Ezayíi
63 Mɛ̌ ka nyí énɛ́ e jawě sín Edɔ́mu,
sín Bosla bo dó awu e sín sinmɛ ɖo nyaa lɛ́* é?
Mɛ énɛ́ e dó awu ɖɛkpɛ ɖɛkpɛ,
bo ɖo zɔnlin ɖi wɛ kpó hlɔ̌nhlɔ́n ɖaxó kpó é?
“Nyɛ Mɛ e nɔ ɖɔ xó e sɔgbe é wɛ,
Mɛ e ɖó hlɔ̌nhlɔ́n ɖaxó bo ná dó hwlɛ́n mɛ é wɛ.”
2 Étɛ́wú awu towe ka myá?
Étɛ́wú awu towe lɛ́ ka cí mɛ e ɖo nǔ li ɖo vǐwunto mɛ wɛ é tɔn lɛ́ ɖɔhun?
3 “Nyɛɖokpónɔ wɛ li vǐwun ɖo vǐwunto ɔ mɛ.
Mɛ ɖěbǔ gosín togun lɛ́ mɛ bo gɔ́ nú mì ǎ.
Xomɛ e sin mì é zɔ́n bɔ un kpo ɖo yě li wɛ,
un kpo ɖo yě gbídí ɖó afɔ wú wɛ, ɖó xomɛ e sin mì é wútu.
Hun yětɔn kɔn nyi awu ce lɛ́ mɛ,
bo hɛn avɔ ce lɛ́ bǐ kwíji.
4 Ðó hlɔnbibazán ɔ ɖo ayi ce mɛ,
bɔ xwe e mɛ un ná vɔ́ togun ce xɔ é ko wá.
5 Un kpɔ́n, loɔ, mɛɖé ɖe bo ná d’alɔ mì ǎ;
é cí kliwun nú mì ɖɔ mɛɖé kún ɖe bo ná nɔ gǔdo nú mì ó.
Énɛ́ wú ɔ, awa ce hɛn hwlɛngán* wá nú mì,
bɔ xomɛsin nyiɖésúnɔ tɔn nɔ gǔdo nú mì.
6 Un gbídí togun lɛ́ ɖó afɔ wú ɖó xomɛsin ce wú,
un bló bɔ xomɛsin ce mú yě,
bo kɔn hun yětɔn kɔn nyi ayǐ.”
7 Un ná ɖɔ Jexóva sín wǎnyíyí e ma nɔ sɛ do ǎ é sín nǔwiwa lɛ́,
nǔwiwa Jexóva tɔn e susu jɛxá lɛ́ é,
ɖó nǔ e Jexóva ko wa nú mǐ lɛ́ é bǐ wú,
nǔ ɖagbe tobutóbú e é ko wa nú togun Izlayɛ́li tɔn,
ɖo nǔbláwǔkúnúmɛ tɔn kpó wǎnyíyí tɔn ɖaxó e ma nɔ sɛ do ǎ é kpó mɛ é.
8 Ðó é ɖɔ: “É ɖo wɛn ɖɔ togun ce wɛ yě nyí, bo nyí vǐ e ná nɔ gbejí nú mì lɛ́ é.”*
Énɛ́ wú ɔ, é húzú Mɛhwlɛ́ngántɔ́ yětɔn.
9 Wǔvɛ́ yětɔn lɛ́ bǐ hwenu ɔ, é lɔ nɔ mɔ wǔvɛ́.
Bɔ wɛndótɔ́ éɖésúnɔ tɔn* hwlɛ́n yě.
Ðo wǎnyíyí tɔn kpó wǔvɛ́sexámɛ tɔn kpó mɛ ɔ, é vɔ́ yě xɔ,
é zé yě d’aga bo kpé nukún dó yě wú ɖo xwe énɛ́ lɛ́ bǐ vlamɛ.
10 Amɔ̌, yě fɔ́n gǔ bo bló bɔ wǔ kú gbigbɔ mímɛ́ tɔn.
Énɛ́ ɔ, é húzú kɛntɔ́ nú yě,
bo fun ahwan xá yě.
