwan sín xɔxɔ kpó.
Ahwan fyɔ́ nǔ e lɛ́ lɛ̌ dó yě lɛ́ é bǐ, amɔ̌, yě ɖó ayi wú ǎ.
Ahwan kpo ɖo yě fyɔ́ wɛ, amɔ̌, yě ké ya ná ǎ.