Ezayíi
43 Din ɔ, nǔ e Jexóva ɖɔ é ɖíe,
éyɛ́ Mɛ e ɖó hwɛ Jakɔ́bu é, Mɛ e bló hwɛ Izlayɛ́li é; nǔ e é ɖɔ é ɖíe:
“Ma ɖi xɛsi ó, ɖó un vɔ́ we xɔ.
Un sɔ́ nyǐkɔ towe dó ylɔ́ we.
Ce wɛ a nyí.
2 Ényí a ɖo sin mɛ gbɔn wɛ ɔ, un ná ɖo kpɔ́ xá we,
ényí a ɖo tɔsisa lɛ́ mɛ gbɔn wɛ ɔ, yě ná ɖí bú we ǎ.
Ényí a ɖo zɔnlin ɖi gbɔn myɔ mɛ wɛ ɔ, a ná ji myɔ ǎ,
mɔ̌ jɛ́n myɔ ɔ ma ná fyɔ́ we ǎ é nɛ́.
3 Ðó nyɛ wɛ nyí Jexóva Mawu towe,
Mɛ mímɛ́ Izlayɛ́li tɔn, Mɛhwlɛ́ngántɔ́ towe.
Un ko sɔ́ Ejípu jó dó xɔ gbɛ nú we,
bo ko sɔ́ Etiopíi kpó Seba kpó jó dó tɛn towe mɛ.
4 Ðó a húzú nǔ xɔ akwɛ́ ɖo nukún ce mɛ,
è wlí yɛ̌yi nú we, bɔ nyɛ yí wǎn nú we.
Énɛ́ wú ɔ, un ná sɔ́ togun lɛ́ jó dó tɛn towe mɛ,
bo ná sɔ́ akɔta lɛ́ jó dó gbɛ* towe tɛnmɛ.
5 Ma ɖi xɛsi ó, ɖó un ɖo kpɔ́ xá we.
Un ná kplá kúnkan* towe sín zǎnzǎnhwe jí,
bo ná xo mi kplé ɖó kpɔ́ sín gbadahwe jí.
6 Un ná ɖɔ nú totaligbé ɖɔ: ‘Jǒ yě dó!’
Bo ná ɖɔ nú tofɔligbé ɖɔ: ‘Ma cí jǐ yětɔn ó.
Kplá vǐ súnnu ce lɛ́ wá sín fí línlín, bo kplá vǐ nyɔ̌nu ce lɛ́ wá sín fí e ayǐkúngban ɔ kponu ɖó lɛ́ é,
7 énɛ́ wɛ nyí mɛ e è nɔ ylɔ́ gbɔn nyǐkɔ ce gblamɛ lɛ́ é bǐ,
mɛ e un dá nú susu nyiɖésúnɔ tɔn lɛ́ é,
mɛ e un bló lɛ́ é.’
8 Ðe togun e ɖó nukún cóbó ka tɔ́n nukún é tɔ́n,
togun e ɖó tó, cóbó ka kú tó é tɔ́n.
9 Mi nú akɔta lɛ́ bǐ ní kplé ɖó fí ɖokpó,
togun lɛ́ bǐ ní xo kplé ɖó kpɔ́.
Mɛ̌ ka ɖo yě mɛ bo sixú ɖɔ nǔ énɛ́?
Alǒ, yě kpé wú bo ná bló bɔ mǐ ná se nǔ nukɔn nukɔntɔn lɛ́* a?
Mi nú yě ní ná kúnnuɖenú yětɔn lɛ́, bo ná dó ɖe xlɛ́ ɖɔ hwɛ émítɔn jɔ,
alǒ, mi nú yě ní se, bo ɖɔ: ‘Nǔgbó ɔ wɛ!’”
10 “Mi wɛ nyí kúnnuɖetɔ́ ce,” wɛ Jexóva ɖɔ,
“ɛɛn, mɛsɛntɔ́ ce e un sɔ́ é,
bónú mi ní dó sixú tuun, bo ɖi nǔ nú mì,*
lobo mɔ nukúnnú jɛ mɛ ɖɔ mɛ ɖokpó ɔ wɛ un nyí.
Mawu ɖě tíin jɛ nukɔn nú mì ǎ,
ɖě ka lɛ́ tíin ɖo gǔdo ce ǎ.
11 Nyɛ ɔ, nyɛ wɛ nyí Jexóva, bɔ mɛhwlɛ́ngántɔ́ ɖě sɔ́ ɖe zɛ nyɛ wú ǎ.”
12 “Nyɛ wɛ nyí mɛ e ɖɔ, bo hwlɛ́n mɛ gán, lobo bló bɔ è tuun é,
hwenu e nǔmɛsɛn to ɖěvo mɛ tɔn ɖě ma ko ɖo tɛ́ntin mitɔn ǎ é.
Énɛ́ wú ɔ, mi wɛ nyí kúnnuɖetɔ́ ce,” wɛ Jexóva ɖɔ, “bɔ un nyí Mawu.
13 Gɔ́ ná ɔ, mɛ ɖokpó ɔ wɛ un nyí hwebǐnu;
bɔ mɛ ɖěbǔ sixú xo nǔ ɖěbǔ yí sín alɔ ce mɛ ǎ.