11 Yě flín azǎn xóxó lɛ́,
mɛsɛntɔ́ tɔn Mɔyízi sín azǎn lɛ́ bo ɖɔ:
“Fítɛ́ Mɛ e kplá yě tɔ́n sín xu ɔ mɛ kpó lɛ̌ngbɔ́kpó tɔn sín lɛ̌ngbɔ́nyitɔ́ lɛ́ kpó é ka ɖe?
Fítɛ́ Mɛ e ná ɛ gbigbɔ mímɛ́ tɔn é ka ɖe?
12 Fítɛ́ Mɛ e awa tɔn susunɔ ɔ nɔ gǔdo nú ɖisílɔ Mɔyízi tɔn é ka ɖe?
Fítɛ́ Mɛ e má sin lɛ́ ɖo nukɔn yětɔn,
bo ná dó bló bónú è ná flín nyǐkɔ tɔn káká sɔ́yi é ka ɖe?
13 Fítɛ́ Mɛ e bló bɔ yě ɖi zɔnlin gbɔn sin e ɖo xixo wɛ lɛ́ é* mɛ,
bónú yě ní dó ɖi zɔnlin ma klɛ́n afɔ,
sɔ́ ɖo gletoxo wɛnjɛ* mɛ gbɔn wɛ ɖɔhun é ka ɖe?
14 Lěe kanlinhwan nɔ jɛ te yi ayǐkúngban wɛnjɛ jí gbɔn é ɔ,
gbigbɔ Jexóva tɔn bló bɔ yě gbɔjɛ.”
Lěe a xlɛ́ ali togun towe gbɔn,
bo ná dó ɖó nyǐkɔ susunɔ* ɖé é nɛ́.
15 Nɔ jǐxwé bo kpɔ́n,
lobo mɔ sín nɔtɛn towe mímɛ́ kpó susunɔ* kpó e ɖo jǐ é.
Fítɛ́ kanɖódónǔwú towe kpó hlɔ̌nhlɔ́n towe kpó ka ɖe?
Fítɛ́ nǔ e nɔ sísɛ́ we bɔ a nɔ se wǔvɛ́ xá mɛ é kpó nǔbláwǔkúnúmɛ towe kpó ka ɖe?
È tɛ mì.
16 Ðó hwi wɛ nyí Tɔ́ mǐtɔn;
Ablaxámu sixú nɔ ma tuun mǐ,
bɔ Izlayɛ́li sixú nɔ ma tuun mǐ có,
Jexóva è, hwi wɛ nyí Tɔ́ mǐtɔn.
Mɛ e vɔ́ mǐ xɔ sín hwenu línlín ɖíe é wɛ a nɔ nyí.
17 Jexóva è, étɛ́wú a ka jó mǐ dó* bɔ mǐ zɛ gbě sín ali towe lɛ́ jí?
Étɛ́wú a ka tin* bɔ ayi mǐtɔn syɛ́n, bɔ énɛ́ zɔ́n bɔ mǐ ma ɖó sísí e gɔ́ngɔ́n é nú we ǎ?
Lɛ̌ kɔ, ɖó mɛsɛntɔ́ towe lɛ́ wútu,
ɛɛn, ɖó akɔta e nyí towe lɛ́ é wú.
18 To ɔ nyí togun mímɛ́ towe tɔn nú hwenu kléwún ɖé.
Kɛntɔ́ mǐtɔn lɛ́ gbídí tɛn mímɛ́ towe ɖó afɔ wú.
19 Nú hwenu línlín ɔ, mǐ cí mɛ ɖěɖěe jí a ma kpa acɛ dó gbeɖé ǎ lɛ́ é ɖɔhun,
mɛ ɖěɖěe è ma sɔ́ nyǐkɔ towe dó ylɔ́ ná gbeɖé ǎ lɛ́ é ɖɔhun.