Ezayíi
33 Heelú we, hwi kúnsúdónúnǔtɔ́ e è ma ko sú kún dó ná ǎ é!
Hwi mɛflútɔ́ e è ma ko flú ǎ é!
Ényí a sú kún dó nú nǔ fó ɔ, è ná sú kún dó nú we.
Ényí a flú mɛ fó ɔ, è ná flú we.
2 Jexóva è, nyɔ̌ xomɛ dó mǐ wú.
Mǐ ɖo nukún ɖó we wɛ.
Hǔzú hlɔ̌nhlɔ́n* mǐtɔn ɖo zǎnzǎn lɛ́ bǐ,
ɛɛn, hwlɛngán mǐtɔn ɖo wǔvɛ́ hwenu.
3 Ényí gbɛtɔ́ lɛ́ se hunnyahunnya sín nǔɖiɖɔ ɔ, yě nɔ hɔn.
Ényí a sí te ɔ, akɔta lɛ́ nɔ fúnfún kpé.
4 Lěe bɔkle e ma nɔ gɔ́ xo ǎ lɛ́ é nɔ xo yěɖée lɛ́ kplé gbɔn é ɔ, mɔ̌ wɛ è ná xo nǔ towe e è bɛ́ ɖo ahwangbénu lɛ́ é kplé gbɔn;
mɛ lɛ́ ná zun dó jǐ tɔn bɔklehwan ɖɔhun.
5 È ná sɔ́ Jexóva su,
ɖó é nɔ nɔ jǐ aga.
É ná bló bɔ hwɛjijɔ kpó nǔjlɔ́jlɔ́wiwa kpó ná kpé Sinyɔ́ɔ.
6 É wɛ nɔ bló bɔ gbɛzán towe ma nɔ xo ǎ;
hwlɛngán núwiwa gěgé, nǔnywɛ́, nǔtuuntuun kpó sísí e gɔ́ngɔ́n é ɖíɖó nú Jexóva kpó;
dɔkun tɔn nɛ́.
7 Éɖíe! Súnnu hlɔ̌nhlɔ́nnɔ yětɔn lɛ́ ɖo xó sú wɛ ɖo toxomɛli jí;
fífáwɛndótɔ́ lɛ́ ɖo avǐ ya wɛ vívɛ́ vívɛ́.
8 Ali ɖaxó lɛ́ jɛ vɔ̌;
mɛ ɖěbǔ ɖo ali lɛ́ jí ǎ.
9 Ayǐkúngban ɔ ɖo aluwɛ mɛ, bo xú.
È dó winnyá Libáan; é nyɔ.
Calɔ́ni wá cí gbětótló ɖɔhun,
Basáni kpó Kaamɛ́li kpó ja ama yětɔn lɛ́ kɔn nyi ayǐ.
10 “Din ɔ, un ná sí te,” wɛ Jexóva ɖɔ,
“din ɔ, un ná sɔ́ nyiɖée su;
din ɔ, un ná ɖe hlɔ̌nhlɔ́n ce xlɛ́.
11 Mi mɔ gběhan xúxú sín xo bo ji nǔywɛ́.
Linlin miɖésúnɔ tɔn wɛ ná fyɔ́ mi myɔ ɖɔhun.
12 Gbɛtɔ́ lɛ́ ná ji kɔn afín.
Wuntín e è gbo nyi ayǐ é ɖɔhun ɔ, è ná dó yě zo.
13 Mi mɛ e ɖo zɔga lɛ́ é, mi ɖótó nǔ e un ná wa é!
Mi mɛ e ɖo tófí lɛ́ é, mi ní tuun ɖɔ un ɖó hlɔ̌nhlɔ́n!
14 Xɛsi ɖaxó jɛ hwɛhutɔ́ e ɖo Sinyɔ́ɔ lɛ́ é jí;
gǔfɔ́ndómawujítɔ́ lɛ́ ɖo sísɔ́sísɔ́ wɛ:
‘Mɛ̌ ka ɖo mǐ mɛ, bo sixú nɔ myɔ e nɔ fyɔ́ nǔ é kpá?
Mɛ̌ ka ɖo mǐ mɛ, bo sixú nɔ myɔ e nɔ ɖo jiji wɛ gbɛmɛ é kpá?’