Ényí un wa nǔ ɔ, mɛ̌ ka sixú sú ali dó?”
14 Nǔ e Jexóva, Mɛ e vɔ́ mi xɔ é, Mɛ mímɛ́ Izlayɛ́li tɔn ɔ ɖɔ é ɖíe:
“Un ná sɛ́ mɛ ɖokpó dó Babilɔ́nu, bo ná gba hɔntogbó lɛ́ sín gankpo lɛ́ ɖó mi wú,
bɔ Kaludéenu lɛ́ ná ɖo tɔjíhún yětɔn lɛ́ mɛ, bo ná sú xó kpó aluwɛ kpó.
15 Nyɛ wɛ nyí Jexóva, Mɛ mímɛ́ towe, Mɛ e dá Izlayɛ́li é, Axɔ́sú towe.”
16 Nǔ e Jexóva
mɛ e nɔ ɖe ali gbɔn xu mɛ é,
mɛ e tlɛ nɔ ɖe ali gbɔn sin e ɖo adǎn jí é mɛ é,
17 mɛ e nɔ ɖe ahwankɛkɛ́ kpó sɔ́ kpó,
gɔ́ nú ahwankpá kpó ahwanfuntɔ́ hlɔ̌nhlɔ́nnɔ lɛ́ kpó tɔ́n é ɖɔ é ɖíe:
“Yě ná mlɔ́ ayǐ, bo ná fɔ́n ǎ.
È ná xo yě cí zogbɛ́nkan e ɖo jiji wɛ é ɖɔhun.”
18 “Mi ma nɔ flín nǔ xóxó lɛ́ ó,
mi ma nɔ ɖo tamɛ lin dó nǔ e ko jɛ wá yi lɛ́ é jí wɛ ó.
19 Éɖíe! Un ɖo nǔ yɔ̌yɔ́ ɖé bló wɛ;
é tlɛ ko ɖo kun tɔ́n wɛ din.
Mi ɖó ayi wú ǎ cé?
Un ná ɖe ali ɖokpó gbɔn gbětótló mɛ,
bo ná bló bɔ tɔsisa lɛ́ ná sa gbɔn gbětótló ɔ mɛ.
20 Gběkanlin e ɖo gle mɛ lɛ́ é ná wlí yɛ̌yi nú mì,
gɔ́ nú cukú gbě tɔn lɛ́ kpó gowungo lɛ́ kpó,
ɖó un bló bɔ sin ɖo gbětótló ɔ mɛ,
bɔ tɔsisa ɖo gbětótló ɔ mɛ,
bónú togun ce, mɛ e un sɔ́ é ná nu,
21 togun e un ɖó ayǐ nú nyiɖésúnɔ é,
bónú yě ní dó sixú kpa susu nú mì.
22 Amɔ̌, Jakɔ́bu è, a ylɔ́ mì ǎ,
ɖó agbɔ̌n ce kpé we wútu, hwi Izlayɛ́li.
23 A hɛn lɛ̌ngbɔ́ wá nú mì dó sá vɔ̌ e è nɔ dó blěbú tɔn zo lɛ́ é ná ǎ,
a nɔ kpa susu nú mì kpó vɔ̌sísá towe lɛ́ kpó ǎ.
Un hɛn we gǎnnugǎnnu ɖɔ a ní ná nǔ mì ǎ,
mɔ̌ jɛ́n un ma jɛ gǒ mɛ nú we, bo ɖo zǎlínkpɔ́n wěwé byɔ́ we wɛ magbokɔ ǎ é nɛ́.
24 A sɔ́ akwɛ́ towe dó xɔ fántín wǎnɖagbenɔ nú mì ǎ,
a bló bónú vɔ̌sísá towe lɛ́ sín jǒ jɛmɛ nú mì ǎ.
É nyɔ́ wa ɔ, a nɔ sɔ́ hwɛ towe lɛ́ dó dó agban nú mì,
bo nɔ bló bɔ nǔwanyido towe lɛ́ nɔ ci kɔ nú mì.
25 Nyɛ ɔ, nyɛ wɛ ɖo hwɛ* towe lɛ́ súnsún wɛ ɖó nyǐkɔ ce wú,
un sɔ́ ná flín hwɛ towe lɛ́ ǎ.
26 Flín nǔ mì, mǐ ní ylɔ́ hwɛ mǐɖée lɛ́,
ɖɔ akpáxwé towe bo ná dó xlɛ́ ɖɔ hwɛ towe jɔ.
27 Tɔ́gbó towe nukɔntɔn ɔ hu hwɛ,
bɔ ɖɛ̌mɛnu* hwiɖésúnɔ tɔn lɛ́ fɔ́n gǔ dó jǐ ce.
28 Énɛ́ wú ɔ, un ná kɔ́n wi nú tɛn mímɛ́ ɔ sín axɔ́ví lɛ́,
bo ná sɔ́ Jakɔ́bu jó bɔ è ná sú kún tɔn dó,
lobo ná jó Izlayɛ́li nú zun.*