15 Mɛ e nɔ wa nǔ jlɔ́jlɔ́ hwebǐnu é,
mɛ e nɔ ɖɔ nǔgbó é,
mɛ e nɔ nyi alɔ nú nǔgbómaɖɔ kpó mɛ hízíhízí kpó dó ɖu le é,
mɛ e ma nɔ yí gbe nú nǔɖuɖonǔmɛ ǎ, bɔ é nyɔ́ wa ɔ, é nɔ gbɛ́ é,
mɛ e nɔ sú tó tɔn hwenu e è ɖo hun kinkɔn nyi ayǐ xó ɖɔ wɛ é,
mɛ e nɔ sú nukún tɔn lɛ́ bo ma ná mɔ nǔ nyanya ǎ é:
16 é ná nɔ fí e yi aga lɛ́ é;
só syɛ́nsyɛ́n lɛ́ wɛ ná nyí bibɛtɛn tɔn ayijayǐ tɔn ɔ,
è ná ná ɛ wɔ̌xúxú tɔn,
bɔ sin ná hán ɛ gbeɖé ǎ.”
17 Nukún towe lɛ́ ná mɔ axɔ́sú ɖokpó ɖo susu tɔn mɛ;
yě ná mɔ to e ɖo zɔ vwéé é ɖé.
18 A ná lɛ́ flín nǔ e nɔ dó xɛsi mɛ tawun é* ɖo ayi towe mɛ bo ná kanbyɔ́ hwiɖée ɖɔ:
“Fítɛ́ wěgbójínɔtɔ́ ɔ ka ɖe?
Fítɛ́ mɛ e da kuzu é ka ɖe?
Fítɛ́ mɛ e xa atɔxwɛ lɛ́ é ka ɖe?”
19 A sɔ́ ná mɔ mɛ e ma nɔ sí mɛ ǎ lɛ́ é ɖě ǎ,
mɛ ɖěɖěe é vɛ́ wǔ dín bɔ è ná mɔ nukúnnú jɛ gbe yětɔn mɛ lɛ́ é,*
mɛ ɖěɖěe nɔ kúkú ɖɛ̌, bɔ a ma sixú mɔ nukúnnú jɛ nǔ e ɖɔ wɛ yě ɖe é mɛ ǎ lɛ́ é.
20 Mi kpɔ́n Sinyɔ́ɔ, toxo e mɛ mǐ nɔ ɖu agɔ̌ mǐtɔn lɛ́ ɖe é!
Nukún towe lɛ́ ná mɔ Jeluzalɛ́mu dó mɔ nɔtɛn e ɖo xwíí bɔ è ná nɔ é ɖé,
goxɔ e è ma ná sɛ tɛn ná ǎ é ɖé.
È ná sɛ tɛn nú goxɔ tɔn sín só lɛ́ gbeɖé ǎ,
è ná wɛ́n kan tɔn lɛ́ ɖěbǔ ǎ.
21 Amɔ̌, fínɛ́ ɔ, Jexóva Susunɔ ɔ
ná nyí xá e mɛ tɔsisa ɖe é kpó xá e mɛ tɔhwín waɖaɖa ɖe é kpó nú mǐ,
fí e ahwanfunfun sín tɔjíhún lɛ́ ɖě ma ná yi ǎ,
bɔ tɔsisa susunɔ lɛ́ ɖě ma ná gbɔn dín ǎ é.
22 Ðó Jexóva wɛ nyí Hwɛɖɔtɔ́ mǐtɔn,
Jexóva wɛ nyí Sɛ́nnámɛtɔ́ mǐtɔn,
Jexóva wɛ nyí Axɔ́sú mǐtɔn;
é wɛ nyí Mɛ e ná hwlɛ́n mǐ é.
23 Kan lɛ́ ná túntún;
yě ná kpé wú bo hɛn kpo ɔ ɖó te ǎ, mɔ̌ jɛ́n yě ma ná kpé wú bo vlɔ́n avɔ ɔ ǎ é nɛ́.
Ðo hwenɛ́nu ɔ, è ná má nǔ e è yí ɖo ahwangbénu é wɔ̌búwɔ́bú ɖé;
mɛ e tlɛ nyí afɔkponɔ é ná bɛ́ nǔ e è vɔ mɛ bo yí lɛ́ é gěgé.
24 Mɛ e nɔ nɔ fínɛ́ é* ɖě ná ɖɔ: “Un ɖo azɔn jɛ wɛ” ǎ.
È ná sɔ́ mɛ e nɔ nɔ to ɔ mɛ lɛ́ é sín nǔwanyido kɛ yě.